TÂTEWBE 25
25
Paulbe ne Heguang Dilangpeu suage Sap ra Kiegutbe
1Chunage Phestabe pa samrambe heram ge wangchang lu, hezie kechumne châng dege Kaisaria gene Jerusalem ’mbe pa hang di de lei. 2Dadege tingkugechîngme benai Judame ruage besuitewme ramme Paulbe siabe rasam pechu pau gai de lei; zai penui ne pechu getu gai ze, 3’mpuîki gene pechu lîmkua lu tewchat ra penui heka ze peize chipaupeu je Jerusalem ’mbe lang gai ra pechu kiâm de lei. 4Kane Phestabe ne penui je, Paulbe je â kebangki ge reîgit ze lamui lei, zai I du mâtiege makse Kaisaria ’mbe tat ra ka’nning lei. 5Chidaze, “Ningnui ruage ziemmena pecheuchime je peize achu nguakeu lau, zai chige pa ne tâumakbe bam zai â peize penui ne pechu kesiachau gai ra hangge zeu,” ze pa kacheu de lei.
6Phestabe penui ruage hezie desatne mei, hezie kereune mei suadu kie ze pa bam gai lu ze, Kaisaria ’mbe wangkeu de lei; zai bechai mai dege samrambe bâm ge pa ’ntau lu ze Paulbe je nguapat kai ra hang samdie gai bei de lei. 7Zai pa wang dege Jerusalem gene tattime ne pechu sap’mpuî-plui lu ze penui ne du ’nningchilakbe mâ-mâ gechukbe sam ramme ne pechu kechingka’nrui de lei. 8Paulbe pe runne ne pechu sagu ze, “I â Judame gu hingde peireige du zai kellumki peireige du zai Kaisarbe peireige du kesiabe mâ de tew me lei,” ze kacheu de lei. 9Kane Phestabe Judame suitew’mmi nei dege Paulbe je, “Jerusalem ’mbe nang hang nei mei, chigene aipau deu ramme a suagene hekî dai ra hangge zeu?” ze kacheu de lei. 10Kane Paulbe ne, “Kaisarbe gu samrambe bâm, a tûdeu hekî gai ra yibe bâm ge I sa la lei; nang ne chî’mmi ze bambe gum ze I ne Judame hangge kesiabe tâ mâ de tew gai me lei. 11I ne tâtewmaube kau chang ze, chairabe hang tâtew gai ’ndizai â kechai’nreipat ra I peu me lei; kane a peireige aime bau ne kesia’ndamgaibe ge mâ-peling peupat lak zai â, mi-mige ne achu penui ba ge peigaichi lak lei. Kaisarbe dage I ne kiam lei,” kacheu de lei. 12Chidadege Phestabe ne pe gu samrambeki ge bamme dage ’mpauhelak lu dege acheu kak ze, “Kaisarbe dage nang ne kiam de lei; Kaisarbe tailam nang tat ra lei,” ze kacheu de lei.
Agrippabe benai Bernikile suage Paulbe Sapbe
13Chunage bechâng bamkenak kai dege, heguang Agrippabe benai Bernikele Phestabe je ’nchâ ze ngauhedau gai ra zuamiechang de lei. 14Zai chige hezie misongga ze bam gai dadege Phestabe ne heguang suage Paulbe tûdeu sachu ze, “Mige hangkat bang’ndibe kau, Phelikbe ne sâudiakkaipeu la lei; 15zai Jerusalem ge I bam lage tingkugechîngme benai gechîngme ne a dage pe rasam chîchang gai ze, pechu chai ra samram gai ra a dage penui kie lei. 16I ne penui je kak ze, Romme gu hingde ge pe peireige kesia’ndamgaipeu ze pechu kesia’ndamgaime je heju ne heju hedau gai ze, pe peireige kesia’ndamgaibe sam ramme ze pechu sagube sam sa ra pedâuyibe pei mak tâne â, mige ne pechu kesia’ndamgaibe luî ze tew’ngkuigaichi lak lei ze, acheu bei de lei. 17Chipauziegene penui aige wang’ndui gai dege, I ne a mintie mak ze bechai mai ge samrambe bâm ge ’ntau gai lu chipaupeu je nguagut ra die gai bei de lei. 18Kesiachaugaime ramme zuachu gai dege pe tûdeu ge penui ne mâ-mâ-kesiabe ramme sapat kai ra mi ’nnumgaibe ramme ze â sapat suadu mak lei; 19kane penui ne pe dage tube ze â, penui râsie gu mâ gechukbe deu lam ge, zai chaidipeu, chi Isua kacheupeu deu gene de lei, kane Paulbe ne rangliasinggaibe tak ge â pa ze chai me lei, kacheupeu zeu. 20Chidadege I airamme tedeu ge râm ra chî ta di ze, Jerusalem namdi gene airamme hekî ra hang nei gu mei ze Paulbe je I ’nneu gai de lei. 21Kane Paulbe ne heguang dilangpeu dagene samram gai be ra kie bei dege, chize ne pechu Kaisarbe tailam ’mpat kai ra chang mak tâne â, pechu hekêt kai ze bam ra hangge I ne die gai bei de lei,” kacheu de lei. 22Dadege Agrippabe ne Phestabe je, “I du chipaupeu ne samsabe ’ngking gai nei bam de lei,” acheu bei de lei. Phestabe ne. “’Nchuamai dezai nang pe sam seutâu gu lei,” ze kacheu de lei.
23Bechaibe mai dege â, Agrippa benai Bernikele ze paîni pengêudibe kai lu ze, baudime ka’nduibeki ge sipaime changmuiteime benai namdi ge kanguame besuitewme je ngua lu ze gut ti de lei. Chige Paulbe je teigut ra Phestabe ne die gai bei de lei. 24Zai Phestabe ne, “Heguang Agrippabe benai chuna aige bamme gau, aige ningnui ngaupeu deu ge Judame leine ne Jerusalem ge benai aige bamme ne peize pa ring ta de ra hangge ’nrung ze a dage kiewang de lei. 25Chaikezeirabe tâ pa ne mâ de tâtew gai me lei be I ngaupat lei; zai pa ne heguang dilangpeu dage kiambe luigum ze pa tat ra I ne pechu lun gai ra ’nning gai de lei. 26Kane pe tûdeu rasam pa’nchui singbe bâm â heguangdilangpeu dage I raw gai ra mâ de ga lei. Chidaze pechu ningnui suage benai nang heguang Agrippa suage I nguapat kai de lei, pechu sam kedî kam dezai, mâ sam rawrabe I chîpat le ra hangge zeu. 27Bang’ndibe kau je pa tewmaube ’nchuisingbe mâ de teilia’nchi mak ze langgairabe ze â a hangge betâu mak ra chang gu dadegeu,” kacheu de lei.
Currently Selected:
TÂTEWBE 25: ZEMEBSI
Highlight
Share
Compare
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
