Loma Ko e Talateu
Ko e Talateu
Ko e Tohi meia Paula ki he Kakai Lomá naʻe hiki ia ko hono teuteu ʻe Paula ʻene ʻaʻahi ki he Siasi ʻi Lomá. Ko ʻene taumuʻá ke kiʻi ngāue fuonounou mo e kau Kalisitiane ʻi aí, pea toki hoko atu ai ki Sipeini ʻi haʻanau tokoni kiate ia. Ko ʻene tohi kiate kinautolú ke fakamahino ʻa e anga ʻo ʻene fakakaukau ki he lotu faka-Kalisitiané pea mo hono ngāueʻi ʻi he moʻui ʻa e kau Kalisitiané. ʻOku hā ʻi he tohí ni ʻa e fakamatala kakato taha ʻa Paula ki heʻene tuí.
ʻOku kamataʻaki ʻa e tohí ʻa ʻene fakafeʻiloaki ki he kakai ʻo e Siasi ʻi Lomá mo ʻene fakahā ange ʻene faʻa hūfia kinautolu, peá ne hoko atu ai ki heʻene fokotuʻu ʻa e kaveinga ʻo ʻene tohí: “He ʻoku fakaeʻa… ha māʻoniʻoni mei he ʻOtuá, ʻoku kamata mei he tuí, pea iku ki he tuí.” (Vahe 1:17)
Pea toki fakahoko fakakongokonga leva ʻe Paula ʻa e kaveinga ko iá. Ko e faʻahinga kotoa pē ʻo e tangatá, ʻa e kakai Siú pea mo e Senitailé, kuo pau ke fakalelei kinautolu mo e ʻOtuá, he ʻoku nau moʻulaloa tatau kotoa ki he angahalá. ʻOku fakalelei kotoa mo e ʻOtuá ʻaki ʻenau tui kia Sīsū Kalaisi. ʻOku hoko atu ai ʻa e fakamatala ʻa Paula ki he moʻui foʻou ʻoku maʻu ʻi he feohi mo Kalaisi, ʻa ia ʻoku tupu mei he fekauʻaki foʻou ko ʻeni mo e ʻOtuá. ʻOku maʻu ʻe he toko taha tui ʻa e melino mo e ʻOtuá pea ʻoku veteange ia ʻe he Laumālie ʻo e ʻOtuá mei he pule ʻa e angahala mo e mate. ʻI he vahe 5-8 ʻoku Māʻoniʻoni ʻi he moʻui ʻa e tokotaha ʻoku tuí. ʻOku hoko atu ai ʻa e fakamatala ʻa Paula ki heʻene feinga ke tali ʻa e fehuʻi fihi pe ko e hā ʻa e taki taha tuʻunga ʻo e kakai Siú mo e kakai Senitailé ʻi he fokotuʻutuʻu ʻa e ʻOtuá ki he faʻahinga fakasituʻaʻi ʻe he kakai Siú ʻa Sīsuú ko e konga ia ʻo e fokotuʻutuʻu ʻa e ʻOtuá ke tānaki kotoa mai ʻa e faʻahinga ʻo e tangata ko hono fakaaʻu atu kiate kinautolu ʻa e Kelesi ʻa e ʻOtuá ʻia Sīsū, pea ko ʻene tuí ʻe ʻikai fakasituaʻi ʻe he kakai Siú ʻa Sīsū ʻo taʻengata. Ko e konga fakaʻosi ʻo e tohi ʻa Paula ko ʻene fakamatala ki he tonu ʻo hono moʻui ʻaki e tui faka-Kalisiané pea tau tefito ki he tuʻunga ʻo e ʻofá ʻi he fetuʻutaki mo e kakai kehé. ʻOkú ne lave ai ki he ngaahi kaveinga ʻo hangē ko e faifatongia maʻá e ʻOtuá, mo e fatongia ʻo e Kalisitiané ki he puleʻanga mo e kakai kehé, pea mo e tuʻunga ʻo e konisēnisi ʻi he moʻui faka-Kalisitiané. ʻOkú ne tātuku ʻaki ʻene tohí ha ngahai pōpoaki ʻofa mo ha fakamālō ki he ʻOtuá.
Ko e Kakano ʻo e Tohi Ko e talateu mo e kaveinga 1:1-17
Ko e pau ke fakalelei ʻa e tangatá mo e ʻOtuá 3:21-4:25
Ko e anga ʻo e fai fakamoʻui ʻa e ʻOtuá 3:21-4:25
Ko e moʻui foʻou ʻia Kalaisi 5:1-8:39
Ko e tuʻunga ʻo ʻIsileli ʻi he fokotuʻutuʻu ʻa e ʻOtuá 9:1-11:36
Ko e ʻulungāanga faka-Kalisitiané 12:1-15:13
Ko e tātuku mo e ngaahi pōpoaki ʻofa ʻa Paula 15:14-16:27
Currently Selected:
Loma Ko e Talateu: TCNT
Highlight
Share
Compare
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.