EZEKIEL 48
48
Heram Ka’nzibe
1“Aime ze pezat ji lei: Tingpeî ’mbia gu heramrai â Mediterranean sungkling gene Hethlon tatpela ze Hamath gutbe chuak ge Damaska ramrai Hamath hia tingpeî ’mbia Hazar-enon chang ze tingbia gene tingrun chang ze Danme zat hang lei. 2Danme ramrai gene ’nti ze tingbia gene tingrun chang ze hedam kat ze Asherme hang lei. 3Aize Asherme heramrai gene ’nti ze tingbia gene tingrun chang ze hedam kat ze Naphtalime hang lei. 4Naphtali gu heramrai gene ’nti ze tingbia gene tingrun chang ze hedam kat ze Manasseme hang lei. 5Manasseme gu heramrai gene tingbia gene tingrun chang ze hedam kat ze Ephraimme hang lei. 6Ephraimme gu heramrai gene ’nti ze tingbia gene tingrun chang ze hedam kat â Reubenme hang lei. 7Reubenme gu heramrai gene tingbia gene tingrun ’ntichang ze hedam kat ze Judame hang lei.
Heram Zuilung ge Lupatchâmcheîgaibe Bâm
8“Juda ramrai gene ’nti ze tingbia gene tingrun changbe ze ’ngkeune ze lupatchâmcheîgaibe hedam chang ra lei. Chize sâu chang ’ngkai ze mengeu pedit-petâ ’nsamrap ra lei, tingbia gene tingrun chang zeu, zai pe zuilung ge kellumki ka’nchibe bam ra lei. 9Zai heram ’nsakkaibe ze Tingwang dage ningnui diepatchâmgaibe heram ze petâ sâu chang ’ngkai ze mengeu, zai pedit ge sâu chang ’ngkai ra lei. 10Aize tingkume dam hangge diepat’nchigaibe chang ra lei, chize tingpeî ’mbia sâu chang ’ngkai ze mengeu ra lei, zai tingrun ’mbia sâu chang kereu ra lei. Zai tingbia ’mbia sâu chang kereu ra, zai tingpî ’mbia sâu chang ’ngkai ze mengeu ra lei. Zai sûngngang zui ze Tingwang gu pebâm ka’nchibe bâm chang ra lei. 11Aize â tew’ntiplume tingkume hang lei, Zadokbe name a kuâ lu ze teime hang lei. Israel chaname tatlietattibe ting ge Lebibe kiria lietattibe gum tatlietatmakme hang lei. 12Zai ’ngkeune ze heram penui hangge diepatchâmgaibe kedei Lebime gu herai taige ’nchilangbe bâm ze penui hang chang gu lei. 13Tingkume gu heramrai gene katlam ’mbia Lebime ne petâ sâu chang ’ngkai ze mengeu zai pedit sâu chang kereu kedei bâm ngau gu lei. 14Chize penui sâu ra mak, zai hiak du hiak ra mak lei; zai heram yibe bâm ze du miramme je pei ra mak lei; chize Tingwang hangge ka’nchibe chang daseu.
15“Zai pedit sâu chang ’ngkai ze mengeu peireige sâu chang mengeu â namdi ge lungme dam, ’nteu taudeu hang lei, chize hekipung bâm hang, keloa-depeu hang, zai sûngngang zui ze â keloa bâm hang chang ra lei. 16Zai ’ndeurabe tak ze â, aigum ra lei: Tingpeî ’mbia sâu chang medai ze haî mengeu, zai tingpî ’mbia sâu chang medai ze haî mengeu, zai tingbia ’mbia sâu chang medai ze haî mengeu, zai tingrun ’mbia sâu chang medai ze haî mengeu ra lei. 17Zai namdi ge keloa gu ’nduloa bam ra lei: Tingpeî ’mbia sâu haî na ze rengeu, tingpî ’mbia sâu haî na ze rengeu, tingbia ’mbia sâu haî na ze rengeu, tingrun ’mbia sâu haî na ze rengeu ra lei. 18Zai kedei bâm ka’nchibe bâm hiage pebâm ka’nsakbe bâm tâluî tingbia ’mbia petâ sâu chang kereu, zai tingrun ’mbia sâu chang kereu ra lei. Chi ka’nchibe kedei bâm je teidabe ge bam ra lei, chigene tewpatbe rachî ze namdi ge tâtewme hetak hang chang ra lei. 19Israelme zat leine namdi ge tâ’nggua ze bamme ne chige tâtew-teu ra lei. 20Diepat’nchigaibe bâm pelane pedit-petâ namdi gu kedei bâm kai’mpam gai ze sâu chang ’ngkai ze mengeu, pedit-petâ ’nsamrap ra lei.
