Loma 9

Ko e ‘Otuá mo ‘Isileli

1‘Oku ou lea mo‘oni au ‘ia Kalaisi, ‘oku ‘ikai te u loi, pea ‘oku tau‘atāina hoku konisēnisí ‘i he Laumālie Mā‘oni‘oní ‘i he‘eku pehē atu 2‘oku mafasia lahi mo hoha‘a hoku lotó 3koe‘uhí ko e kakai na‘á ku tupu aí, ‘a e kakai Siú. Ka ‘iloange kuo fakamala‘ia‘i au, pe fakamāvae au mo Kalaisi koe‘uhí kae ma‘u hanau faingamālie, te u sai‘ia ai pē au. Kehe pē ke nau hao. 4He ko e kakai ‘Isileli kinautolu; ko e fānau na‘á ne ohí, na‘e fakahā ange kiate kinautolu hono ngeia, na‘á ne alea pau mo kinautolú, na‘á ne fakakoloa‘i ‘aki ‘ene Laó, mo e lotu kiate ia, mo ‘ene ngaahi tala‘ofá. 5Ko e makapuna kinautolu ‘o e kakai ‘iloa. Ko kinautolu na‘e tupu ai ‘a e Kalaisí. Pea ‘oku taau mo e kakai kotoa pē ke fakamālō ma‘u pē ki he ‘Otuá. He ko ia ‘okú ne pule‘i ‘a e me‘a kotoa pē. ‘Ēmeni.

6Kuo te‘eki ai ke iku noa e folofola ‘a e ‘Otuá. He ‘oku ‘ikai ko e kakai ‘Isileli kotoa ‘a kinautolu kuo tupu meia ‘Isilelí. 7Pea na’e ‘ikai lau ko e hako ‘o ‘Epalahame ‘a ‘ene fanaú kotoa. He na‘e pehē ange ‘e he ‘Otuá kia ‘Epalahame, “Ko e hako pē ‘o ‘Aisaké ‘e lau ko ho‘o fānaú.” 8‘A ia ‘oku ‘ikai ko e fānau ‘a e ‘Otuá e fānau ‘oku fanau‘i fakasino maí, ka ko e fānau pē ‘oku fanau‘i mai he tala‘ofa ‘a e ‘Otuá. He na‘e ‘uhinga pē kia ‘Aisake ‘a e pehē ange ‘e he ‘Eikí kia Sela, 9“Ko ‘ene peheni pē he ta‘u kaha‘ú kuo fā‘ele‘i ha‘o tama tangata.”

10Vakai na‘a ngalo ‘a e ongo māhanga ‘a ‘Aisake mo Lepeká. 11-12Na‘e te‘eki ai ke fā‘ele‘i kinaua, pe te na fai ha ‘ulungāanga lelei pe kovi, kuo fuoloa ‘a e fakahā ange ‘e he ‘Eikí kia Lepeka ‘e fakaongoongo ‘a e lahí ki he si‘í. Ko e fai pehē ‘a e ‘Eikí ke fakamahino ‘okú ne tau‘atāina he anga ‘o ‘ene filí. Pea ‘oku ‘ikai ke fakafalala ‘ene fili kakaí ‘i ha failelei pe ko ha faikovi ‘a ha taha. 13Ko e ‘uhinga ia ‘o e kupu‘i Folofola ko ē ‘oku fakahā mai ai e ‘ofa ‘a e ‘Otuá kia Sēkope kae fehi‘a kia ‘Isoá.

14Ko e hā leva ha‘atau lau? ‘Oku ngali filifilimānako nai ‘a e ‘Otuá? ‘Ikai! 15He na‘e fakahā ange ‘e he ‘Otuá kia Mōsese te ne fa‘iteliha pē pe te ne ‘ofa ki ha taha pē ‘ikai. 16Vakai ange. ‘Oku ‘ikai ke fakafalala ‘a e fili kakai ‘a e ‘Otuá ‘i ha me‘a ‘oku tau loto ki ai, pe ko ha‘atau me‘a kuo fai. Ka ‘oku fakafalala ‘ata‘atā pē ki he‘ene ‘ofá. 17‘Oku ‘asi he Folofolá ‘a e pehē ange ‘e he ‘Eikí kia Felo, “Ko e ‘uhinga pē ‘o ‘eku tuku koe ke ke tu‘í, koe‘uhí ka u me‘angāue ‘aki ho‘o ongongata‘á ke hā ai hoku iví, mo hapai au ‘e he kakai kotoa pē ‘i māmani.” 18He ‘oku fakafalala pē ‘a e fili kakai ‘a e ‘Otuá he me‘a ‘oku finangalo ia ki aí. ‘Okú ne fai manava‘ofa ki ha ni‘ihi, peá ne ‘ai ha ni‘ihi ke ongongata‘a.

