Loma 8
8
Ko e Mo‘ui he Laumālie.
1Ko kimoutolu ‘oku kau mo Sīsū Kalaisí, te mou hao ‘aupito he tautea. 2Kuo ‘oatu ma‘amoutolu ‘e he Laumālie Mā‘oni‘oní ‘a e mo‘ui ‘oku tu‘unga ‘ia Kalaisi Sīsuú. Kuo mou ‘ata‘atā ai mei he angahalá mo e maté. 3‘E ‘ikai lava ia he Lao ‘a Mōsesé, he ‘oku fu‘u mālohi ‘a e holi ‘a hotau kakanó. Ko e me‘a pē kuo mou ‘ata‘atā ai mei he angahalá mo e maté, ko e hanga ‘e he ‘Otuá ‘o fekau mai hono ‘Aló ki māmani ‘aki ha sino na‘e tatau pē mo hotau sino angahala‘iá, ke hoko ko e fakamolemole‘anga ‘o ‘etau ngaahi angahalá. Na‘e fakaka‘anga ‘e he ‘Otuá ‘a e angahalá ‘i he kakano ‘o Kalaisí. 4Ko e fai pehē ‘a e ‘Otuá, koe‘uhí ke tau lava ‘o tuku ai ‘etau fakatuituia hotau kakanó ka tau fakakakato ‘a e Laó ‘i he‘etau talangofua ki he Laumālié.
5Ko e kakai ‘oku nau fakatuituia honau kakanó, ‘oku nau fiema‘u pē ‘a e me‘a ma‘a honau sinó. Ka ko e kakai ‘oku nau fakaongoongo ki he Laumālié, ‘oku nau fiema‘u ‘a e me‘a ma‘a honau laumālié. 6Ko e pule ‘a e kakanó, ko e maté ia. Ka ko e pule ‘a e Laumālié, ko e mo‘uí ia mo e fiemālié. 7Ko e ngaahi holi ‘a hotau kakanó ko e koto fakafili ki he ‘Otuá. He ko e koto ongongata‘a ki he Lao ‘a e ‘Otuá. Pea ‘e ‘ikai teitei lava ke toho ‘a e ngaahi holi ‘a hotau kakanó ke hoa pe taau mo e Lao ‘a e ‘Otuá. 8‘E ‘ikai pē faifai angé pea hoa mo e finangalo ‘o e ‘Otuá ha me‘a ‘e fai ‘e ha taha ‘okú ne fakatuituia hono kakanó.
9Ka ‘oku ‘ikai foki te mou toe kau kimoutolu he fa‘ahinga kakai ‘oku nau fakatuituia honau kakanó. Kuo mou ‘osi kau kimoutolu he fa‘ahinga ‘oku nau fakaongoongo ki he Laumālié, ‘o kapau ‘oku nofo ‘a e Laumālié ‘o e ‘Otuá‘i homou lotó. ‘Ilonga ha taha ‘oku ‘ikai ke ne ma’u ‘a e Laumālie ‘o Kalaisi, ‘oku ‘ikai kau mo ia. 10Ka kuo ‘osi nofo ‘a Kalaisi ‘i homou lotó. Pea neongo ‘e mate homou sinó ko e ngāue ‘a e angahalá, ka kuo mou mo‘ui koe‘uhi ko e fakalelei ‘a e ‘Otuá mo kimoutolú. 11Kapau ‘oku nofo ‘i homou loto ‘a e Laumālie ‘o ia na’á ne fokotu’u ‘a Kalaisi me i he pekia, ‘e foaki mo’ui foki ki homou sino maté ni, ‘e ia na’á ne fokotu’u ‘a Kalaisi.
