Loma 4
4
Ko e Fa‘ifa‘itaki‘anga ‘a ‘Epalahame he Tuí
1Ko e hā ‘etautau lau ki hotau tupu‘anga ko ‘Epalahamé? 2Na‘e fakalelei koā ‘a e ‘Otuá mo ‘Epalahame koe’uhi ko ha ngaahi lelei na‘e fai ‘e ‘Epalahamé? Mo‘oni pē na‘e ‘i ai ‘a e ngaahi ngāue ‘a ‘Epalahame na‘á ne mei futa‘aki. Ka na‘e ‘ikai ha‘ane me‘a ke futa‘aki ‘i he‘ene fehangahangai mo e ‘Otuá. 3He ko e lau foki ‘a e Folofolá, “Na‘e fakalelei ‘a e ‘Otuá mo ‘Epalahamé koe‘uhi ko e tui ‘a ‘Epalahamé.”
4Ko ‘ete ‘oange ha pa‘anga ‘a ha taha na‘á ne fai ha ngāue ‘aonga ma‘áta, ‘oku ‘ikai ke lau ia ko e foaki me‘a‘ofa ka ko e totongi mo‘ua. 5Ka ‘oku ‘ikai ke pehē ‘a e ‘Otuá ia. He ka ‘i ai ha taha kuo te‘eki ha‘ane ngāue ‘aonga ‘e fai, ka ‘oku tui ki he ‘Otuá, ‘oku hoko pē ‘a e tui ‘a e toko taha ko iá ko e me‘a ke ne vālelei ai mo e ‘Otuá. ‘Io, ko e ‘Otuá, ko e fakamaau ia ‘okú ne ma‘u mafai ke lau ‘oku tonuhia ha taha na‘e mātu‘aki halaia. 6Ko ia pē foki ‘a e fakakaukau ‘a Tēvitá. He na‘e hiva‘aki ‘e Tēvita ‘a e fiefia ‘a e tangata kuo fakalelei ‘a e ‘Otuá mo iá, ‘osi angé na‘e ‘ikai fai ‘e he tangata ko iá ha ngāue ‘aonga ‘e taha. Na‘e pehē ‘e Tēvita he‘ene hiva ko iá,
7“‘Oku tatau mo e hā ‘a e fiefia
‘a e kakai kuo fakamolemole‘i ‘enau koví,
pea ‘ufi‘ufi‘i ‘enau ngaahi fai angahalá.
8‘Oku tatau mo e hā ‘a e fiefia
‘a e kakai ‘e ‘ikai fakalautelau ‘e he ‘Eikí
‘enau ngaahi faihalá.”
9Me‘a ní ko e fiefia ‘oku lau ko eni ‘e Tēvitá, ko e fiefia pē ia ‘a e kakai kuo kamú? ‘Ikai! Ko e fiefia ai pē ia ‘a e kakai na‘e ‘ikai ke kamú. He na‘á ku ‘ai atu ‘i mu‘a ‘a e potu Folofola ko eni, “Na‘e fakalelei ‘a e ‘Otuá mo ‘Epalahamé koe‘uhi ko e tui ‘a ‘Epalahamé.” 10He na‘e fēfē ‘a ‘Epalahame ‘i he fakalelei ‘a e ‘Otuá mo iá? Na‘e fe‘unga ia koā kuo ‘osi kamu ‘a ‘Epalahame, pe ‘ikai? Ko e tali ki aí, na‘e fe‘unga ia ‘oku te‘eki ai ke kamu.
11He ko e tali fiemālie ‘e ‘Epalahame ke kamu iá, ko e fakamo‘oni ia na‘e te‘eki ai ke kamú kuo ‘osi fakalelei ‘a e Otuá mo ia. Pea ‘i he‘ene peheé leva, ko e tamai fakalaumālie ‘a ‘Epalahame ‘a e kakai kotoa pē na‘e ‘ikai ke kamu ka kuo fakalelei ‘a e ‘Otuá mo kinautolu koe‘uhi ko ‘enau tuí. 12Pea ko e tamai ai pē foki ‘a ‘Epalahame ‘a e kakai kuo kamu pea ‘oku nau tui ki he ‘Otuá. Ka ‘oku ‘ikai ko ‘enau tamai kia ‘Epalahamé koe‘uhi ko ‘enau kamú, ka koe‘uhí ko ‘enau molomolomuiva‘e ‘i he tui na‘e fai ‘e ‘Epalahame ‘i he te‘eki ai ke kamú.
