Loma 10
10
1Kāinga, ko e me‘a ‘oku lahi taha ‘eku faka‘amu mo lotu ki aí, ke fakahaofi ‘a e kakai ‘Isilelí. 2‘Oku mahino pē kiate au ‘enau ‘ofa ‘i he ‘Otuá. 3Kae pangó, he kuo te‘eki ai ke nau fakatokanga‘i ‘a e me‘a ‘oku lava ke vālelei ai ‘a e ‘Otuá mo ha taha. He ‘oku nau fai tūkuingata ke vālelei mo e ‘Otuá ‘aki ‘enau mamahi‘i ‘a e Laó. Pea ko e ‘uhinga ‘o ‘enau fai peheé ko e ‘ikai ke nau fie falala ki he ‘Otuá. 4He kuo ‘osi fakangata ‘e Kalaisi ‘a e pehē ke fakalelei mo e ‘Otuá ‘aki ‘a e mamahi‘i ‘o e Laó. Ko e fakalelei mo e ‘Otuá ‘oku fai ‘aki pē ‘ete tuí.
Ko e ‘Atā ‘a e Mo‘uí ki ha Taha Pē
5Mo‘oni pē na‘e pehē ‘e Mōsese ‘e fakalelei ‘a e ‘Otuá mo ha taha te ne mamahi‘i ‘a e Laó. He na‘e hiki ‘e Mōsese ‘a e kupu‘i lea ko ení, “Kapau ‘okú ke fie mo‘ui, peá ke talangofua ki he fekau kotoa pē he Laó.”
6Ka ‘oku ‘ikai ke kei faingata‘a pehē ‘a e fakalelei mo e ‘Otuá. Hangē ko e lau ‘a e Folofolá, “‘Oua te ke pehē, ‘Ko hai ‘e lava ‘o ‘alu hake ki langi ke ‘ohifo ‘a Kalaisi.’ 7Pe te ke pehē, ‘Ko hai ‘e lava ‘o ‘alu hifo ki he nofo‘anga‘o e kau maté ke ‘ohake ‘a Kalaisi?’”
8Ko hono fakanounoú, ‘oku ‘ikai faingata‘a ke ke ma‘u ‘a e mo‘uí. He kuo ‘osi fakahā mai ‘e he ‘Otuá ‘a e me‘a te ke ma‘u aí. Kuó ke ‘osi lea ‘aki ‘e koe ‘a e me‘a ko iá, mo talaloto ‘aki. Ko e tuí. Pea ko ia pē ‘oku mau malanga‘akí. 9Pea kapau te ke pehē, “Ko e ‘Eikí ‘a Sīsū” mo ke tui mo‘oni ‘i ho lotó na‘e fokotu‘u ‘e he ‘Otuá ‘a Sīsū ke mo‘uí, pea te ke mo‘ui. 10Kapau te ke tui ki ai mo lea ‘aki ki he kakaí, ‘e fakalelei ai pē ‘a e ‘Otuá mo koe, pea te ke mo‘ui.
11Hangē ko e lau ‘a e Folofolá, ‘e ‘ikai iku launoa ‘a e ‘amanaki ‘a ha taha kuo tui ki he ‘Otuá, 12‘o tatau ai pē pe ko e Siu pe ko e muli. He ko e ‘Otuá, ko e ‘Eiki ia ‘o e kakai kotoa pē. Ko e ‘Eiki ia ‘okú ne mātu‘aki fakakoloa‘i ha taha pē ‘e hanga hake kiate ia. 13Ko e lau eni ‘e taha ‘a e Folofolá ki ai,
“‘E mo‘ui ‘a e kakai kotoa pē te nau ui ki he huafa ‘o e ‘Eikí.” 14Ka ‘e ui fēfē ki he ‘Eikí ‘a e kakai kuo te‘eki ai ke nau tuí? Pea ‘e tui fēfē ki he ‘Eikí ha kakai kuo te‘eki ai ke nau fanongo ki he Ongoongo Leleí? Pea ‘e fanongo fēfē ki he ongoongo-leleí ha kakai kuo te‘eki ai ke malanga‘i ange kiate kinautolu ‘a e ongoongo-leleí? 15Pea ‘e malanga‘i fēfē ‘a e ongoongo-leleí ‘e ha kau malanga kuo te‘eki ai ke fekau ke nau ō atu? Hangē ko e lau ‘a e Folofolá,
“Me‘a faka‘ofo‘ofa ko e va‘e
‘o ha taha ‘oku ha‘u ke malanga‘i ‘a e ongoongo-leleí.”
16Ka kuo te‘eki ke tui ‘a e kakai kotoa pē ki he ongoongo-leleí. Hangē ko e lau ‘a ‘Aiseá,
“He kuo tui mai ha taha, ‘Eiki,
ki he me‘a na‘a mau malanga‘akí?”
17‘E ‘ikai faifai angé pea tui ha taha ‘o kapau kuo te‘eki ai ke ne fanongo ki he ongoongo-lelei ‘o Kalaisí. 18Ko ‘eku ‘uhingá koā, na‘e ‘ikai ke tui ‘a e kakai ‘Isilelí he na‘e te‘eki ai ke nau fanongo he ongoongo-leleí? ‘Ikai! He ko e lau ē ‘a e Folofolá,
“Ko e ongoongo-leleí,
na‘e fanongo ki ai a māmani kātoa.
He na‘e malanga‘i he feitu‘u kotoa.”
19‘Ai angé. ‘Oku mou pehē na‘e mahino ki ‘Isileli ‘a e ongoongo-leleí pe ‘ikai? Na‘e tali ‘e Mōsese ‘a e fehu‘i ko iá he‘ene fakahā mai ‘a e folofola ko eni ‘a e ‘Eikí,
“Te u ‘ai ‘a ‘Isileli ke meheka ki ha kakai ta‘e ‘iloa.
Te u ‘ai ke nau fua‘a ‘i ha kakai fakapo‘uli.”
20Pea ‘oku ‘i ai ‘a e lave ki ai ‘a ‘Aisea ‘oku toe ongo ange,
“Na‘e a‘u mai kiate au ha kakai na‘e ‘ikai te nau fekumi kiate au.
Na‘á ku fetu‘utaki ki ha fa‘ahinga na‘e te‘eki te nau faka‘eke‘eke kiate au.”
21Ka ko e lau eni ‘a ‘Aisea ‘o kau ki he kakai ‘Isilelí,
“Talu mei he hopo ‘a e la‘aá ‘o a‘u ki he‘ene toó,
mo e feinga mai ‘a e ‘Eikí ki ha kakai loto ta‘e fie auna mo ongongata‘a.”
Currently Selected:
Loma 10: TCNT
Highlight
Share
Compare
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