12Kāinga, ‘oua te mou mo‘ui ‘aki pē e fakatopono ‘a e ngaahi holi ‘a homou kakanó. 13Kapau te mou mo‘ui ‘aki ‘a e fa‘ahinga mo‘ui ko iá, te mou mate. Ka ‘o ka moú ka ta‘ofi ‘a e ngaahi holi ‘a homou kakanó ‘i ha tokoni atu ‘a e Laumālie ‘o e ‘Otuá, te mou mo‘ui ai. 14He ko kinautolu ‘oku fai honau tatakí ‘e he Laumālie ‘o e ‘Otuá, ko e fānau kinautolu ‘a e ‘Otuá. 15Na‘e ‘ikai ke mou ma’u ha laumālie fakapopula ke mou nofo manavahe ai; ka na’a mou ma’u ha laumālie fakafanau-ohi ‘a ē ‘oku tau kalanga ai kiate ia ‘o pehē, “‘Ala Tamai!” 16‘Oku tau ‘ilo pau ko e fānau kitautolu ‘a e ‘Otuá. He ‘oku ‘ikai ngata pē he fakamo‘oni ki ai ‘a hotau laumālié, ka ‘oku toe fakamo‘oni ki ai ‘a e Laumālie ‘o e ‘Otuá. 17‘Io, ko ‘ene fānau kitautolu. Pea kapau ko ‘ene fanau, pea tā ko e fanau-hoko foki, ko e fanau-hoko ‘o e ‘Otuá, ‘o kaungafanau-hoko mo Kalaisi ‘o kapau ‘oku tau kaungamamahi mo ia, te tau kau foki mo ia ‘i hono fakalāngilāngi’í.
Ko e Fakatu‘amelie ki he Kaha‘ú
18‘Oku ou pehē, ko e ngaahi mamahi ‘oku tau lolotonga mo‘ua aí, ko e me‘a si‘i pē ia ki he fu‘u lāngilangi ‘oku teuteu ma‘atautolu ‘e he ‘Otuá. 19Pea ‘oku faka‘amu ‘a e me‘a kotoa pē he lalo la‘aá ke fei mo a‘u ki he ‘aho ‘e fakahaá’i ai ‘e he ‘Otuá ‘a ‘ene fānaú. 20-21Kuo hēhētu‘u ‘a e me‘a kotoa na‘e fakatupú. Pea ko ‘ene peheé, ko e finangalo ia ‘o e ‘Otuá. Ka ‘oku ‘i ai ‘a e fakatu‘amelie. He vete ‘e he ‘Otuá ‘a e me‘a kotoa kuo fakatupú mei he pōpula ki he ‘auhá ke kau he tau‘atāina fakalangi e fānau ‘a e ‘Otuá. 22He kuo fetō‘eaki mo felāngaaki, ‘a e me‘a kotoa he lalo la‘aá, ‘o hangē ha langaá, ‘o a‘u mai pē ki he ‘ahó ni.
23‘Oku fetō‘eaki hotau lotó foki, he ‘oku tau kei tatali ke fakahoko hotau ohí, ‘a ia ko e vete ange kakato hotau sinó mei he ‘auhá. He kuo fakahā mai ‘e he Laumālié kuo tau ‘osi hoko kitautolu ko e fānau ‘a e ‘Otuá. 24Na‘e tupunga foki hono fakahaofi kitautolú ko ‘etau fakatu‘amelié. Mo‘oni pē kuo tau ‘osi ma‘u ‘e kitautolu ‘a e mo‘uí, pea ‘oku ‘ikai ke toe fai ha fakatu‘amelie ki ha me‘a kuo ‘osi hoko. 25Ka ‘oku ‘i ai pē ‘a e me‘a ‘oku kei toe ke tau a‘u ki ai. Pea te tau fakatu‘amelie ai pē ki he me‘a ko iá, mo fa‘a kātaki, kae ‘oua kuo tau a‘u ki ai.