Ko e Tala‘ofa ki he Kakai Tuí
13Na‘e tala‘ofa ange ‘e he ‘Otuá kia ‘Epalahame mo hono hakó ‘e ‘oange ‘a māmani ko hono tofi‘a. Ka na‘e ‘ikai tupunga ‘a e tala‘ofa ko eni ‘a e ‘Otuá ko e mamahi‘i ‘e ‘Epalahame ha lao. Ka na‘e tupunga pē ko ‘ene tuí, ko ‘ene tuí na‘e ‘osi fakalelei ai ‘a e ‘Otuá mo iá. 14Kapau na‘e lava‘i ‘e ‘Epalahame mo hono hakó ‘a e tala‘ofa ‘a e ‘Otuá ‘aki ‘enau mamahi‘i ‘a e Laó, pea tā ko e muna pē ‘etau tuí. Pea ko e muna ai pē mo e tala‘ofa ‘a e ‘Otuá.
15‘Oku fakatupu houhau foki ki he ‘Otuá ‘a e talangata‘a ki he Laó. Ka ‘o kapau ‘oku ‘ikai ke ‘i ai ha lao, pea ‘oku ‘ikai ha talangata‘a ia. 16Ko e me‘a pē na‘e ‘inasi ai ‘a ‘Epalahame he tala‘ofa ‘a e ‘Otuá, ko ‘ene tuí. Pea ko e me‘a na‘e tala‘ofa‘aki ange ‘e he ‘Otuá, ko e me‘a‘ofa ‘ata‘atā pē. Pea ko e me‘a‘ofa ai pē ia ma‘áe hako kotoa ‘o ‘Epalahamé. Ko e me‘a‘ofa ia ma‘anautolu kuo nau ‘ilo ‘a e Laó, pea pehē pē foki kiate kinautolu ‘oku nau tui tatau mo ‘Epalahame ki he tala‘ofa ‘a e ‘Otuá. He ko ‘Epalahamé, ko e tamai fakalaumālie ‘atautolu kotoa pē. 17Hangē ko e folofola ‘a e ‘Otuá kia ‘Epalahamé, “Kuó u lau koe ko e tamai ‘a e ngaahi matakali lahi.” Na‘e fai kia ‘Epalahame ‘a e tala‘ofa ko iá koe‘uhí ko ‘ene tui ki he ‘Otuá, ki he Toko Taha ‘okú ne lava ‘o fokotu‘u ‘a e kakai kuo maté ke toe mo‘ui, mo ne lava ‘o fakatupu mai ha ngaahi me‘a na‘e ‘ikai ke ‘i ai.
18Na‘e tala‘ofa ange ‘e he ‘Otuá kia ‘Epalahame te ne ‘oange hano hako tokolahi. Pea neongo na‘e te‘eki ai ke hā sino kia ‘Epalahame ha me‘a ke tu‘unga ai ha‘ane fakatu‘amelie, ka na‘e kei tui pē ‘a ‘Epalahame ki he ‘Otuá, peá ne iku ai ‘o hoko ko e “Tamai ‘a e ngaahi matakali lahi.” 19Na‘e fe‘unga ia ‘oku meimei teau ta‘u ‘a ‘Epalahame. Na‘á ne ‘ilo lelei pē kuo motu‘a hono sinó, pea pa‘a ‘a Selá. Ka na‘e ‘ikai ke vaivai ai ‘ene tuí.
20-21Na‘e ‘ikai ke ne tāla‘a ki he tala‘ofa ‘a e ‘Otuá. ‘Io, na‘e kau ia ki hono fakaiviá. Peá ne fakamālō ki he ‘Otuá ko ‘ene fakapapau‘i ‘oku malava noa pē ‘e he ‘Otuá ke fai ki he‘ene tala‘ofá. 22Na‘e tu‘unga ai pē hono lau ‘e he ‘Otuá ‘oku vālelei mo ia ‘a ‘Epalahame, ‘o hangē ko e lau ‘a e Folofolá. 23-24Ka na‘e ‘ikai ‘uhinga pē kia ‘Epalahame hono hiki ‘o e Folofola ko iá. Na‘e toe ‘uhinga pē ia foki kiate kitautolu. He kapau te tau tui ki he toko taha na‘á ne fokotu‘u hotau ‘Eiki ko Sīsuú mei he maté, pea ‘e toe lau ai pē ‘e he ‘Otuá mo kitautolu ko e kakai kuo vālelei mo ia. 25Na‘e tuku ange ‘a Sīsū ke pekia koe‘uhi ko ‘etau ngaahi fai angahalá, pea fokotu‘u hake ia ke ne mo‘ui kae lava ke tau vālelei mo e ‘Otuá.
Currently Selected:
Loma 4: TCNT
Highlight
Share
Compare
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
