JONA 2
2
Jonabe ne Kakellumbe
1Dadege chi hekâ bungpui lung gene Jonabe ne Tingwang pe Rapeu dage acheu ze kakellum de lei,
2“I a duânggabe gene Tingwang je kû de lei.
Zai pa ne achu kak kai bei de lei;
Kechaiberam sîng gene I ’nrung gai bei ze nang ne a kuâ seutâu gai bei de lei.
3Nang ne kechukbe ge achu tuâ gai ’ndi daseu,
sungkling sîng gezeu.
Zai heduinaîbe ne achu ’nzuiguâ ’ndi de lei;
ning gu hedui kagesuâkbe ramme benai hedui biakwangbe ramme ne achu luachim ’ndi de lei.
4Dadege I ne,
‘Ning masua gene achu tuâpat kai bei de lei;
’ndaigum ze ning gu kellumki ka’nchibe I ne piedaichi ra lau?’
ze kacheu de lei.
5A peireige hedui ne naîting ’ndi de lei,
zai kechukbe ne achu bamguâ ’ndi de lei;
hereubang ramme ne a peireige ruichim ’ndi de lei.
6Kedeiloa ramme ma ramme gezeu.
I â kêugut kai di ze kedei gu bechâp ramme zene betingbeta hangge achu chapnamting ’ndi de lei;
acheuleusede chipau kuiki gene nang ne a keringbe ze lupat kai bei de lei,
Hei Tingwang a Rapeu gau.
7A dage a keringbe pe jiesiakeudibe luage Tingwang je I ’nningdau de lei.
Zai ning gu kellumki ka’nchibe ge ning dage I kakellumbe wangchang de lei.
8Peruânggabe heraluîtewbe ramme je helung peigaime â,
penui lungsangtewbe gesang ze sâukeu gai ’ndi de lei.
9Kane I a suiyibe sam paugaibe kuâ ne ning dage herâtewbe pei gai gu lei;
I deseugai’ndibe ze I pei gu lei.
Tewka’nringbe tâ ze â Tingwang gu lei!” ze acheu daseu.
10Zai Tingwang ne chi hekâ je sam rang gai bei ze,
hekâ ne Jonabe je depûloa ge ’nruîpat kai bei de lei.
Currently Selected:
JONA 2: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
