JONA 1
1
Jonabe Tingwang Kuâpheumakbe
1Amittaibe na Jonabe dage Tingwang gu sam wang gai ze acheu sa ze, 2“Chu ze chi namdi kedibe Ninebi ge tat ze pe peireige ’nrung gai lau; penui lungriaksiabe ze a suage wangchang la daseu,” kacheu lei. 3Kane Jonabe chu lu ze Tingwang bambe gene Tarshis keloa ’mbe pak’mbia gai di de lei. Pa Joppa keloa ’mbe wangkeu lu ze Tarshis keloa ’mbe tat ra duinei kat ngau de lei; pa tatrabe mî pei gai lu, ’nnei ge keuchu lu, Tingwang masua gene kedeu ’mbe paktat te ra hangge penui benai pa Tarshis keloa ’mbe tat ti de lei.
4Kane Tingwang ne sungkling ge tingkaichibe ’mpat kai bei ze sungkling ge natri bam di, zai ’nnei kedibe ze tewpâng ne ra chang di de lei. 5Chidadege ’nnei kedibe kakereime â hing di ze, penui hangkat-katne pe rapeu dage ’nrung gai de lei; zai ’nnei kedibe lungge kerua bambe ramme ze sungkling ge penui ne tuâ gai ’ndi de lei, ’nnei kedibe ze tew’ncha ne ra hangge zeu. Kane Jonabe â ’nnei kedibe lung sîng ge buagut lu, jeikau gai lu ze jeikeu di de lei. 6Zai ’nnei kedibe ge besuitewpeu ne pe dage wang ze, pechu, “Kejeipeu gau, ’ndaikau ka’nning lau, chu lu ning Rapeu je kû gai be lau, chipau Rapeu ne anui ’ngga mak ra hangge anui je ’nning gai lalêu gu mei zeu” ze kacheu de lei. 7Zai penui kat-kat je ’mpau ze, “Châu ziegene ai kesiabe anui peireige wangchang mei be ze chî le ra hangge anui hedachak kai kei lei,” kacheu de lei. Chigum ze penui hedachak kai dege, Jonabe peireige chize keu gai de lei. 8Dadege penui ne pechu, “Châu ziegene ai kesiabe anui peireige wangchang mei be ze anui je rang gai lau. Nang ’ndaikau tâ tewbe kau lau? Zai nang ’ndai’nggene wang lau? Ning ram ’ndaikau lau? Zai ning zat ze ’ndaikau lau?” ze ka’nneu de lei. 9Zai pa ne penui je, “I â Hebrai’mpeu lei; zai I â sungkling benai kedei gechangbe tewgaipeu tinggîm Rapeu Tingwang je hing lei,” ze kacheu de lei. 10Chidadege â chi ziemmename ze hing-desang di ze, pechu, “Nang ne aize ’ndaikau tew gai bei rei lau!” kacheu de lei. Chi ziemmename ne pa â Tingwang masua gene pak’mbia di de lei be penui chî di de lei, pa ne penui je salia bei dadegeu. 11Dadege penui ne pechu, “Sungkling ze anui hang zîng gai de ra hangge ningchu anui ’ndaikau tew gai be ra lau?” kacheu de lei. Chi sungkling geze natri kechibe ne hedui gesuâkbi-bi di dadegeu. 12Pa ne penui je, “Achu puachu lu ze sungkling ge tuâ gai be lau, dezai sungkling ze ningnui hangge zîng gai du de lei; a ziegene aipau natri kechibe ningnui peireige wangchang de lei be I chipat lu daseu,” ze kacheu de lei. 13Acheuleusedu, duinei ze ’nneigiam ’mbe pat dai ra ziemmena ramme chaî-kadesang de lei, kane chize penui tewchi lak tai lei, sungkling ze penui hangge peranchibi-bi di dadegeu. 14Chipauziegene Tingwang dage penui acheu ka’nrung de lei, “Hei Tingwang gau, aipaupeu gu keringbe hang ziegene anui je peize tew’ngga mak ra ningchu anui kiam de lei, zai pemâugapeu gu hejai tû ze anui peireige ’ndam gai se lau; Hei Tingwang gau, nang ne nang-’nning luigumbe gene chize tewgai’ndibe kau daseu,” ze acheu zeu. 15Chigum ze Jonabe je penui ne puachu lu sungkling ge tuâ gai ’ndi de lei; zai sungkling ze kagesuâkbe gene sau gai di de lei. 16Dadege chi ziemmename ze Tingwang je hing-desang di ze, Tingwang dage herâtewbe peipat ze deseu gai de lei. 17Zai Jonabe je ’nzua ne ra hekâ kedibe je Tingwang ne chaupat kai bei de lei; zai Jonabe â chi hekâ kedibe bungpui lungge hezie kechum zai muî kechum bam di de lei.
Currently Selected:
JONA 1: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
