TÂTEWBE 26
26
Agrippabe suage Paulbe Pe runne pechu Gube
1Agrippabe ne Paulbe je, “Ning runne ning rasam sa ra lun de lei,” ze acheu bei de lei. Dadege Paulbe pe ba getuapat lu ze, acheu ze pechu sagube sam sa de lei: 2“Heguang Agrippa gau, Judame ne a peireige kesia’ndamgaibe ramme deu ge nemai ge ning masuage achu sagube sam sa ra I ngau lu ze, a runne ne I a paurega lei ze I ’nning gai lei. 3Nang â Judame gu kelungbe-sietak benai getube bambe ramme leine ze chîkadesibe ziegene a sam lie gai ze ’ngking’mmi gai ra ningchu I kiam lei.
4“I hena’ngka gene a zatme ruage benai Jerusalem ge I kebambe tak ze bepîbang gene Judame ’nteumena ne chî kam de lei. 5Penui ne ranglia nei zai â, bepîbang gene penui ne achu chî kam lei, anui gu râsie ge hingde reichilangbe kiangna lungge Pharisai’mpeu chang ze bam de lei be zeu. 6Zai chunage anui peume dage Hera ne samhatkai’ndibe ze I kaheguîbe ziegene aige achu kedak kai be ra I sap kai lei, 7zai chi samhatkaibe hangge anui zat, zat kereu ze kename ne tewpui gai ra heguî ze, kemuî-keba penui rankai ze kellum ze bambe zeu. Hei Heguang gau, aipau kaheguîbe deu hangge Judame ne achu kesia’ndam gai ze bam de lei! 8Hera ne kechaime je zuchu gai dai bei ze ’ndaitew ze ningnui ’nnum’mmichilakbe hang ’nning gai lau?
9“I a runne Nazareth’mpeu Isua ji je mâgetaleine ge ’nggi ze bam ra a lung deîtaube bam de lei. 10Chigum tew ze Jerusalem ge I bam de lei; zai tingkugechîngme dagene rezie lu lu ze ziemmena ka’nchime hanggesame je kebangki ge banggaibe runne makse, kane penui je tewchatkaibe ge I du hesuî-hezuâ gai ze bam de lei. 11Zai ka’nduibeki leine ge I ne penui je deîhereu’nsui ze, Isua je sahebâ ra tew gai de lei; zai penui peireige a râta-’nteu nan ze heram kêdabe ge ’nsangnedu penui je I ne tewsâ de lei.
Paulbe ne Pe lungkahelibe Rasam Saliabe
(Tât 9.1-19; 22.6-16)
12“Chigum ze tingkugechîngme dagene rezie benai penui ne langgaibe leisi tei lu Damaska keloa ’mbe I tat te lei. 13Heguang gau, ’mpuî ge I tatbe luage, tîngna’nding hî ge tinggîm ’mbene naimik sua reba ze kebabe ’mbi a hiage benai achu nguatebeîtewme hiage bambe I ngau de lei. 14Zai anui ’nteumena kedei ge kâukeu kam gai dege, Hebrai lad ne, ‘Saul, Saul, ’ndaitew ze nang achu tewsâ lau? Hetu ge ’nsuigairabe â, ning runne ningchu tewkahejam lei,’ ze achu kacheube kuâ I seu de lei. 15Dadege I ne ‘Heguang gau, nang châu lau?’ kacheu de lei. Dadege Heguang ne, ‘I Isua nang ne tewsâ ze bambepeu de lei. 16Kane zuachu lu ning pî ne sap kai lau; I ne ningchu liabe ze â, nang ne achu ngaulube ge benai I ne ningchu liâgairabe ge tâ’nggua ra ningchu sum gai ra, zai sakkitewrabe hang, 17chi châu dage tat ra I ne ningchu lang gai mei, chime dagene benai Jentailme dagene ningchu ripat kai bei ze, 18penui je peize kemuîbe gene kebabe ge ’nreiwang ra, zai Satan gu tâtewchibe rezie gene Hera dage ’nreiwang ra dezai peize penui je hemui kelunbe ngau ze, zai I gene keneibe ne tew’nchigaibeime ruage pebâm ngau le ra, aipau deu hanggene de lei,’ ze kacheu de lei.
Paulbe ne Pa Tâtewbe Rasam Raliabe
19“Chige ze heguang Agrippabe gau, tinggîm gu keliâbe ge I ne pheu mak ze bam me lei, 20kane raîlangbe ge Damaska ge bamme dage ranglia gai de lei, chipau chângge Jerusalem ge, zai Judiaram leine ge, zai Jentailme dage du liâ gai de lei, dezai peize penui lung heli lu Hera lam ’nreiwang dai ze penui lung helidibe luigum ze tâtew ra hangge zeu. 21Aipau deu hangge Judame ne achu kellumki gene nîm lu, achu tewchat ra kaheka de lei. 22Nemai riâ chang ze Hera dage ka’ngngâbe I ngau lu de lei, chigum ze aige gechîngme benai kedime suage sap ze sam salia ze bam de lei, kemeume benai Mosabe ne mâ-wangchangrabe sam saliabe runne I sa zangno, mâkedabe sam I sa me lei: 23chidaze Krista â hereulie himchang ra, zai chaidime ruagene ringchukadaibe railangpeu chang ze anui zatme dage benai Jentailme dage du kebabe paulîa gu lei be ze lei,” ze acheu zeu.
24Zai Chigum ze pe runne pechu sagube sam sa gai lu dege, Phestabe ne pe rankai ’nrung ze, “Paulbe, nang mie di de lei; nang mâ-geteika’ngkiebe zene ningchu tewmie ’nde lei,” kacheu de lei. 25Kane Paulbe ne, “Festabe yilangpeu gau, I mie me lei, kane pelingsingbe I sa lei. 26Airamme heguang ne chî kam la lei, zai pe dage hing mak ze I sam sa lei; airamme leine ze â katte pa chimakbe ga lei be I ’nnum’mmi lei; airamme mâ-mik gene tâtewbe mak daseu. 27Heguang Agrippa gau, kemeume je nang ’nnum’mmi mei? Nang ’nnum’mmi lei be I chî lei,” ze acheu bei de lei. 28Dadege Agrippabe ne Paulbe je, “Beting keduîne kakgene achu Kristian teigut kai ra nang ’nning zeu!” kacheu de lei. 29Dadege Paulbe ne “Beting tie zai dui zai nang runne mak ze, kane nemai ge a kuâ seume leine ne du ai hegeiria ramme hang â makze, kane I gum chang kam ra Hera dagene I lunei de lei,” ze kacheu de lei.
30Chidadege heguang, zai laksaibe, zai Bernikele, zai penui ruage ka’ntaume leine zuachu de lei; 31dadege tat ra zuapat ti dege, penui karai kat-kat je, “Aipaupeu â pa chaikezeirabe mei nune bangkezeirabe hang mei mâ de tew gai me lei,” ze kacheu de lei. 32Zai Agrippabe ne Phestabe je, “Aipaupeu ne Kaisarbe dage tat ra kie mak laîzai â, pechu ’mpat kai le duî de lei,” kacheu de lei.
Currently Selected:
TÂTEWBE 26: ZEMEBSI
Highlight
Share
Compare
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
