Ngāue 28

1Na‘a mau kakau ki ‘uta, tā ko e motu ko Mēlita. 2Pea na‘e ‘ofa ‘iate kimautolu ‘a e kakai ‘o e motú, ‘o nau talitali lelei kimautolu ‘aki ‘enau tafu afi ma‘amautolu. He kuo kamata ‘uha pea ko e ‘aho momoko. 3Na‘e kumi fefie ‘a Paula. Pea lolotonga ‘ene laku e fefié ki he afí kuo ‘oho mai mei ai ha ngata, koe‘uhí ko e vela ‘a e afí, ‘o u‘u he nima ‘o Paulá. 4Pea sio atu e kakai ‘o e motú ‘oku tautau e ngatá he nima ‘o Paulá, pea nau pehē, “Tā ko e sianá ni ko e tangata tāmate! Na‘e hao he melemó ka ‘e ‘ikai ke hao ia he tautea ‘a hotau ‘otua fefiné.” 5Kae tupe‘i pē ‘e Paula e ngatá, ‘o homo ki he loto afí kuo ‘ikai ha ongo ‘e taha ki hono sinó ‘a e u‘u ‘a e ngatá. 6Ka ko e ‘amanaki ‘a e kakai ‘o e motú ‘e fefulofulai e sino ‘o Paulá, pe ‘e fakafokifā pē kuo tō ki lalo ‘o mate. Pea fuoloa, fuoloa mo e ‘ikai ha me‘a pehē ‘e hoko, pea talu ai pē ‘enau pehē, “Tā ko e tangatá ni ia ko e ‘otua!”

7Ko e ‘eiki ‘o e motú, ko e tangata ko Pōpiliō. Pea na‘e ‘i ai hono ‘api na‘e ofi mai ki he feitu‘u na‘a mau ‘i aí. Na‘e fakaafe‘i ‘e Pōpiliō kimautolu ki hono ‘apí ‘o mau nofo ai he ‘aho ‘e tolu. 8Na‘e puke ‘a e tamai ‘a Pōpilioó ‘i he mofí mo e fakalelé. Pea hū atu ‘a Paula ki he loki na‘e tokoto aí ‘a e tamai ‘a Pōpilioó ‘o hilifaki hono nimá ki ai, pea sai ai hono puké.

9Pea ko e me‘a na‘e hokó, na‘e omi kotoa kia Paula ‘a e kau mahamahaki ‘o e motú, pea na‘e fakamo‘ui kinautolu.

10Na‘a nau foaki mai ma‘amautolu ha ‘ū me‘a‘ofa lahi. Pea hoko ‘emau teu folaú, pea nau ‘ohifo ki vaka e ngaahi me‘a kotoa na‘a mau fie ma‘u ki he‘emau folaú.

Ko e Folau mei Mēlita ki Lomá

11Na‘e hili ha māhina ‘e tolu mei ai, pea mau tuku folau atu ‘i he vaka na‘e fakauū ‘i Mēlita kae ‘oua kuo mahili atu e fa‘ahi ta‘u momokó. Ko e vaka ‘Alekisānitia, na‘e fakahingoa ki he ongo māhanga ‘otua, ko Kasitoa mo Pōlaki. 12Pea faifaí pea mau tau ki Sulakusa, ‘o mau ‘aho ‘e tolu ai, 13pea mau folau ai ki Lēsio. Pea ko e ‘aho hono hokó kuo kamata angi faka-tonga mai e matangí, pea ‘osi pē e ‘aho ‘e ua kuo mau tau ki he kolo ko Piuteolai, 14‘o mau fetaulaki ai mo ha ni‘ihi na‘e tui kia Sīsū.

Na‘a nau fakaafe‘i kimautolu ke mau nofo mo kinautolu. Pea ‘osi pē ha uike ‘e taha mei ai pea mau mavahe atu ki Loma. 15Ko e fa‘ahinga ‘i Loma na‘e tui kia Sīsuú, na‘a nau a‘u ange pē ki he ongo kolo ko Māketi-‘o-‘Apisai mo Fale-Talifononga-Tolu hono tali kimautolu. Pea ko e vakai atu pē ‘a Paula kiate kinautolú, kuo māfana hono lotó ‘o ne fakamālō ki he ‘Otuá.

Ko e Nofo ‘a Paula ‘i Lomá

16Na‘a mau a‘u atu leva ki Loma. Pea na‘e faka‘atā ke nofo toko taha pē ‘a Paula ‘i ha fale mavahe mo hono le‘ó.

