DANIEL 2
2
Heguang Nebukadnezzarbe Mang
1Nebukadnezzarbe kaheguangbe pakenabe tingkum ge Nebukadnezzarbe hemangka’mmi de lei; pelung hereu-desang di ze pa jeikeulak ze bam de lei. 2Chidadege heguang ne pe mang pechu ranglia ra heduaîtewchime, kahekame, zai gekungme, zai Kaldiame je kûwang ra sam pei bei de lei. Chidadege penui wang lu ze, heguang suage saplia de lei. 3Heguang ne penui je, “Hemang I ka’mmi lei, chi hemang rimba chîrabe hanggene a lung tewhereu ze bam de lei,” kacheu de lei. 4Dadege Kaldiame ne heguang je, “Hei heguang, betingbeta nang ring bam lau; ning gu kebangme je ning mang ze ranglia lau, dezai parimba ze anui ne ranglia bu lei,” ze acheu bei de lei. 5Kaldiame je heguang ne samkak te lei, “A dagene sam patbe ze â gesang de lei, hemang benai parimba ze ningnui ne achu rangliachi lak tizai â, ningnui je dimdesuirui ’ndu lei, zai ningnui ki du tew’nsia kam ’ndu lei. 6Kane hemang benai parimba ningnui ne teilia bei zai â, a dagene kela peipatbe benai getoabehi zai ningnui ngeu-tew’ndigaibe ningnui ngau gu lei; chidaze hemang benai parimba achu teilia lau,” ze kacheu de lei. 7Dadege heguang sam ze penui ne kak kadai de lei, acheu sa ze, “Heguang ne pe gu kebangme suage chi hemang ze peize ranglia lau, dezai parimba ze anui ne teilia gu lei,” ze acheu bei de lei. 8Heguang ne samkak kadai de lei, acheu sa ze, “Beting pehî tewka’ntiebe runne lei be I chîdesibi de lei; a dagene sam patbe ze â gesang lei be ningnui chî lei. 9Hemang ze ningnui ne achu teilia makchai â, sam kat runne lei; achu ningnui karasa sa ra, zai achu choa’nrui ra ningnui kateleu zeî lau; chidaze hemang ze achu ranglia lau, dezai pa rimba du ningnui rangliachi duî lei be I chî gu lei,” ze kacheu de lei. 10Dadege Kaldiame ne heguang je samkak te lei, acheu sa ze, “Heguang chineibe sam ze teilia ra, kedeirei ge hangkatte bam ra mak lei; heguangme, besuitewme, zai samramme, aigumbe tâ ze hepaudachakchime mei, nune lungkahekame mei nune Kaldiame je mei ze mâdauge du ’nneu mak lei. 11Zai heguang ne mâ-ka’nneube ze chuk-kadesangbe kau lei, ziemmena gum ze lungmakbe hera ramme ne teiliachi ra zangno, mige de bam ra mak lei,” ze penui ne acheu bei de lei.
12Chidadege â heguang pe râta-desang di, pe laîpat ti ze, Babilon ge ziemmena kaningchingme leine je tewchat kam ne ra samde tew gai bei de lei. 13Chidadege â samde ze peipat kai bei ze, ziemmena kaningchingme je tewchat ra chang di de lei; zai Danielbe benai pe kangme je du tewchat ra penui peu de lei.
Hera ne Danielbe je Hemang Bambe Tak ze Rangliabe
14Heguangki reîbe sipai gu besuitewpeu, Ari-okbe ne Babilon ge kaningchingme je tewchat ra pa zuapat te lei, zai Danielbe ne ningchingchi lu ze, 15heguangki reîbe sipai gu besuiteupeu Ari-okbe je, “’Ndaitew bei ze heguang dagene aigumbe samde kelua ze peipat ra chang lau?” ze samkak te lei. Zai Ari-okbe ne tâwangchangbe tak ze Danielbe je salia bei de lei. 16Dadege Danielbe gut lu ze heguang dage, parimba saliachi le ra beting peigaisî ra pa kiam de lei.
