EKSODAS 21

Kebangme je Teirabe Tak

(Deu 15.12-18)

1“Chunage nang ne penui suage kairabe hingde-sie ramme ze â airamme ze de lei: 2Hebraime kebang hangkat je nang lui dezai, kum seruk pa ’nggua gai ra lei, zai pasenabe kum ge â mâ de peritew mak ze pechu ’mpat kai ra de lei. 3Pe runne wang gai zai â pe runne zuapat dai ra lei; kelaktew lu ze pa wang gai zai â pe nâu je ngua lu pa zuapat dai ra lei. 4Pe pau ne pe nâu hangge pei gai bei ze chipau pui zene pe na ’mpeumi mei, nune ’mpuimi ramme mei ze lungkeu zai â pe nâu benai pe name ze â pe pau gu chang di ze pa â pe runne zuapat ra lei. 5Kane kebang ne rang’nchichiak kai ze, ‘I â a pau, a nâu, zai a name je hung lei; a runne ’nnêuri ze zuapat ra mak lei,’ ze acheu dizai â 6pe pau ne pechu Hera dage nguawang gai ra de lei, zai pa ne pechu ’ngkam ge mei nune kemuikung ge mei ze nguawang gai ra lei; dezai pe pau ne pe kun bûng gai ra lei; zai pa keringbe ting tâluî pe guâ ’nggua ze bam ra lei.

7“Mige ne pe na heleu’mpui je kebang hangge zua gai zai â pa ze â kebang ’mpeumi ramme gum ze â zuapat mak ra lei. 8Chipaupui zene pechu pe hangge hiamgaipeu suitew’mmi mak tizai â pechu ’nri le ra pei gai dai ra lei; pe pau ne pechu hesangkedeu’mpeu zat dage zua gai ra hangge pe dage rezie mâ de ga lei, chipaupui peireige lungsangtewmakbe tâ pa ne tew gai ’ndi daseu. 9Pe na nâu hangge pa ne lui zai â pechu ze pa ne pe na ’mpuimi je gum ze tei ra lei. 10Pa ne kêdapui je pe nâu hang kûwang dai zainedu keraîpui hetak, pe puâni, zai pe nâu changbe gu rezie ze tew’ncham gai mak ra lei. 11Zai airamme kechum ze pa’mpaupeu ne tew gai mak tizai â pechu rangkâng ne ’nri ra ’nnang ta di ze pa zuapat le dui lei.

Mi jaîsiabe Tatew ramme hangge Hingde ramme

12“Mi-mige ne ziemmena je lakchat ra hang ze lakchatbe kau je â pechu du tewchat ne ra lei. 13Kane pechu tewchat ra lîmkua mak ze, kane pe ba gene chipaupeu chai ra Hera ne pei’ndibe kau zai â chigumbe kau pak’mbiagairabe bâm hang ze ningnui hangge I ne teleu gai gu lei. 14Kane ziemmena mige ne miramme je tewchat ra chika ze pejaîsiabe gene tewchat tizai â pechu nang ne pa chai ra hang a gu herâtewbe-kaira gene teipat ne ra lei.

15“Pe peu je mei, pe pui je mei, ze bêube kau je â tewchat ra lei.

16“Ziemmena je zuarabe hanggene mei nune pa ne ’ngkutrabe hanggene mei ze ziemmena je kahegabe kau je â tewchat ra lei.

17“Pe peu je mei nune pe pui je mei ze desetkaibe kau je â tewchat ra lei.

18“Ziemmename mâ-tu ze hangkatpeu ne kêdapeu je tingchu ne pai mei, nune pe ba ne zûm bei mei be ge pa chai mak, kane hejam ze jeî ge jeikau gai ra chang di mei zai â, 19kahejampeu ze hetui pua lu zuachu dai ze tatrua dizai â pechu bêupeu gu hetû-hera ze â ’nchi de lei; kane pa ne kêdapeu gu pehî tew’ngga ’ndizai â peiruî ra lei, zai kahejampeu yi’nchi mak tâne pa ne yi ra teleu ra lei.

