EKSODAS 20

Hingde Kereu

(Deu 5.1-21)

1Zai Hera ne aipau sam ramme leine acheu ze sa ze,

2“I â nang kebangchangbeki gene, Ijipram gene ningchu nguapatkaipeu, ning Rapeu Tingwang lei.

3“Achu sâu ze kêdabe hera ramme ningnui suage bam mak ra lei.

4“Ning hangge heraluî nang heki gai mak ra lei, zai kehu ’mbe tinggîm ge bambe kau luî ka’nzuâbe mei, nune ’ngkang ’mbe kedei ge bambe luî mei, nune kedeisîng ’mbe sungkling ge bambe kau luî mei be nang tew mak ra lei; 5penui dage kei’ngkumkeu ze penui guâ ’nggua mak ra lei; I Tingwang ning Rapeu â yibe ka’nningbe Rapeu, achu ngaugailakme je â penui peume gu hemui ziegene penui name je rehei kechum benai medai riâ chang ze tewsâ ze bambe Rapeu, 6kane achu hung ze a gu samdiegaibe ramme teime je â rehei changsenâng I kehungbe teiliabambe Rapeu daseu.

7“Peruânggabe gene Tingwang ning Rapeu ji nang tei ra mak lei; peruânggabe gene pe ji teibe kau je pemâugabe kau hangge Tingwang ne chak kai ra mak daseu.

8“ ’Ntakbambe mai ge ’nchi ze reibam ra lei be chibam bam lau. 9Hezie serukne nang tâtew ra lei, zai ning tâ ramme leine tew kam ra lei; 10kane pasenabe mai â ning Rapeu Tingwang hangge ’ntakbambe mai lei; chipau mai ge â nang mei, nune ning na rehang’mpeu mei, nune heleu’mpui mei, ning gu kebangpeu mei, nune kebangpui mei, nune ning gu kaurui mei, nune ning gu kerie lungge lunggailêupeu mei sede mâ tâ de tew mak ra lei; 11hezie seruk lungge Tingwang ne tinggîm benai kedei zai pelung ge bambe leine tew gai de lei, zai chi pasenabe mai ge ’ntak bam de lei; chipauziegene Tingwang ne ’ntakbambe mai je ’nnam gai ze tew’nchi gai de lei.

12“Ning pui, ning peu ngeutew lau, chidezai Tingwang ning Rapeu ne ning hangge peibe heram ge nang ringtie gu lei.

13“Nang gî mak ra lei.

14“Nang kahemabe tâ tew mak ra lei.

15“Nang hega mak ra lei.

16“Ning kining’mpeu peireige karasa ne nang sakki tew gai mak ra lei.

17“Ning kining’mpeu ki je nang ’nchie mak ra lei; ning kining’mpeu nâu je mei, nune pe gu ka’ngguapeu je mei, nune ka’ngguapui je mei, nune pe gu getumsei je mei, pe gu hekunmerângne je mei, nune ning kining’mpeu gu mâ-mâ zat ge mei ze ’nchie mak ra lei,” kacheu de lei.

Baudime Hingbe

(Deu 5.22-33)

18Chunage tingcheibe benai tingkakepitbe ramme, zai hegeîluîkie kuâ zai kedeiloa hemika hiari bambe ramme ze ’ndaikau mei be ze baudime chî lu dadege â ziemmename hing ze kedun di de lei; zai penui sap’ndeutau bam de lei, 19zai Mosabe je, “Nang ne anui je ’mpau lau, dezai anui seu gu lei; kane Hera ne peize anui je ’mpau se lau, anui chai mak ra hangge zeu,” kacheu de lei. 20Zai Mosabe ne baudime je, “Hing se lau, ningnui je kedak ra zai ningnui masuage pechu kehingbe bam le ra dezai ningnui hemui tâ tew mak ra Hera â wangkeu daseu,” ze kacheu de lei.

21Mosabe ne Hera bambe bâm muîgitbe ge wang’nnadibe luage baudime â kedeu ’mbe sapbam de lei.

Herâtewbe-kaira Deu ge Hingde ramme

22Zai Tingwang ne Mosabe je, “Aigum ze Israelme je nang salia ra lei: ‘Tinggîm ’mbene ningnui je I ka’mpau de lei be ningnui mik ne ningnui ngau sing de lei. 23Ningnui dage bamrabe hangge gepût gu heraluî ramme ningnui tew gai mak ra lei, zai gechâk gu heraluî ramme ze du ningnui tew mak ra lei. 24Kedei ne tewbe herâtewbe-kaira a hangge nang tew gai ra lei, zai chige ning gu rûkambe-râtewbe benai desieyibe-râtewbe hangge ning gu meli benai getumsei peipat kai ra lei; a ji ze ’ngngaî mak ze chîbam ra I ne tewgaibe bâm leine ge ning dage I wang gu, zai ningchu ’nnam gai gu lei. 25Zai nang ne a hangge tingchu ne herâtewbe-kaira tew gai zai â chize tingchugialube ramme ne nang tew mak ra lei; chipau peireige ning gu kerua huachu gai zai â chize nang ne tewhebâ gai de lei. 26Zai ning dage pumlâng bambe luîtak ze teilia mak ra hangge a gu herâtewbe-kaira ’mbe desua gene nang chu mak ra lei,’ zeu.

Currently Selected:

EKSODAS 20: ZEMEBSI

Highlight

Copy