17Chidadege â Danielbe pe ki lam wang lu ze pe kangme, Hananiabe, Mishaelbe, zai Azariabe je salia de lei; 18Babilon ge kêdame ziemmena kaningchingme ruage Danielbe benai pe kangme je tewchat kai mak ra aipau hekimsam ze teilia ra tinggîm Rapeu dage ngau’nggia gai ra penui kie de lei. 19Chidadege â chi hekimsam ze chipau mai tingmuî ge Danielbe je keliâbe gene teilia bei de lei. Dadege tinggîm Rapeu je Danielbe toa de lei. 20Danielbe ne sa ze,
“Hera ji je betingbeta peize toa ze bam lau,
Tâtewchibe benai kaningchingbe ze pe gu daseu.
21Pehî benai beting ze pa ne tewkeli gai bei de lei;
heguangme je pa tei’mbia,
zai heguang je pa ne sum gai bei de lei;
kaningchingpeu dage kaningchingbe pa ne pei gai,
mâ-chipeu dage pa ne mâ-gechîbe pei gai bei de lei.
22Mâ-chukbe benai mâ-mâ bai’ndibe pa ne ralia bei lei,
kemuîbe ge bamdibe pa â chî lei,
zai kebabe pe dage la lei.
23Hei, anui paume Rapeu,
kaningchingbe benai tâtewchibe achu peipeu,
ning dage anui mâ-lunei ze kiebe chuna rangliapeu je a suiyibe sam pau gai ze ningchu I toa lei,
heguang deu ge nang ne a anui je rangliabeibe ziegeneu,”
ze kacheu de lei.
Danielbe ne Heguang Mang ze Ranglia ze Rangkeligaibe
24Chidadege heguang ne Babilon ge ziemmena kaningching leine je deî’ngga ra langgaibeipeu Ari-okbe tailam Danielbe tat ti de lei. Danielbe ne pechu, “Babilon ge kaningchingme je deî’ngga se lau; heguang dage achu nguagut kai lau, heguang je parimba I ne ranglia bu lei,” ze acheu bei de lei.
25Chidadege Ari-okbe ne Danielbe je kelua ze heguang bambe ge nguagut lu ze heguang je, “Juda kebangme ruage heguang mang rimba rangliachiduibe kau hangkat je I ngaudau lu de lei,” ze kacheu de lei. 26Heguang ne Danielbe pe ji, Belteshazzarbe kacheupeu je, “Hemang I ka’mmibe benai parimba ze achu nang rangliachi duî mei?” ze kacheu de lei. 27Danielbe ne heguang je samkak ze pechu, “Mâ-teibai’ndibe heguang ne chineibe ze ziemmena kaningchingme, lungkahekame, heduaî tewchime, zai hepaudachakme ne heguang je teiliachi lak lei; 28kane mâ-teibai’ndibe rangliarapeu, Hera â tinggîm ge la lei; dadege heguang Nebukadnezzarbe dage bechâng dezai ’ndaikau wangchang gu mei be ze pa ne teilia bei de lei. Nang jeibe luage hemang benai ning peî ge helung lam gene raliabe ramme ze ai lei; 29Hei heguang dilangpeu, ning jeî ge jei lu ze bechâng dezai ’ndaikau wangchang gu mei be nang ka’nningbe, hekimsam raliaka’nsuipeu ne bechâng dezai mâ-mâ wangchangrabe ningchu teilia de lei. 30Chunage miramme sua â I ningchingbibe ziegene ai hekimsam achu raliabe mak lei, kane heguang hanggene lei, ning lung ge nang ka’nningbe nang chî le ra hangge hemang rimba ze ranglia de lei.
31“Heguang gau, nang ngau de lei, zai pie le lau, mâ-luî pengêudibe laleu lei. Chi mâ-luî kedibe pa’mbi peling-ling ze ning suage saplaleu lei; zai peluî â mi ngauhingkube kau lei. 32Chi mâ-luî ze pe peî â gechâk yilangbe ne tew lei, zai pe ga benai pe ba ze â gepût lei, zai pe bungpui benai pe nie â kangngâgeî lei, 33zai pe pî kena â hegeî lei, zai pe pîdei â gêsa â hegeî, zai gêsa â hegamdei lei. 34Mâ-luî ze nang pie bambe luage tingchukâng heba lak mak ze kelatpat ze mâ-luî pî hegeî benai hegamdei ne tewbe gitâu bei de lei, zai tewpângdesuirui ’ndi de lei. 35Chidadege hegeî, hegamdei, kangngâgeî, gepût, zai gechâk ramme pângheruahiam ze pângdesuirui gai di de lei, zai tinglum ting ge gechaîpung ge chêuriepum je gum ze tingkai ne guitua ’ndi de lei, pebâm ze mâ de chita di de lei; kane mâ-luî gitâube chukâng ze kedeiloa kedibe gum ze chang gai di de lei, zai kedei pelane pui di de lei.
