Loma 1
1
Ko e Fakafe‘iloaki
1Si‘i kāinga Loma,
Ko au Paula ‘oku ou tohi atú ni. Ko e tamaio‘eiki au ‘a Sīsū Kalaisi. Pea na‘e ui au ‘e he ‘Otuá ke u ‘apōsitolo, ke tāfataha ‘eku mo‘uí ki hono malanga‘i ‘ene ongoongo leleí. 2Ko e ongoongo-lelei ia na‘e tala‘ofa‘aki mai mei fuoloa ‘e he kau palōfitá ‘i he ngaahi folofola tapu ‘a e ‘Otuá. 3-4Ko e Ongoongo Lelei ia ‘o kau ki hono ‘Aló, ki hotau ‘Eiki ko Sīsū Kalaisí, ‘a ē na‘e tupu tangata he hako ‘o Tēvitá, ka na‘e hanga ‘e he Laumālie Mā‘oni‘oní ‘o mātu‘aki fakamahino ko e ‘Alo ia ‘o e ‘Otuá ‘i hono fokotu‘u ia mei he pekiá.
5Na‘e ‘alo‘ofa mai ‘a e ‘Otuá ‘ia Sīsū Kalaisi ‘o fakanofo ‘apōsitolo au, hei‘ilo ‘e lāngilangi‘ia ‘a e ‘Otuá ‘i ha tafoki ‘a ha ni‘ihi he fonua kotoa pē ‘o talangofua mo tui kiate ia, 6‘o kau ai mo kimoutolu ‘i Lomá na kuo ui ‘e he ‘Otuá ke mou kau mo Sīsū Kalaisí.
7Ko e ‘ofa lahi kuo fai ‘e he ‘Otuá ma‘amoutolú. He na‘á ne ui kimoutolu kotoa pē ke mou hoko ko ‘ene kakai tonu.
Tauange ke mou ‘inasi ai pē he ‘ofa ‘āufuatō mo e tāpuaki ‘a e ‘Otua ko ‘etau Tamaí pea mo hotau ‘Eiki ko Sīsū Kalaisí.
Ko e Lotu Fakafeta‘i ‘a Paula
8‘Uluakí, ‘oku ou fie fai ha fakafeta‘i ki he ‘Otuá ‘i he huafa ‘o Sīsū Kalaisí koe‘uhí ko kimoutolu hono kotoa. He kuo ‘iloa ho‘omou tuí he tapa kotoa ‘o māmani. 9Pea ‘oku ‘afio‘i ‘e he ‘Otuá ‘eku hūfia ma‘u pē kimoutolú mo ‘eku fai tōtōivi ma‘u pē hoku fatongia ki ai ko ‘eku malanga‘i ‘a e ongoongolelei ‘o hono ‘Aló.
10‘Oku ou kole ma‘u pē ki he ‘Otuá ke ne faka‘atā ange mu‘a hoku halá kae fei mo lava ha‘aku ‘a‘ahi atu kiate kimoutolu, ‘o kapau ko hono finangaló ia. 11‘Oku ou fie fe‘iloaki ‘aupito mo kimoutolu. He ‘oku ou loto ke mou ma‘u ‘inasi mei he ngaahi tāpuaki kuo faka‘inasi ‘aki aú, hei‘ilo na‘a kaukaua ange ai ho‘omou tuí. 12Ko ‘eku ‘uhingá, kāinga, hei‘ilo na‘a fepoupouaki ho‘omou tuí mo ‘eku tuí.
13Ko hono mo‘oní, na‘e tu‘o lahi ‘eku teu ‘a‘ahi atú, ka na‘e felei pē hoku halá ‘o a‘u ki he ‘ahó ni. Ka ko ‘eku faka‘amú ke ‘aonga atu ‘eku ngāué kiate kimoutolu hena, ‘o hangē pē ko ‘ene ‘aonga he ngaahi feitu‘u kehé. 14He ko hoku fatongiá ke malanga‘i ‘a e ongoongoleleí ki he kakai kotoa pē, ki he kakai sivilaisé mo e kakai kei fakapo‘ulí, ki he kakai fakapotopotó mo e kakai fakavalevalé. 15Pea ‘oku tupunga ai pē ‘a e māfana hoku lotó ke ‘a‘ahi atu kiate kimoutolu ‘oku nofo ‘i Lomá na.
Ko e Ivi ‘o e Ongoongoleleí
16‘Oku ‘ikai ha‘aku tāla‘a he ongoongoleleí! He ko e ivi ia ‘o e ‘Otuá ki hono fakahaofi ‘o e kakai kotoa pē ‘oku tui, ‘o mu‘omu‘a ki he kakai Siú, pea toki hoko atu ai ki he kakai kehé. 17Ko e ongoongoleleí, ko hono fakahaa‘i mai ia kiate kitautolu ko e me‘a pē ‘oku lava ke vālelei ai ‘a e ‘Otuá mo ha taha, ko e tuí, ko e tuí pē taha. He ko e lau foki ē ‘a e Folofolá, “‘Ilonga ha taha ‘e vālelei mo e ‘Otuá koe‘uhí ko ‘ene tuí, ‘e mo‘ui.”
