HOSIA 8
8
Heraluîtewbe ziegene Israelme je Chau’ngkuigaibe
1Ning mui ge hegeîluîkie chua gai zu lau,
lawai â Tingwang kibaume peireige la daseu,
penui ne a gu samhatkaibe tewpâng,
zai a gu hingde ’ngkadibe ziegeneu.
2Penui ne a dage ’nrung ze,
A Rapeu gau, anui Israelme â,
ningchu chî lei, ze kacheu de lei.
3Israelbe â mâ-keyibe ze tuâpat ’ndi de lei;
heteureime ne pechu gua’nchu gu lei.
4Heguang ramme hangge penui ne sum gai lei,
kane a dagene mak lei,
heguangsinme je penui ne sum gai lei,
kane achu chiliâ gai mak ze chize tew gai lei,
penui je tew’nsiagairabe hangge penui gu gepût benai gechâk ne heraluîtewbe ramme penui tew gai lei.
5Hei, Samaria gau,
ning gu getumseipoine luî tewbe I ne tuâpat kai ’nde lei.
Penui peireige a lumpum de lei,
Israelram ze chiramme gene ’nchichiak de ra ’ndaidaune ra se lau?
6Hechiâm tâ tewchime ne chize Israelram ge tewgaibe kau lei;
chize â Hera mak lei.
Samaria gu getumseipoine je â,
tewpângdesuirui gai gu lei.
7Penui ne tingkai ling gai daze penui natri gat ku lei,
hemeu bang sapbe ze pebuî ’mbuî mak lei,
hetak hangge perachî ngau ra mak lei;
perachî ’nchi lêuzai du hesangme ne chize teu kam ’ndu lei.
8Israel je â ’nzuakeu ’ndi de lei;
heramzatme ruage penui â betâugabe li gum lei.
9Hênam gu hekunmerângne pe runne kezitruabe kau gum ze Assiriaram ’mbe penui hang di daseu;
Ephraim â pa merai ramme je kûwang gai de lei.
10Heramzatme ruage penui je nguakahezuâme je penui puîwang sede,
penui je I ne teiheruawang gai kelua gu lei.
Zai heguang benai heguangsinme penui kakelângbe ting kat â,
penui sau gai du lei.
11Hemui tâ tewrabe hangge herâtewbe-kaira ramme Ephraimme ne tewpung gai daze,
pe hangge â chiramme ze hemuitewrabe hangge herâtewbe-kaira chang di de lei.
12A gu hingde chang kereu pe hangge I raw gai bei lêuzai du chiramme ze penui ne mâdau chimakbe hangge chak kai ’ndu lei.
13Herâtewbe ze penui ka’nchâ lei;
hemei ne penui herâtew ze chize penui teu lei;
kane chiramme ge Tingwang ne pe suiyibe ga lei.
Chunage pa ne penui gu hemui-helut ramme chî bam gu,
zai penui gu hemui ramme ziegene tewsâ gu lei;
Ijipram ’mbe penui helatwang dai gu lei.
14Israel ne pechu ka’ndampeu je ’ngngaî nan ze heguangki ramme tew gai daseu;
zai Juda ne rieguabe namdi ramme tewpung gai de lei;
kane pe gu namdi ramme peireige I ne hemi lang gai gu lei,
zai chize ne pe gu keriengdi ramme rû kam ’ndu lei.
Currently Selected:
HOSIA 8: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