20“Mige pe gu kebangpeu mei nune kebangpui mei je hetui ne lak bei ze, kebang ze pe ba gene chai ra chang dizai â pechu tewsabe pei ra lei. 21Kane kebang je mai kat mei nune hezie kenane mei ze ring ra chang dizai â pechu tewsâ mak ra lei; kebang ze â pe gu rangkâng daseu.

22“’Mpeumi ramme kahegeibe gene ka’mpungpui je tew’nteu gai bei ze, henakeu dizai â, zai tewhereu sua dai mak dizai â chi ’mpuimi napeu zene pe peireige tuagaibe riâ pa ’nzua ra lei; zai samramme ne chakkaibe riâ pa ’nzua ra lei. 23Tewhejam ’ndizai a nang ne keringbe hangge keringbe, 24hemik hangge hemik, hegeu hangge hegeu, heba hangge heba, hepî hangge hepî; 25kerûbe hangge kerûbe, hejâm hangge hejâm, lakbe jâm hangge lakbe jâm nang peiruî ra lei.

26“Mige ne pe gu kebang ’mpeumi mei nune ’mpuimi mei je pe mik lak bei ze, pe mik tew’nsia ’ndizai â pe mik ziegene kebang je pa ne tat ra ’mpat kai ra lei. 27Pa ne pe gu kebangpeu mei nune kebangpui mei je pe geu getaukeu ’ndizai â kebang je pe geu ziegene pechu pa ’mpat kai ne ra lei.

Pa’mpaume ne Tewrabe Ngeu

28“Getumsei ne ziemmena ’mpeumi mei nune ’mpuimi mei je ’ntâuchat ’ndizai â getumsei je tingchu ne sîmchat ne ra lei, zai pe ji ze teu mak ra lei; kane getumsei ’mpaupeu peireige â hetû-hera ga’nchichiak ra lei. 29Kane getumsei ze besua’ngka ge du ziemmena je ’ntau ka’nziebe kau, zai pa’mpaupeu je salia’ntua bei ze mâ-hangge du riam gai makse, ziemmena ’mpeumi mei nune ’mpuimi mei je tewchat ’ndizai â getumsei je tingchu ne sîmchat ra lei, zai pa ’mpaupeu je du tewchat ra lei. 30Keringbe mî ze ’nzua ra pechu lun bei zai â pe gu keringbe mî ’nzuarabe hangge pe peireige chakkaibeibeibe luî pa pei ra lei. 31Hename, rehangme mei nune heleume mei je ’ntâu zainedu aipau hingde luî gene tei ra lei. 32Getumsei ne kebang ’mpeumi mei nune ’mpuimi mei je ’ntâu bei zai â getum ’mpaupeu ne kebangteibe ’mpaupeu je gepût rangkâng himreu pei ra lei, zai getumsei je tingchu ne sîm ra lei.

33“Mige ne hûm ze tewnam mak ze sâu gai mei nune mige ne hûm ramme rua lu chize gumchimmakbe luage getumsei mei nune hekunmerângne mei ze keuchat kai zai â, 34hûm ’mpaupeu ne kaurui mî riâ pei ra lei; pa’mpau peu dage pa ne rangkâng pei ra lei, zai chaidibe kaurui ze â pe gu chang ra lei.

35“Hangkatpeu ne kêdapeu gu getumsei je tewhejam bei ze, chai ra chang dizai â penai ne keringbe getumsei ze zua lu ze pemî ze ’nzi ra lei. Zai chaidibe sei ze â rim’nzi ra lei. 36Chi acheu mak ze besua’ngka gene du getumsei ze ’nchuruachi lei be chî lu ze pa’mpaupeu zene bangnam mak tizai â pa ne getumsei hangge getumsei pei ra zai chaidibe getumsei ze â pe hang chang ra de lei.

Currently Selected:

EKSODAS 21: ZEMEBSI

Highlight

Copy