26‘Oku ‘i ai foki mo hotau ngaahi vaivai‘anga. Ka ‘oku tokoni‘i ai kitautolu ‘e he Laumālié. Hangē ko ení. Lolotonga ‘ete fifili pe ‘e anga fēfē ‘ete hūfia ha me‘a, kuo hūfia ia ‘iate kita ‘e he Laumālié, ‘o ongo ‘aupito ‘ene lave maí, pea ‘oku ‘ikai ha lea fe‘unga ke fakamatala‘i ‘aki. 27Ka ‘oku ‘afio‘i lelei ‘e he ‘Otuá ‘a e me‘a ‘oku tokanga ki ai ‘a e Laumālié. He ‘oku ‘ikai puli ki he ‘Otuá ha me‘a ‘e taha he loto ‘o e tangatá. Pea ko e finangalo ‘o e ‘Otuá ke hūfia ‘e he Laumālié ‘a hono kakaí. 28Ko e me‘a kotoa ‘e fetaulaki mo ha taha ‘oku ‘ofa ki he ‘Otuá, ‘oku kau ia ki hono langa hake ‘e he ‘Otuá ‘a e mo‘ui ‘a e toko taha ko iá. He ko e kakai ‘oku ‘ofa ki he ‘Otuá, na‘e ui kinautolu ‘e he ‘Otuá ke nau fai ‘a e ngāue ‘okú ne finangalo ke faí. 29Talu mei mu‘a mo e ‘afio‘i ‘e he ‘Otuá ‘a e fa‘ahinga te ne uí. Pea kuo talu mei mu‘a mo ‘ene finangalo ke hangē ‘enau mo‘uí ko e mo‘ui ‘a hono ‘Aló tonu. He kuo talu pē mei mu‘a mo ‘ene finangalo ke hoko hono ‘Aló ko e lahi ‘i ha fānau tokolahi. 30‘Io, ko e fa‘ahinga na‘e tokanga‘i ‘e he ‘Otuá mei mu‘á, na‘á ne uí. Pea ko e fa‘ahinga na‘á ne uí, na‘e fakalelei mo kinautolu. Pea ko e fa’ahinga na’e fakalelei mo kinautolú, na’á ne tuku ke nau ‘inasi ‘i hono lāngilangí.
Ko e ‘Ofa ‘a e ‘Otuá
31Ko e hā leva ha‘atau lau ki he ngaahi me‘á ni? ‘E ‘ikai hala ha‘atau pehē, “Tā he‘ikai tu‘u mai ha loto ia kiate kitautolu.” 32Na‘e ‘ikai ta‘ofi meiate kitautolu ‘e he ‘Otuá hono ‘Alo ‘o‘oná. Ko e hā leva ha toe me‘a ‘e ta‘ofi ‘e he ‘Otuá meiate kitautolu? 33Pea ko hai ‘e tui ki ha taha te ne tala mai kuo te‘eki ke vālelei mo e ‘Otuá ‘a e kakai kuó ne filí? He ko e ‘Otuá tonu pē kuó ne fakahā mai ‘enau vālelei mo iá. 34Ko hai leva te ne lava ‘o fakahalaia‘i kitautolú? ‘Oku hala ha taha! Ko hono mo‘oní, ‘oku lolotonga faí ni hotau hūfia ‘e Kalaisi ki he ‘Otuá ‘i langi. He na‘e pekia ‘a Kalaisi, kae toe fokotu‘u ia ke mo‘ui. Pea kuó ne ‘i he to‘omata‘u ‘o e ‘Otuá. 35Ko e hā ha me‘a ‘e faifai pea motu ai ‘a e ‘ofa ‘a Kalaisi ‘iate kitautolú? Ha faingata‘a koā? Ha mamahi? Ha fakaaoao ‘e fai mai? Ha fiekaia? Ha honge? Ha tēlefua? Ha fakatu‘utāmaki ‘e hoko kia kita? Ha mole ‘ete mo‘uí? 36‘Ikai! He ‘oku mo‘oni pē ‘a e lau ‘a e Folofolá,
“Ko e pongipongi ki he efiafi
mo ‘emau fehangahangai mo e maté
koe‘uhi ko e ‘Afió na.
Kuo mau hangē tofu pē
ha fanga sipi ‘oku taki atu ke tāmate‘í.”
37Ka kuo tau ikuna noa ‘a e ngaahi me‘á ni kotoa koe‘uhí ko e ‘ofa ‘a Kalaisi ‘iate kitautolú. 38-39‘Oku ou tui mo’oni, ‘oku ‘ikai ha momo’i me’a ‘e taha te ne lava ke motuhi kitautolu mei he ‘ofa ‘a e ‘Otuá ‘a ia ‘oku ‘i hotau ‘Eiki ko Sīsū Kalaisi, pē te tau mo’ui atu pe te tau mate, pe ‘e feinga mai ha ‘angelo pe ko ha tevolo, pe ko ha me’a ‘i he lolotongá ni pe ko e kaha’ú, pe ko ha ivi he lalo la’aaá ni, pe ko lolofonuá. ‘Ikai! ‘Oku ‘ikai ‘aupito ha momo’i me’a ‘e taha.
Currently Selected:
Loma 8: TCNT
Highlight
Share
Compare
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
