TÂTEWBE 27
27
Paulbe Rom ’mbe ’Nnei gene Tatbe
1Anui hangge Italiram ’mbe tat ra sam kam gai bei dege, Paulbe benai kebangki ge bangme hanggesame je Rom sipaime ruage sipai haîmuiteipeu Juliasbe ba ge pei gai bei de lei. 2Zai Adramittiam gu ’nnei, Asiaram sungkling kung ge ’nnei saugaibe keloa ramme tatrabe ge anui chua gai lu tat te lei; zai Makedoniaram’mpeu, Aristarkabe, Thessalonika ge bambepeu du anui dage kangzangtew ze bam lei. 3Zai bechai mai dege Sidon tat kai lei; zai Juliasbe ne Paulbe je ngau’nggia ze tinggeuzun bei lei, zai pe kangme ruage deki gai ze penui ne pechu ’nningtinggeugai-hâ ra pa ne pei bei de lei. 4Zai chigene sungkling ’mbe anui gut dai ze tingkai ne anui je gui-kedetbeibe ziegene Sipra duiluaka’ngguabe heram tingkai deîtau mak ’mbe anui tat ti de lei. 5Zai Kilikia benai Pamphilia sungkling tat’ntua dege Likia ge Mira anui wangchang de lei. 6Chigene sipai haîmuiteipeu ne Alekzandria gene Itali ’mbe tatrabe ’nnei ngaudau lu ze, chige anui je du teichu gai bei de lei. 7Zai hezie daikiene mei ze, kuai-kuaine ’nnei chaîtat ze hereu-desang ze Nida anui wangchang de lei, zai tingkai ne anui je nambeibe ziegene Salmoni tat kai ze, Kret duiluaka’nggua tingkai deîtau mak ’mbe anui tat te lei. 8Zai sungkling kunghia ’nnei chaîhereu-desang tat ze, “’Nnei Desau-bâm Peluiyibe,” kacheube ge anui wangchang de lei. Zai chipau hiage Lasia namdi la lei.
9Beting misongga tat ti zai teseurei ze bambe ’ntuatattibe ziegene ’nnei ze kehingbe ne chaîtatchi ta di de lei, Paulbe ne penui je mâ-rangliagai ze, 10“Mi paume ramme gau, chuna ’nnei anui tatbe ge tewka’nsiabe benai kagekumbe wangchang gu, merua ramme benai ’nnei hang runne makse, kane anui keringbe du kehingbe dau ra la lei be I chî lei,” ze kacheu de lei. 11Kane sipai haîmuiteipeu â Paulbe sam ge sua â, ’nnei muiteipeu benai ’nnei ’mpaupeu kuâ deze pa ’nnumka’mmi lei. 12Zai hetating bam ra hang chi ’nnei desau-bâm yi mak dadege ziemmena gekieme sungkling ge gut ze ’ndaigum mei leusede Phoeniki tatchang dui zai a tatchang ra nei de lei. Aize Kret duiluaka’nggua ge tingpeî-tingbia benai tingpî-tingbia ’mbe pema puaka ’nsuabe ’nnei desau bam lei.
Sungkling ge Tingkaichibe Guibe
13Zai tingpî ’mbia gu tingkai kuai-kuai ne gui bei dege penui ka’nningbe luî ngauchang lu de lei, ze ’nnum gai lu ze ’nneikaguak ze lupat lu ze, Kret duiluaka’nggua luî ’nnei chaîpat te lei. 14Kane mâtiegemakse tingkai kechibe pe ji, Tingpeî naimik pat ’mbe kau, (Eurokuilo) kacheube ze kedei ’mbene wang ze gui de lei. 15Zai tingkai ne ’nnei ze nupgetie bei dege ’nnei chaîtatchi lak ti de lei. Chidadege ’nnei ze tingkai ne pe sui-sui guitat ra anui sâu gai bei de lei. 16Zai Kauda duiluaka’ngguabe poine ge tingkai deîtaumakbe bâm ’mbe anui tatchang dege, hereu-sang-hereu ze, ’nneipoine ze teigim de lei. 17Zai chi ’nneipoine ze penui ne lupat dege heria ramme tei lu ’nnei dibe kang ’mbe keri gai ze kebitguâ gai ze pi gai lei. Zai Deseî (Surtis) ge tat kai di ta ra hingbe ziegene kaguak ze lupat nan dege ’nnei ze tingkai ne guitat ti de lei. 18Zai tingkaichibe ne anui je gui’nrui-getie bei dege ’nnei ge merua ramme bambe ze sungkling ge tuâ gai de lei. 19Zai Pakechumbe mai dege ’nneikaguak ze du penui ba ne hedui ge tuâ gai ’ndi de lei. 20Zai naimik benai hegi ramme ngautadibe beting tie di, zai tingkaichibe anui je gui ka’nruibe kecheîne makse anui je tew’nring gai ra kaheguîbe ze ga kam di de lei.
