HOSIA 7
7
1Israelram je I ne tew’mmi gai ra ’nning gai dege,
Ephraim peling tewmakbe ngau di de lei;
zai Samaria gu tâ-kesiabe tewbe ramme teilia lei,
penui â karasa tew,
mâ-kahegame ne riput gut,
zai hela ge hegasut-teume ne kedungrua daseu.
2Kane penui tâ-kesiabe tewbe ramme leine ze,
I ’nningdau lamui lei be penui ’nning gai mak lei.
Chunage penui tatew ramme ne penui je guâgit ze la lei,
chiramme ze a mikngau ge bam bam lei.
Heguangki ge Kesiaka’mpungbe
3Penui lungriaksiabe gene heguang pe suiyi’nta ra,
zai penui choâsiabe gene heguangsinme je du chigum ze penui ne tew gai lei.
4Penui ’nteumena kahemame kam lei;
penui â dekuî kakeneibe luagene chu ze chize chu mak tâne tingku langpeu ne hemi kedia gai ta di lumbup bambe hemang gum lei.
5Anui gu heguang gu naimikpui ge â,
heguangsinme â wain sak-meneulube-cheu gene ’nrâhei ze bam lei;
pa â kika’nnuime dage pe ba nguagetuapat kai lei.
6Mâ-’ngkim kaladdeibe gene penui lung â hemang gum ze tau bam lei;
kemuîbe ting tâluî penui lumpumbe heigie bam lei,
hechua dege â chize hemi-melei gum ze tauben bam di de lei.
7Penui ’nteumena ze hemang gum ze teusie ze bam lei,
zai penui gu samramme je penui ne tewka’ngga lei,
penui gu heguang ramme kâukeu kam di de lei;
zai penui ruage mî de achu kû mak lei.
Israelram benai Heramzatme
8Ephraim â,
ziemmena kêdabe zat ramme je nguakakebut lei;
Ephraim â kuakkedetkaimakbe tingkukuak te lei.
9Hesangme zat ne pechu peran tewka’ngga lei,
zai pa â chize chî mak lei;
hetampûbe ramme pe peî ge ’nruk kai bei de lei,
zai pa â chize chî mak lei.
10Israelram kahegiêbe ne pechu chau’ngkui gai de lei;
sede Tingwang penui Rapeu dage penui helatwang mak lei,
airamme deu hanggene pechu peu du peu mak lei.
11Ephraim â peruânggabe,
zai mâ ’nningchibe gabe temaune gum lei,
Ijip je kû zai Assiria ’mbe tat lei.
12Penui tat dezai penui peireige
a gu chîak I ne ’nsung gai gu lei;
Tingkai ge liamruabe ’nruine ramme je gum ze I ne penui je teikeu ’ndu lei;
Kesiabe tâ ramme penui tewbe ziegene penui je I ne tewsâ gu lei.
13Penui duângga gu lei,
a dagene penui tatlie di daseu!
Penui dage tewka’nsiabe wang gu lei,
achu penui ne tingkang bei daseu!
Penui je I ripat kai be nei lei,
kane a peireige penui karasa sa lei.
14Penui lung sing gene achu penui kû mak lei,
kane penui jeî gene penui desui ze bam lei;
chêu benai wain hanggene penui runne penui je tewjâm gai,
zai achu penui katingkang daseu.
15I ne penui je teihebîn ze penui baran tew’nchi gai bei sede,
a peireige kesiabe tâ tew gai ra
penui chiam bam lei.
16Baal lam penui lung ’nrei gai lei;
penui â pe choâsiabe bai’mpi gum lei,
gechîrettewbe leiria ziegene penui gu heguangsinme â hiazutkie gene kau gu lei.
Ijipram dei lungge aize penui je teihenuitewbe chang gu lei.
Currently Selected:
HOSIA 7: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
