EKSODAS 22

Mâ-peiruîrabe Hingde-sie

1“Mige ne getumsei mei nune meli mei ze hega lu ze, chize tewchat mei nune zua mei dizai â pa ne getumsei kat hangge getumsei mengeu pei ra zai meli kat hangge meli medai pei ra lei. 2Pa ne hegalube mî ze ’nzua himchang ra lei; pe dage mâ de ga dizai â pa ne hega’ndibe mî ze tewpui ra hangge pechu zua ra de lei. Hegalube kaurui ze ring ze pe dage laleu zai â chize getumsei mei nune hekunmerângne mei nune meli mei zainedu pa ne dêt na ’nzua ra lei.

3“Kahegapeu tingmuî ne kilûng ge rigutbe lua ngaudau lu ze pechu lakchat ’ndizai â lakchatpeu peireige hejaipâu mâ de ga de lei; 4kane chize naimik pat ti dezainê dizai â, pa ze kegîpeu chang di de lei.

5“Mige ne pe gu kaurui ramme je helu gene mei nune grepchî merie gene mei ze deteu ra tew gai mei, chi acheu mak zainedu miramme lu ge pe gu perui je ’mpat kai mei dizai â pe lu meu rachî yilangbe benai pe gu grepchî merie gu perachî yilangbe ne ’nzua ra lei.

6“Hemi tauchu ze hetupat ramme gene helaktat ze chêu peria kuagaibe mei nune pebang sapbe mei nune helu luî rû ’ndi mei zai â hemituagaipeu ne pelane mî ’nzua kam ra lei.

7“Mige pe kining’mpeu dage pe gu rangkâng mei nune kerua mei ze reî ra pei gai bei ze, chipau ki gene miramme ne hega ’ndizai â zai chipau chângge kahegapeu je ngaudau lu zai â pa ne dêt na pei ra lei. 8Kahegapeu je peulak tizai â heki’mpaupeu ze Hera dage wang’nna ra lei, pe kining’mpeu gu merua pa ne kahega mei hega mak mei be teilia ra hangge zeu.

9“Mâ-mâ kadesutbe, getum, hekunmerângne, meli, zai paîni zai mâ-mâ tew’ngga’ndibe zat ramme peireige hangkat ne, ‘Aize a gu de lei’ kacheube tûrâ hangge bau na ne Hera masuage zuawang ra lei; Hera ne chau’ngkuigaibeipeu zene pe ramna’mpeu hangge dêt na ’nzua ra lei.

10“Mige pe kining’mpeu dage hekunmerângne mei, getumsei mei, meli mei nune mâkedadabe hekaune mei ze reî ra pei gai bei ze, mî de ngaumakbe gene chize chai di mei, hejam di mei, nune kumtua’ndi mei zai â 11pe kining’mpeu gu merua peireige petak sia gai mak run mei be chî ra Tingwang dage penai hangna kakge deseu ra lei; zai pa’mpaupeu ne deseugaibe ze lun ra lei, pa ne hega makchai â pa’mpaupeu zene ’nzuakie mak ra lei. 12Kane chize pa ne kahega zai â pa’mpaupeu dage pa ne peiruî dai ra lei. 13Chize hekaune ne tewchat ’ndizai â peize pa ne sakki teilia ra lei; hekaune ne tewchat’ndibe ze â pa peiruî ra ’nnang mak lei.

14“Mige ne pe kining’mpeu gu kaurui ’nteulêu lu ze, zai chize hejam di mei nune chai di mei lêuzai â zai pa’mpaupeu ze chige bamdau mak lêuzai â ka’nteupeu ne pemî pelane ’nzua ra lei. 15Pa’mpaupeu chige bam zai â pemî ’nzua mak ra lei; pemî pei ze ka’nteube kau zai â ka’nteube mî zene tewpui gai ’nde lei.

Mâ-besie yibe benai Mi râsie Lam gu Hingde ramme

16“Henâu hang ’mpaugaimakbe kau, heleu’mpui pumsanggeî kau je mige ne kiâmkau lu pechu ’nna gai ’ndizai â pe hangge henâu mî pa pei ra lei, zai chipaupui je pe nâu hang lu ra lei. 17Heleu’mpui peu ne pe nâu hangge pei gai ra lunmeu luisui dizai â pumsanggeî gu henâu mî ze rangkâng ne pei ra lei.

18“Heduaîtewchime (kabe kau) je â ring ra nang pei mak ra lei.

19“Hekaune je nguajeibe kau je â tewchat ra lei.

20“Tingwang je sâu ze kêdabe râ je herâtewbe peigaibe kau leine je â tew’ngga kam gai ra lei.

21“Hesang’mpeu heluîchâmbe kau je ketadau tew mak ra zai geted mak ra lei, ningnui leize ’ndâge Ijipram ge hesangme heluîchâmme gum bam gai daseu. 22Kemîpui benai ’nggiâne je ningnui tewhereu mak ra lei. 23Ningnui ne penui je tewhereu bei, zai penui ne achu kû’nrung dizai â I ne penui ka’nrungbe kuâ ’ngking gai sing gu lei; 24zai a lumpum-desang gu lei, zai hiazutkie ne ningnui je I ne bichat ku lei, dezai ningnui nâu ramme kemîpui chang gai gu lei, zai ningnui name ze ’nggiâne chang kam gu lei.

25“Ning dage a gu ziemmename kelaksiame ruage mi-mige dage nang rangkâng hepuk kai dezai, penui hangge nang â rangkâng hepukkaibe tâtewpeu gum bam mak ra lei, zai pe dagene peching nang lu mak ra lei. 26Peching ’nchunggaibe hangge ning kining’mpeu paîni ze nang ne luaklêu ’ndizai du, naimik kêu de makge pechu chize nang pei dai ra lei; 27pe puâ chize runne daseu, chize ne pe pum ge tapnambe paî daseu; ’ndaikau ne pa bâjei ra lau? Zai pa ne a dage kie gai dizai â I ne ’ngking gu lei, I â ngauka’nggiabe ne puibe kau daseu.

28“Hera je nang sa’nsia mak ra lei, zai ning zatme gu samrampeu je nang deset kai mak ra lei.

29“Ning gu chêu gekumwang puitingdibe gene benai ning gu grepchî merie gene lua’nniampatbe ze achu pei gai ra gîngtie mak ra lei.

“Ning na ’mpeumi ruage meraibe ze nang achu pei ra lei. 30Chipau luigum ze getumsei ramme benai meli ramme peireige du tew ra lei: hezie sena pe pui dage bam ra lei; padesatbe mai dezai â a dage chize nang pei gai ra lei.

31“Ningnui â a hangge diepat’nchigailume chang ra lei; chidaze herum mei ji ningnui â teu mak ra lei; chize hetei ramme hangge ningnui tuâpat kai ne ra lei.

Currently Selected:

EKSODAS 22: ZEMEBSI

Highlight

Copy