JONA 3
3
Jonabe ne Tingwang Kuâpheube
1Dadege Tingwang gu sam Jonabe dage pakenabe luage wang dai ze acheu sa lei, 2“Chu ze Ninebi namdi kedibe ge tatchu lau, zai ningchu I sam rangliabe ze chige rangba gai be lau,” ze acheu zeu. 3Chigum ze Jonabe chu lu, Tingwang gu sam luigum ze Ninebi namdi ge pa tat ti de lei. Ninebi a namdi di-kadesangbe kau lei, pedit ge hezie kechumne tebeîtewrabe bâm lei. 4Zai Jonabe â chi namdi ’mbe mai kat-beî hangge tatchu di de lei, chidadege â pa ’nrung ze, “Hezie hedaine larei lei, chipau châng dezai Ninebi ze kau du lei,” ze kacheu de lei. 5Zai Ninebi namdi ge bamme ne Hera je ’nnum’mmi di de lei; zai penui ruage cheilangbe gene dilangbe riâ chang ze miseigiriapaî bâ lu, teseureirabe sam ze rangba gai de lei.
6Zai chipau sam ze Ninebi namdi gu heguang dage chîchang gai de lei, zai pa ne pe gu heguang-bamrak gene chu lu pe paîni gâutua nan ze pe runne miseigiriapaî bâ gai lu timbun zeu ge ka’ntau de lei. 7Zai pa ne samde tew gai lu, Ninebi namdi saruatui gai ze, “Heguang benai pe gu liangzame gu samde gene: Peize ziemmena mei, hekaubena mei, zai kauruidung mei nune melidung mei ne du mâ de ’ndâu se lau; penui je peize mâ-teu se lau, zai hedui du peize sak se lau, 8kane ziemmena benai hekaubena je miseigiriapaî ne peize tapchim kam lau, zai penui rankai Hera dage peize hap’nrung gai lau; Eu lei, peize hangkat-kat ne pe gu kesiabe ’mpuî gene zai lungkatîmphibe tâ tewbe pe ba ge bambe gene peize ’mbia de lei. 9Anui ’ngga mak ra hangge Hera ne pe lung heliwang dai ze pe lumpum-kadesangbe gene ’nreiwangdairabe lei ze châu ne chî ra lau?” kacheu lei.
10Penui tâtewgaibe penui gu kesiabe ’mpuî gene penui ’nreiwangbe Hera ne ngau lu dege, penui peireige tâtew gai ra pa sagai’ndibe gene Hera pe lung keli di de lei.
Currently Selected:
JONA 3: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