Ko e Houhau mo e ‘Alo‘ofa ‘a e ‘Otuá

19‘E ‘i ai nai ha taha ‘iate kimoutolu ‘e pehē mai, “Tā ‘oku tonu ā ke ‘oua ‘e fakahalaia‘i kitautolu ‘e he ‘Otuá. He ko ia pē ‘okú ne ‘ai kita ke te ongongata‘á” 20Ko ‘eku tali eni ki aí, kāinga. Ko ho‘o fakafehufehu‘i ‘a e tu‘utu‘uni ‘a e ‘Otuá, he ko hai koe? ‘Anefē ia ha pehē atu ‘e ha ipu ki he toko taha ngaohi ipú, “Na‘á ke ‘ai au ke u fuo peheé ke hā?” 21‘Ikai ‘oku fa‘iteliha pē ‘a e toko taha ngaohi ipú ki he‘ene ‘umeá? Kapau te ne pehē ke ngaohi ha ipu fuo lelei mo ha ipu fuo kovi ‘aki ‘ene ‘umeá, pea ko hai te ne ta‘ofi ia?

22Na‘e finangalo ‘a e ‘Otuá ke fakahā hono houhaú mo hono māfimafí, ‘a ē ‘okú ne lava ‘o faka‘auha ‘aki ha kakai ‘oku taau ke faka‘auha. Ka na‘á ne kātaki‘i pē kimoutolu. 23Pea na‘e ‘ikai ngata pē ai ‘ene ‘ofá, ka ne toe fakahā mai foki mo hono lāngilangí. Ko hono lāngilangi ia na‘á ne fakakoloa ‘aki ‘a kitautolu kuó ne fai manava‘ofa ki aí, ‘a ia ko e fa‘ahinga ia ‘iate kitautolu kuó ne teu‘i ke ‘inasi he lāngilangi ko iá. 24-25He ko kitautolu pē ‘a e kakai kuó ne uí, ‘o tatau ai pē ‘a e Siú mo e mulí. Pea ko ia pē na‘e folofola ‘aki ‘e he ‘Otuá he tohi Hōseá,

“Na‘e ‘ikai ko hoku kakai kinautolu.

Ka te u lau kinautolu ko hoku kakai.

Ko e kakai na‘e ‘ikai te u ‘ofa ai,

te u ‘ai kinautolu ko hoku ‘ofa‘anga.”

26Ko e toe folofola eni ‘e taha ‘a e ‘Otuá kiate kinautolu,

“‘Oku ‘ikai ko hoku kakai kimoutolu.

Ka kuo vavé ni pē ke u ui mo kimoutolu

ko e fānau ‘a e ‘Otua mo‘uí.”

27Pea ko e lau eni ‘a e palōfita ko ‘Aiseá ki he kakai ‘Isilelí,

“Neongo ha tokolahi ‘a e kakai ‘Isilelí

‘o hangē ko e ‘one‘one ‘o e matātahí,

ka ko e ki‘i tokosi‘i pē ‘iate kinautolu ‘e haó.

28‘E vavé ni pē mo pau ‘a hono fakahoko ‘e he ‘Eikí ‘i mamani ‘a e ngaahi me’a kuó ne ‘osi fakahā mai

29Pea ko e lau mo eni ‘a ‘Aisea,

“Ka ne ‘ikai ke fakahaofi ‘e he ‘Eiki Māfimafí

ha ki‘i ni‘ihi ‘o hotau kakaí,

na‘a tau ‘auha faka‘aufuli mo kitautolu,

‘o hangē ko e ongo kolo ko eé,

‘a Sōtoma mo Komola.”

Ko e Ongoongo Leleí mo e Kakai ‘Isilelí

30Ka ko e hā leva ‘a e ‘uhinga ‘o e ngaahi potu Folofola ko iá? Ko ‘eni pē. Na‘e tui ‘a e kakai na‘e ‘ikai ko e Siú, pea na‘e fakalelei ai ‘a e ‘Otuá mo kinautolu, ‘osi angé na‘e hala ‘atā ha‘anau feinga ke vālelei mo ia. 31-32Kae mamahi‘i Lao ‘a e kakai ‘Isilelí kae ‘ikai fakalelei ai ‘a e ‘Otuá mo kinautolu, koe‘uhí ko ‘enau feinga ke vālelei mo ia ‘i he‘enau mamahi‘i Laó, kae tuku ‘a e falala ki he ‘Otuá. Na‘e tūkia ‘a e kakai ‘Isilelí ‘i he maka ‘oku tūkia ai ‘a e tokolahi. 33Hangē ko e lau ‘a e Folofolá, “Mou vakai ange ki he maka ‘oku ou fokotu‘u ‘i Saioné. Ko e maka ia ‘e tūkia ai ha tokolahi ‘o tō ki lalo. Ka ‘e ‘ikai ha taha ‘e tui ki ai pea tō noa ai ‘ene ‘amanakí.”

Currently Selected:

Loma 9: TCNT

Highlight

Compare

Copy