DANIEL 1
1
DANIELBE BENAI PE KANGME RASAM
(1.1—6.28)
Heguang Nebukadnezzarbe Ki ge Rehangme Hangchum bambe
1Judaram heguang Jehoiakimbe ne heguang changbe pakechumbe kum ge Babilon gu heguang Nebukadnezzarbe ne Jerusalem guagut lu ze, namdi ze tuaguâ ’ndi de lei. 2Judaram ge heguang Jehoiakimbe je nîm ra, zai kellumki gu merua du gêsa lu ra Tingwang ne pei bei de lei. Dadege pa ne nîmlume je Shinarram ’mbe teitat ze pe gu heraki ge nguagut kai ’ndi de lei, zai merua ramme â pe gu heraki gu merua ramme kaibeki ge kai ’ndi de lei. 3Zai Nebukadnezzarbe ne Israelme chaname ruage rehangme, heguang kiria zai ziemmena keyime kiria gene piakeume je kelângwang ra, pe gu kahetiâpeu, Ashpenazbe je rang gai bei de lei. 4Rehangme heziâkgame, rehangyime, kaningchingbe ’mpuî leine ge mâ-’nningchibe kau, zai mâ-gechîbe lam ge ningching-hîngbe kau, zai mâ-gechîbe lam ge chika’ndingbe kau, zai heguangki ge mâ-’ngguachiduibe kau, zai Kaldiame lad ne rawchi zai geteiliachiduibe kau je teiwang ra rang gai bei de lei. 5Dadege nai’nsangne heguang hetak zai wain pa tensakbe gene penui je pei ra samdie gai bei de lei; chigum ze penui ze kum chum getei lu dezai heguang suage penui saplia ra lei. 6Zai aime Judame chaname ruagene, Danielbe, Hananiabe, Mishaelbe zai Azariabe lei: 7Kahetiâpeu ne penui ji hangge, Danielbe je Belteshazzarbe, ze ku lei, zai Hananiabe je Shadrakbe, zai Mishaelbe je Meshak, zai Azariabe je Abednego ze ’ntak kai lei.
8Kane Danielbe â pe lung ge heguang gu hetak benai wain sakbe ne pe runne pechu tewhebâ mak ra ’nningzun lu ze bam lei; chidadege kahetiâme ruage pemuitewpeu dage pa kiam de lei. 9Chidadege Danielbe peireige besuitewpeu kahetiâpeu ne ’nchâ ra, zai ngauka’nggiabe pe lung ge bam ra Hera ne tew gai bei de lei. 10Zai kahetiâme ruage besuitewpeu ne Danielbe je, “Ningnui teu ra, zai sak ra ranggaipeu, a wangpeu, a gu heguang je I hing lei; ningnui sua kahename bau sua â ning luî siabidibe ngaupat tizai â, heguang ne a peî dângtua ’ndu lei,” ze kacheu de lei. 11Chidadege kahetiâme ruage besuitewpeu ne Danielbe, Hananiabe, Mishaelbe, zai Azariabe je reî ra sumgaipeu je Danielbe ne, 12“Ningchu I kiam lei, ning gu kebangme je hezie kereu riâ ’nchet le lau, anui teu ra gineureu gi benai anui sak ra hedui runne anui je pei lau. 13Zai ning suage heguang gu hetak teuyibe teume, heluîhebuâne benai anui lui piekeda le lau, dezai nang ne kengaube luigum ze ning gu kebangme peireige tâtew gai be lau,” ze acheu bei de lei. 14Chidadege aipau sam ze hezie kereune pie ra pa pheu gai de lei. 15Zai hezie kam gai dege heguang gu hetak teuyibe ne teume heluîhebuâne rehangme leine suadu penui luî yi, zai penui pumsak du yibi di de lei. 16Chidadege kereîpeu ne heguang ne peibe hetak pei mak ze gireuneu gi ne pei ze bam de lei.
17Chidadege rehangme hangmedai je mâ-gechîbe ge zai leisi tâ lam ge benai kaningchingbe lam ge mâ-’nningchibe Hera ne penui je pei bei de lei. 18Zai heguang ne penui je nguagutrabe naimikpui diegaibe nâlangbe mai wangchang dege, kahetiâme ruage besuitewpeu ne penui je Nebukadnezzarbe suage nguawang de lei. 19Heguang ne penui ’nteumena je sam ’nneutâu kam gai de lei; penui ruage, Danielbe, Hananiabe, Mishaelbe, zai Azariabe gumbe kau mî de ga lei, chidadege heguang suage penui sap te lei. 20Mâ-’nningchibe benai kaningchingbe deu lam leine ge heguang ne sam’nneugaibe ge pe gu heram lungge heduaîtewchime zai lungkahekame leine suadu dêt kereu yi’ngkeudibe pa chî lu de lei. 21Zai Danielbe â heguang Sirabe ne kaheguangbe kum kat riâ chang ze tâ’nggua bam lei.
Currently Selected:
DANIEL 1: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