21Zai penui tak teu mak ze beting tiesangge bamhang dege, Paulbe ne penui suage sap lu ze, “Azangme gau, a kuâpheu ze Kret duiluaka’nggua tat’ntua mak laîzaine â, ai kagekumbe benai tewka’nsiabe dau ra mak te lei. 22Sede chunage ningnui du helungdi ze bam ra I kiam lei, ’nnei runne ga gu, kane ningnui ruage â hangkatte ga ra mak lei. 23Chi Hera pe gu ziemmena I chang, zai pechu I kellum ze bambepeu gu tinggîm angel’mpeu a hiage sap lu ze, 24achu, ‘Paulbe gau, hing se lau, Kaisarbe suage nang sap sing gu lei; zai pie le lau, Hera ne nang benai ’nnei ge ningchu nguatatme leine je du ning dage pei gai de lei,’ kacheu de lei. 25Chidaze azangme gau, ningnui lungdi ze bam lau, Hera je I ’nnum’mmi lei, achu rangbe luigum ze hedautit ku lei. 26Kane ’ndaibe duiluaka’ngguabe ge mei ze anui wangchang gu lei,” kacheu de lei.
27Zai tingmuî kereu ze medai chang dege, Adria sungkling ge tingkai ne anui je gui’nruigetiebeibe luage, muisum ge ’nnei kakereime ne kedei ’mbe chang ra na di de lei ze penui ’nnum gai de lei. 28Chidadege hedui ’ndai chukge di mei be chî ra hangge ka’ndeu de lei, zai kap ’ngkai hangge ’nnum gai lei, zai mâtiege makse ’ndeu kadai de lei, kap kereu ze mengeu hangge ’nnum gai lei. 29Zai tingchukâng ramme peireige gi gai ra hingbe ziegene ’nneikaguak medai hedui sîng ge tuâ gai lei. Zai tingbapat ra penui kakellum de lei. 30Zai ’nnei kakereime bau ze ’nnei sua ’mbe ’nneikaguak tuâgaibe helîtew ze ’nneipoine sungkling ge tuâkeu gai lu ze penui pak te ra kaheka de lei. 31Zai Paulbe ne sipai haîmuiteipeu benai sipaime je, “Aime bau ze ’nnei ge penui bam bam makchai â ningnui je tew’nringgaichi lak ku lei,” ze acheu bei de lei. 32Chidadege sipaime ne ’nneipoine keîbe ria ramme gettap lu ze hedui ge tuâkeu gai ’ndi lei.
33Zai tingbazi gu dadege Paulbe ne ’nteumena je tak teu ra hang kiâm ze, “Nemai ze mâ de teu mak ze gîng bambe hezie kereu ze medai changdibe mai de lei, ze acheu zeu. 34Chidaze mâ-teu ra ningnui je I lang lei, ningnui ring ra hangge zeu, ningnui peî gene du hetamkie katte ga ra mak lei,” kacheu de lei. 35Zai aipau sam sa gai lu dege tingku lu lu, haimena suagene Hera dage pe suiyibe sam pau gai lu ze, tiapângpat ze teuchu de lei. 36Zai penui lung tew’ndi lu ze, penui runne teseu ze teu di de lei. 37Zai ’nnei ge anui bamme leine haî na ze riaksena ze seruk lei. 38Zai penui teu’nggeu lu dege, ’nnei ze tew’nchabi ne ra hang dekuîmeu ze sungkling ge tuâ gai kam ’ndi lei.
’Nnei Tew’nsiakam’ndibe
39Zai naimikpat dege, kedei bâm â penui chî mak, kane ’nggeumui benai heduisungkitbe ngau lu ze, chang dui zai â chige ’nnei ze teitat ra penui kaheka de lei. 40Dadege ’nneikaguak keîbe ria ramme gettap lu ze sungkling lungge kaguak ramme ’mpatkeu gai ’ndi lei, zai chipau luage ’nnei-tauri pibe du heihelui gai lu ze, zai besua ’mbe paîlîmbe ze du tingkai guitaurabe riâ ge chakchu gai lu, hedui-sungkit ’mbe penui zua lei. 41Kane deseîloa ge gut kai dau lu, ’nnei ze kedei deîtau di de lei, chidadege â ’nneimui ze â ’ngngai ta di ze tuaktit kai di ze ’ngngai ta di de lei, kane ’nnei chai ’mbia â, heduiteleu peranchibe ne hia-pângchu di de lei. 42Zai sipaime bau ne kebangki ge bamme je tewchat kam ne ra hangge ’nning gai lei, acheu makchai â, hezaikelap kapat ze penui pak tu lei. 43Kane sipai haîmuiteipeu ne Paulbe je tew’nringgaineibe ziegene penui ka’nningbe ze lun mak tai lei. Hedui kelapchime â sungkling ge kêu gai ze ’nneigiam ’mbe zakkapat ra, 44zai kêdame â hechingpi peirei gene mei, nu hechingpakpi gene mei ze chua lu ze kapat ra samdie gai bei de lei. Chigum ze penui ’nteumena yize kapat kam lu de lei.
Currently Selected:
TÂTEWBE 27: ZEMEBSI
Highlight
Share
Compare
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