21“Zai ka’nchibe kedei bâm ’nsakpatbe benai namdi gu kedei ze heguang dam hang chang ra lei, zai tingbia ’mbia heram ’nsakkaibe ze sâu chang ’ngkai ze mengeu, zai tingrun ’mbia sâu chang ’ngkai ze mengeu genei bepeirei ge ’nsakkaibe ze heguangme dam hang chang ra lei; chidadege ka’nchibe kedei bâm zui ge kellumki bambe ze, 22Lebime zat benai namdi hang hedam peigaibe â heguang gu heram zuilung ge bam ra lei, heguang gu hedam ze â Judabe gu heram benai Benjamin gu heram kakge bam ra lei.
Kêdame Zat hangge Heram
23“Heram ngaumakme hangge aigum lei: Tingbia gene tingrun chang ze heram bâm kat ze Benjamin dam hang lei. 24Zai Benjamin gu hedam gene herai ze tingbia gene tingrun chang ze hedam kat ze Simeonbe dam hang lei. 25Zai Simeonbe gu heramrai gene tingbia gene tingrun chang ze hedam kat ze Issakarbe hang lei. 26Issakar gu heramrai gene tingbia gene tingrun chang ze hedam kat ze Zebulun hang lei. 27Zai Zebulun gu heramrai gene tingbia gene tingrun chang ze hedam kat ze Gadbe hang lei. 28Zai Gadram gene tingrun ’mbia heramrai ze Tamar gene Meribath-kades geuki chang ze Ijipram geuki gene ’ntikeu ze Mediterranean sungkling ze heramrai chang ra lei. 29Aize Israel zatme ne heram ngaurabe hedam ’nzirabe tak benai penui dam hang lei.
Jerusalem Keriekemui ramme
(Kel 21.12,13)
30“Aize namdi gu keriekemui ramme lei: Tingpeî ’mbia sâu chang medai ze haî mengeu ge, 31Keriekemui kechum bam ra lei, Reubenbe gu keriekemui, Judabe gu keriekemui, Lebibe gu keriekemui, Israel zatme ji gene namdi gu keriekemui ji hang ’ntak kai zeu. 32Zai tingbia ’mbia sâu chang medai ze haî mengeu ge keriekemui kechum bam ra lei, Josepbe gu keriekemui, Benjamin gu keriekemui, zai Dan gu keriekemui bam ra lei. 33Zai tingpî ’mbia sâu chang medai ze haî mengeu ge keriekemui kechum bam ra lei, Simeonbe gu keriekemui, Issakarbe gu keriekemui, zai Zebulunbe gu keriekemui bam ra lei. 34Zai tingrun ’mbia ge sâu chang medai ze haî mengeu ge keriekemui kechum bam ra lei, Gadbe gu keriekemui, Asherbe gu keriekemui, zai Naphtalibe gu keriekemui bam ra lei. 35Zai namdi ze ’ndeuguâ gai dege sâu chang kereu ze desat lei, chipau mai gene seuze namdi ji hangge, Chige Tingwang la lei,” ze kacheube zene ra de lei.
Currently Selected:
EZEKIEL 48: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