Ko e Halaia ‘a e Kakai Kotoa pē
18Kuo fakahā mai ‘e he ‘Otuá mei he langí ‘ene houhau lahi ki he kakai kotoa pē ‘oku nau fai ‘a e ngaahi tō‘onga ‘oku ‘ikai ke hoa mo hono finangaló. Ko e kakai ia kuo ‘osi mahino lelei kiate kinautolu ‘a e mo‘oní, ka nau lolomi pē. 19He kuo nau ‘osi ‘ilo lelei ‘a e ngaahi nāunau‘ia ‘ilongofua ‘o e ‘Otuá. He ko ia pē foki na‘á ne fakahā kātoa ia kiate kinautolú.
20‘Oku ‘ikai ke lava ke te mamata ki he ‘Otuá. Ka ‘oku faka‘ilo mai pē ‘e he ‘Otuá ia ‘i he ngaahi me‘a kuó ne fakatupú. Kuo talu e tu‘u ‘a māmani mo e mahu‘ingamālie ‘a e ‘i ai ‘a e ‘Otuá, pea ko e ‘Otua ia ‘oku ta‘e fakangatangata hono iví. ‘Oku mahino lelei ia ki he kakai ‘oku nau fai ‘a e ngaahi tō‘onga ‘oku ‘ikai ke hoa mo e finangalo ‘o e ‘Otuá. He ‘oku hā ia ‘i he ngaahi me‘a kuó ne fakatupú. Pea ‘oku ‘ikai leva ha tafa‘aki ke kalo hake ki ai ‘a e kakai ko iá! 21Neongo kuo nau ‘ilo ‘a e ‘Otuá, ka ‘oku ‘ikai te nau toka‘i ia ‘o ngali ko e ‘Otua, pe te nau fakamalo kiate ia. Ko ‘enau fakakaukaú ko e koto fehālaaki, pea ko honau ‘atamaí ko e koto fakapo‘uli. 22‘Oku nau pehē ‘e kinautolu ‘oku nau poto, kae ‘osi angé ‘oku nau vale. 23‘Oku ‘ikai te nau fie lotu ki he ‘Otua ta‘e ‘auhá, kae lotu ki he ngaahi tamapua ‘otua ‘oku popo ngofua, ki he manupuna, mo e manu-ve‘efā, mo e manu totolo.
24Pea na‘e tuku ange ai ‘e he ‘Otuá ke nau fai atu ā honau lotó. Pea talu mei ai mo ‘enau mo‘ui ‘aki ‘a e ngaahi holi kovi ‘a honau kakanó. Pea nau fai ‘aki honau sinó ‘a e ngaahi me‘a fakamā.
25Kuo nau fetongi ‘a e ‘ilo mo‘oni ki ‘Otuá ‘aki ha loi. Kuo nau lotu mo tauhi ki ha ngaahi me‘a na‘e toki fakatupu pē kae tuku e Fakatupú, ‘a e ‘Otuá ‘oku taau ke fakahīkihiki‘i ma‘u ai pē. ‘Ēmeni
26‘Io, ko e me‘a ‘i he tō‘onga mo‘ui ‘a e kakai ko iá, na‘e tuku ange ai ‘e he ‘Otuá ke fai atu ā ‘enau ngaahi holi koví. ‘Oku ‘i ai ‘a e kakai fefine ‘iate kinautolu kuo nau lolomi ‘enau tokanga ki he tangatá, ‘a ē na‘e fakatupu mo kinautolú, kae feholikovi‘aki ‘iate kinautolu pē. 27Pea pehē pē ki he kakai tangata ‘e ni‘ihi ‘iate kinautolu, kuo nau lolomi ‘enau tokanga ki he fefiné, kae feholikovi‘aki ‘iate kinautolu pē. Ko e kakai ia ‘oku nau fai ‘a e fa‘ahinga nonofo ‘oku fakamā, ‘a e nonofo ‘a e tangata mo e tangata. Pea talu ai mo ‘enau kai ‘a e nunu‘a ‘oku tuha mo ‘enau fehālaakí.
28‘I he hala ‘aupito ha fie toka‘i ‘e he kakai ko iá ‘a e ‘Otuá, na‘á ne tuku ange kinautolu ke nau ‘atamai fulikivanu ai ā. Pea ko e tupu‘anga ia ‘o ‘enau anga-fakalieliá. 29Kuo tofu e pangó ‘i he mo‘ui ‘a e kakai ko iá. ‘A e kākaá mo e mānumanú, mo e fakalieliá. ‘A e fakameheká, mo e fakapoó, mo e fekainakí. ‘A e ngutu loí mo e loto-koví. 30Ko e kau ngutu lau kinautolu mo fasitu‘u. Ko e kau fakafili ki he ‘Otuá, mo fieme‘a. Ko e kakai kinautolu kuo fonu he ‘ulupupulá mo e fielahí mo e fie‘eikí. Ko e kakai ta‘e mangoi kinautolu, mo talangata‘a ki he‘enau mātu‘á. 31Ko e kau fakavalevale, alealoi, ta‘e‘ofa mo ta‘e faka‘atu‘i. 32‘Oku nau ‘ilo lelei ko e tuha ‘o e fai me‘a peheé ko e mate, he kuo faka‘ilo mai ia ‘e he ‘Otuá. Ka nau vilitaki ai pē. Pea ‘ai aí mo ‘enau toe holi ke faka‘ai‘ai honau ngaahi kaungāfonongá ke fai pehē mo kinautolú.
Currently Selected:
Loma 1: TCNT
Highlight
Share
Compare
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