17Na‘e ‘osi ha ‘aho ‘e tolu mei ai, pea pōpoaki ‘a Paula ki he kau taki ‘e ni‘ihi ‘o e kakai Siu ‘i Lomá ke nau omi. Peá ne tala ange kiate kinautolu,

“Kāinga, kuo te‘eki ai tu‘o taha te u fai ha me‘a ke lavea ai hotau kakaí. Pea kuo te‘eki ai te u fakafepaki‘i e ngaahi ‘ulungāanga kuo tukufakaholo mai mei he‘etau ngaahi kuí. Ka na‘e puke pōpula au ‘i Selusalema ‘o tuku ange ki he kau Lomá. 18Pea vakai‘i ‘e he kau Lomá ‘a e ngaahi me‘a na‘e tukuaki‘i ai aú, pea nau loto ke vete ange au, ko ‘enau fakapapau‘i na‘e ‘ikai ha‘aku me‘a ‘e fai ‘e tuha ke tautea tāmate‘i ai au. 19Ka na‘e ‘ikai ke hoa ia mo e loto ‘o e kau taki ‘o e kakai Siú. Peá u kole ke u hopo ā ‘i he fakamāu‘anga ‘o Sisá.

Ka ‘oku ‘ikai ha me‘a te u tukuaki‘i ai e kakai na‘á ku tupu aí. 20Ko hono ha‘i sēini ko eni ‘o‘okú, koe‘uhí ko e toko taha ‘oku tu‘u ai e ‘amanaki ‘a kitautolu e kakai ‘Isilelí. ‘Oku tu‘unga pē ‘i he‘eku ‘amanaki ko iá ‘eku kole atu ke mou omi ke tau pōtalanoa ko ení.”

21Pea nau pehē ange, “Kuo te‘eki ai ke tohi mai ha taha mei Siutea ‘o kau kiate koe, pe ‘e ha‘u mei ai ha taha mo ha ongoongo pe ko ha fakamatala ‘e kau kovi kiate koe. 22Ka ‘oku mau fie fanongo ki ha‘o fakamatala. He kuo mau fanongo foki ‘i hono fakafepaki‘i he feitu‘u kotoa pē ‘a e kāinga lotu ‘okú ke kau ki aí.”

23Na‘a nau fakapapau‘i leva mo Paula ‘a e ‘aho ke nau toe fe‘iloaki ai mo iá. Pea na‘e omi e tokolahi ki he fale na‘á ne nofo aí, ‘o ne fakamatala ange kiate kinautolu e Pule‘anga ‘o e ‘Otuá, mo ne feinga ke nau tui kia Sīsū ‘aki ‘a e ngaahi fakamo‘oni mei he Tohi Lao ‘a Mōsesé mo e ngaahi tohi ‘a e kau palōfitá.

24Na‘e tui e kau taki ‘e ni‘ihi ki he fakamatala ‘a Paulá, kae ta‘e tui e ni‘ihi. 25Pea nau mātuku atu kuo ‘ikai ke nau loto-tahá.

Na‘e tala ange ‘e Paula kiate kinautolu, “‘Oku mo‘oni pē ‘a e folofola ‘a e Laumālie Mā‘oni‘oní, ‘ene fekau ‘a e palōfita ko ‘Aiseá 26ke fakahā ange ki he‘etau ngaahi kuí,

‘‘Alu ki he kakai ko ená,

pea tala ange kiate kinautolu,

Te mou fanongo mo fanongo

kae ‘ikai ongo‘i ha me‘a.

Te mou sio mo sio

kae ‘ikai ‘ilo ha me‘a.

27He kuo mou ta‘e fie auna kotoa pē.

Kuo mou telinga tuli, pea mata kui.

‘Oku ‘ikai te mou fa‘a ongo‘i ha me‘a.

‘Oku ‘ikai te mou fa‘a ‘ilo ha me‘a.

Ka ne lava ke mou tafoki mai kiate au,

na‘a mou tafoki,

pea ne u fakamo‘ui kimoutolu.’”

28-29Pea toe tala ange ‘e Paula kiate kinautolu, “Ke mou ‘ilo eni, kāinga. ‘Oku fie fakamo‘ui ‘e he ‘Otuá ‘a e kakai mulí. Pea te nau ongo ki ai.”

30Na‘e fe‘unga mo ha ta‘u ‘e ua ‘a e nofo ‘a Paula ‘i ha ‘api na‘á ne totongi pē ‘e ia, ‘o ne tali fiefia ha taha pē na‘e ha‘u ki ai. 31Na‘á ne malanga‘i tau‘atāina ai pē ‘a e Pule‘anga ‘o e ‘Otuá, mo fai ‘ene ngaahi fakahinohino ‘o kau ki he ‘Eiki ko Sīsū Kalaisí. Pea na‘e ‘ikai ke feinga ‘e ha taha ke ta‘ofi ia.

Currently Selected:

Ngāue 28: TCNT

Highlight

Copy