DANIEL 3
3
Gechâk gu Mâ-luî je Haimena Kellum ra Nebukadnezzarbe ne Samdiegaibe
1Heguang Nebukadnezzarbe ne mâ-luî, pehut ge sâu riakseruk zai pedit ge sâu seruk gechâk ne tew gai de lei. Chize Babilon ge Dura kâm ge sum gai de lei. 2Zai heguang Nebukadnezzarbe ne heguangme, laksaibe ramme, samramme, rangkâng reîme, laddeitewme, heram gu tâ-muipuame je mâ-luîtewbe sum gai lu ze diepat’nchi gai ra kûwang’ndui gai de lei. 3Chidadege heguangme, laksaibe ramme, besuitewme, samramme, rangkâng reîme, laddeitewme, zai heram ge tâ-muipuame leine Nebukadnezzarbe ne mâ-luî sumgaibe diepat’nchi gai ra hang mâ-luî sumgaibe suage penui sap te lei. 4Zai mâ-saruapeu ne pe rankai sa ze, “Hei pedeime leine, hezat leine, zai helad leine gau, 5mâkie ramme benai ’nrazube ramme, ’nrabung, zai ’nsum, ’ntoî, zai bekuâpatbe zat leine kuâ seu dezai Nebukadnezzarbe gu gechâk ne mâ-luîtewbe sumgaibe suage ’ngkumkeu lu kellum kam ra ningnui je samdie gai de lei. 6Mi-mige de ’ngkumkeu lu kellummakme je â penua-nuage hemihûn rûlualube ge tuâgut kai gu lei,” ze sa gai de lei. 7Chidadege ziemmena ’nteumena chipau hî ge mâkie, metiam, ’nrabung, sâkbut, zai ’nsum, ’ntoî, ’nra bekuâ seuyibe leine kuâ ze seugap lu dege heramzatme leine, hezat leine, zai helad leine ze Nebukadnezzarbe ne mâ-luî sumgaibe suage ’ngkumkeu lu ze penui kakellum de lei.
Danielbe Kangme Hangchum je Hekuapheumakbe hang ’Ndamgaibe
8Zai chipau luage Kaldiame ruage hanggesame wang lu ze Judame je kesiatewbe hangge chau gai de lei. 9Heguang Nebukadnezzarbe je, “Hei heguang dilangpeu, betingbeta peize ring bam lau. 10Hei heguang dilangpeu nang ne samde peipat kai ze, ‘Mi-mige de mâkie, metiam, ’nra, sâkbut, ’nrazube zai ’nsum, ’ntoî, kuâ seu dezai ’ngkumkeu lu ze gechâk ne mâ-luîtewbe je kellum kam ra lei; 11mi-mige de ’ngkumkeu lu ze kellummakme leine je â, hemihûn rûlualube ge tuâ gai ra lei,’ ze nang ne samde tew gai de lei. 12Judame hanggesame Babilonram ge kesa-kerangtew ra nang ne sumgaime, Shadrak, Meshak, zai Abednego la lei. Hei heguang gau, aime bau ne ning gu samdiegaibe ze mâ-hangge du ’nning gai mak lei; ning gu heram ramme guâ ’nggua mak, zai gechâk ne mâ-luîtewbe je penui kellum mak lei,” ze penui ne pau gai bei de lei.
13Dadege Nebukadnezzarbe pe râtalappat ze, pe lumpum ne, Shadrak, Meshak, zai Abednego je pe dage teiwang ra samdie gai de lei. Zai aime bau je heguang suage nguawang de lei. 14Nebukadnezzarbe ne penui je, “Hei Shadrak, Meshak, Abednego, aize gesang mei? A rapeu guâ ’nggua mak, zai a gu gechâk ne mâ-luîtewgaibe je ningnui kellum mak ra mei? 15Chidadege mâkie, metiam, ’nrazube, sâkbut, ’nrabung, zai ’nsum, ’ntoî kuâ ningnui seugap dezai ningnui ’ngkumkeu ze a gu mâ-luîtewbe je ningnui kellum ra lei; kane ningnui ne kellum makchai â, pa’nnua-nua ge rûluachiduibe hemihûnki ge ningnui je tuâgut kai bu lei; a ba gene ningnui je ’nripatchiduibe hera la mei?” ze kacheu de lei. 16Shadrak, Meshak, zai Abednego ne samkak ze, heguang je, “Hei Nebukadnezzar, aipau samkak ra hejeu peu bam dai ra ’nnang ta de lei. 17Anui Rapeu anui ne pe guâ ’nggua ze bampeu ne rûluachiduibe hemihûnki gene anui je ’nripatchi duî lei, zai pa ne ning ba gene anui je ripat kai gu lei. 18Chi acheu mak lêuzai du, Hei heguang, ning rapeu guâ â ’nggua ra mak lei, zai gechâk ne mâ-luî tew lu ze sumgaibe je anui â kellum ra mak lei be nang chî le lau,” ze acheu bei de lei.
