OBADIA 1
1
1Aize Obadiabe je liâbe de lei,
Edom tedeu ge Tingwang Hera ne aigum ze rang lei.
Tingwang dagene sam anui seu lu de lei,
zai hepâupaupeu hangkat je heramzatme ruage lang gai de lei:
Ningnui zuachu zu lau!
“Pechu herei ra anui zuachu zu kei lei!” acheu sabe zeu.
Tingwang ne Edom je Deîsarabe
2Pie le lau pezat ramme ruage pezat cheibe hangge I ne ningchu tew gai gu lei,
zai ningchu tewhelêuku gai gu lei.
3Nang hekâutelang ramme ge lungpeu,
zai peloa kehube ramme ge lungpeu gau,
ning lung gechîrettewbe ne ningchu duai de lei,
ning hanggene,
“Châu ne achu kedei ’mbe tewkeu gai dui lau?”
ze nang kacheupeu gau.
4Keliengrie gum ze nang kin’ngngutau ze bam,
zai hegi ramme ruage ning chippua gai lu bam sede,
chigene ningchu I ne chakkeu gai ’ndu lei,
ze Tingwang ne kacheu de lei.
5Ning dage mâ-kahegame benai sut-teume tingmuî ne wang lêuzai—
’ndaizeuge ningchu tew’nsia gai be ra lau!—
penui hang buibe riâ runne hega mak ta ra semei?
Ning dage grepchî-raime wang lêuzai,
penui rai’nsak kai mak ta ra semei?
6Esaube gu merua tewka’nsiabe tak,
pe heurâ ramme getaitattibe tak nung ze hêu!
7Ning lam mêuhâme leine ne ningchu choa gai bei de lei,
heramrai riâ ningchu penui ne kumtua gai bei de lei;
ning dage desieyi ze nguapuinakattew ze bamme ne ningchu naîchim ’ndi de lei;
ningchu takkuak nguateume ne ningchu mi ra ’mpia tew gai bei de lei—
chize la lei be mâ de chî mak lei.
8Chipau mai ge Edom ge ziemmena kaningchingme je benai Esaube Deiloa gene mâ-’nningchibe ze I ne lutua mak ta ra semei?
ze Tingwang ne kacheu de lei.
9Hei Teman gau,
ning gu heteureipeu ramme hingkedun gai gu de lei,
dezai Esaube Deiloa gene ziemmename je gîchat kam ’nde ra hangge zeu.
Edom je Tewsabe
10Ning sikina’mpeu Jakob je ’nggi ze tewchatbe ziegene,
nang ’ngngam ne ning ju gum lu bam gu lei,
zai ningchu â betingbeta hangge ngettua ’ndu de lei.
11Nang sap’mbia’ndeudibe mai ge,
pe heurâ ze hesang heluîchâmme ne sut-tattibe mai ge,
zai heram kêdabe deiname ne pe gu kerie’ngkam ramme gechimpânggut ze Jerusalem ’nzi ze hedachak ze bambe mai ge,
nang du chime ruage hangkat helî gum ze bam de lei.
12Kane ning sikina’mpeu pe pausiabe mai ge pe peireige nang pie bam se lau;
Judame peireige penui je tewka’nsiabe wangbe mai ge nang ning suiyi’nta gai mak ra lei;
pe duânggabe mai ge du ning dit tewlia gai mak ra lei.
13Nang â a gu ziemmena gu kerie ’ngkam tewpânggutmakrabe kau de lei,
pe pausiabe ’nnangwangbe mai ge zeu;
pa pe pausiabe daube mai ge Juda peireige nang pie bam mak ra lei,
pausiabe daube mai ge pe gu merua ramme nang sut mak ra lei.
14Pe gu ziemmena herei gene pak’mbiatatme je nang ne ’mpuîremak ge sapnam mak ra lei;
mi duânggabe mai ge pe gu ziemmename kechai’nreipatlume je hereime ba ge nang pei gai mak ra lei.
Hera ne Heram ramme je Samramrabe
15Pezat leine peireige samram ra Tingwang gu naimikpui na de lei.
Nang tâtewgai’ndibe luigum ze ning peireige du tew gai gu lei,
ning tatew ramme ze ning peireige wang gai dai gu lei.
16A gu ka’nchibe deiloa gene nang saklube luigum ze,
heram zat ramme leine du sak ku lei;
penui kedingpitkeu kam ’ndu lei,
zai mâ de mak run ze bam gu lei.
Israelme Keduîbe
17Kane Zaion Loa ge pak’nreipatlume ramme bam gu lei,
zai chize â ka’nchibe bâm chang gu lei;
zai Jakob ki ne penui heurâ nguaheu dai kam ’ndu lei.
18Jakob ki zene hemi chang gu,
zai Josep ki zene hemimelei chang gu,
zai Esau ki zene megau chang gu lei;
penui ne Esau ki ze rû gu,
zai heimia gai ’ndu lei,
zai Esau ki ge mî de ringpatlube kau bam ra mak lei,
ze Tingwang ne sa gai ’ndi daseu.
19Negeb ge bamme ne Esau Deiloa lu ’ndu lei,
zai Shephela ge bamme ne Philistiaram ze lu ’ndu lei;
zai chime ne Ephraimram benai Samariaram ’nram ’ndu lei,
zai Benjaminbe ne Gilead ze lu ’ndu lei.
20Israelme Hala ge lunglêume ne Phoeniki gene Zarephath riâ chang ze lu kam ’ndu lei;
zai Sepharad ge Jerusalem name ’nseugaileu ze bamme ne Negeb gu namdi ramme lu kam ’ndu lei.
21Ringpatlume ne Esau Deiloa heraktei ra Zaion loa ’mbe keuchu gu lei;
zai chi heguangram ze â Tingwang gu chang gu lei.
Currently Selected:
OBADIA 1: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