36“Aize hemang de lei; zai parimba heguang je anui salia gu lei. 37Hei heguang gau, nang â heguangme gu heguang lei, tinggîm Rapeu ne heguangram leine, zai tâtewchibe, lungchibe, zai pengêudibe ningchu pa ne pei gai bei de lei; 38chidadege kedeirei ge ziemmena bambe bâm leine ge, zai hekaune ramme benai ’nruine ramme ning ba ge pei gai de lei, penui ’nteumena peireige nang ne samram ze bam ra ningchu tew gai de lei. Gechâk peî ze nang de lei. 39Zai ning chaige kêdabe heguangram nang sua â cheibibe pat ku lei; zai kêdabe pakechumbe kangngâgeî gu heguangram ne kedeirei leine ge samram ze bam gu lei. 40Zai heguangram pamedaibe â hegeî gum ze bam gu lei; hegeî ne mâgetaleine tewpângdesuirui lu, mâ tâ tew lu gum ze, zai hegeî ne mâgetaleine tewpâng lu gum ze keraîbe heguangram leine pa ne niakdesuirui ’ndu lei. 41Zai pe pî benai pe pîkêrang ramme gêsa â hegamdei zai gesa â hegeî sing lei be nang ngau de lei. Chize hegamdei benai hegeî pângdesuiruidibe gum ze heguangram ze ’nzipâng ’ndu lei. Kane hegeî benai hegamdei kakebutbe ziegene hegeî gu kechibe la lei. 42Zai pe pîkêrang gêsa â hegeî zai gêsa â hegamdei changbe luigum ze heguangram ze gêsa â peranchi gu zai gêsa â peran-ga gu lei. 43Zai hegeî benai hegamdei ka’nchiapbe kaikakebutbe ’ngkaimakbe nang ngaube gum ze, ziemmena zat gechâmbe je nguakelaktew gu lei, kane hegeî benai hegamdei hekau mak gum ze ’ngkai ra mak lei. 44Chipau heguangram ramme heguangtewbe ting ge tinggîm Rapeu ne heguangram sum gai gu lei, chize mâtew-tewsedu ga dai ra mak lei, zai pa kaheguangbe ze du miramme hangge ’mbamdiak kai ra mak lei; kane chipau heguangram leine tewpângdesuirui lu ze tew’ngga kam ’ndu lei, dezai betingbeta sapbam gu lei; 45kedeiloa gene ziemmena ba ne dei mak ze tingchukâng kelatpat ze, hegeî, kangngâgeî, hegamdei, gepût, zai gechâk tewpângdesuiruigaibe nang ngaube gum ze, Hera ngeudibe ze heguang je bechâng dezai mâ-mâ wangchangrabe ralia de lei; zai hemang ze gesangsing de lei, zai parimba rangliabe du tâusing de lei,” ze acheu bei de lei.
Heguang ne Danielbe je Getoabehi peibe
46Chidadege Heguang Nebukadnezzarbe kei’ngkumkeu lu ze, Danielbe je kakellum de lei, zai kela benai taudui perîmyibe pei ra samde tew gai bei de lei. 47Heguang ne Danielbe je samkak ze “Ai mâ-hekimsam teibai’ndibe nang rangliachilube ze, ning Rapeu â hera ramme gu Hera, zai heguangme gu Tingwang, mâ-teibai’ndibe hekimsam rangliapeu sing de lei,” ze pa kacheu de lei. 48Chidadege heguang ne Danielbe je pe tâbâm tei’ntuachu gai de lei, zai kela pengêudibe ramme misongga ze pei gai de lei. Zai Babilon ge heram ramme leine ge pa ne besuitewpeu chang ra, zai Babilon ge kaningchingme leine peireige besuitewpeu hang sum gai bei de lei. 49Zai Danielbe ne kiebe sam pheu gai ze heguang ne Shadrakbe, Meshakbe, zai Abednego je Babilon heram ge besuitewme hangge sum gai bei de lei, zai Danielbe â heguang gu samrambe bâm ge bam di de lei.
Currently Selected:
DANIEL 2: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