Danielbe Kangme Hangchum je Tewchat ra Tewbe
19Dadege Nebukadnezzarbe pe lumpum-desang di ze, Shadrak, Meshak. Zai Abednego peireige pe mâ-giê bam di de lei; rûluachiduibe hemi tewbe ted ze dêt sena hemitew gai ra rang gai bei de lei. 20Zai pe gu hereikangme ruage peranchime ne Shadrak, Meshak, zai Abednego je pi ra, zai rûluachiduibe hemihûnki ge penui je tuâ gai ra samdie gai bei de lei. 21Dadege aime bau je, penui gu mechua, zai pelung mechua, zai penui peichûp zai penui paî kêdadabe ramme bambe luî pi lu ze, rûluachiduibe hemihûnki ge penui je tuâ gai de lei. 22Chidadege heguang gu samde peibe ze kelua ze tew sing ra changbe ziegene, zai rûluachiduibe hemihûnki ge hemi lumbe ted teu-kadesangbe ziegene, Shadrak, Meshak, zai Abednego je puame je hemi ne rûchat kam ’ndi de lei. 23Zai aime hangchum, Shadrak, Meshak, zai Abednego ze â pilube luî rûluachiduibe hemihûnki zuilung ge tuâ bam de lei. 24Chidadege heguang Nebukadnezzarbe ningdaulak bam de lei, keluakkelet chu lu ze pechu laddeitewme je, “Ziemmena hangchum je pi lu hemi zuilung ge tuâ gai mak ti lau?” ze kacheu de lei. Penui ne heguang je samkak ze, “Hei heguang, gesang de lei,” ze kak lei. 25Pa ne kak ze, “Pie le lau, ziemmena hangmedai penui je pi mak ze hemizuilung ge tatrua la lei, zai penui je mâ de tew’nteu mak ze bambe I ngau lei, zai pamedaipeu luî â Hera na luigum lei,” ze kacheu de lei.
Ziemmena Hangchum je Lupat lu Penui Tâ Tei’ntuachugaibe
26Dadege rûluachiduibe hemihûnki kemui ’mbe Nebukadnezzarbe wang lu ze, “Shadrak, Meshak, zai Abednego, Hulangbe Hera gu tâka’ngguame gau, zuapat chu lau, ailia wang lau,” ze acheu ku de lei. Chidadege Shadrak, Meshak, Abednego ze hemi gene penui zuapat ti de lei. 27Dadege hereikang saibe ramme leine, saibe ramme, laksaibe ramme, zai heguang gu laddeitewme wang’ndui lu ze, hemi ne penui pum mâ de rû mak, zai penui peîtam du rû’ngkuairip kai mak, zai penui gu mechuatiebe du rû mak zai hemi rîm du mâ de nam mak ze bambe ngau de lei. 28Dadege Nebukadnezzarbe ne acheu sa ze, “Shadrak, Meshak, Abednego, Rapeu, pa ne pe gu angelme je lang gai ze, pe guâ ka’ngguame pechu ’nnumka’mmime je meupatkaipeu, zai heguang gu samde ze peruânggabe hang tew gai nan ze, zai penui Rapeu mak ze kêdabe hera je kellum zai ’nggua ra sua â, penui pum peipatrau mak ra tewgaipeu je peize toa lau. 29Chidaze pezatme leine, pedeime leine, zai helad gechâm-châmbe ne samsame, Shadrak, Meshak, zai Abednego Rapeu je saka’nsiame leine je â, dimdesuirui ’ndu lei, zai pe ki ze tew’nsia kam ’ndu lei, aipau samde ze I ne tew gai de lei. Aigum ze meupatchiduibe Hera kêdabe mâ de ga daseu,” ze kacheu de lei. 30Chidadege heguang ne Shadrak, Meshak zai Abednego je Babilonram ge penui tâbâm tei’ntuachu gai bei de lei.
Currently Selected:
DANIEL 3: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
