Loma 3

1Pea ko e hā leva ha tafa‘aki ‘oku laka ange ai ‘a e kakai Siú he kakai kehé? He kamú nai? 2‘Ikai! Ka ‘oku ‘aonga pē ‘a e kamú ia. ‘Uluakí, he ko e kakai Siú na‘e tuku falala kiate kinautolu ‘e he ‘Otuá ‘ene ngaahi folofolá. 3Mo‘oni pē na‘e ‘i ai ‘a e kau Siu na‘e ‘ikai ke tui ki he‘ene ngaahi folofolá. Ka ko e kovi ‘a hai nai ia? ‘A e ‘Otuá koā? 4‘Ikai! ‘E kei mo‘oni pē ‘a e ‘Otuá ia, neongo ko e loi ‘a e kakai kotoa pē. Hangē ko e lau ‘a e Folofolá,

“Ka ai ha‘o folofola,

ko e mo‘oní pē ia.

Pea ka fakamāu‘i koe,

kuo pau pē ke ke hao koe.”

5Tā ‘oku hoko ‘etau fai koví ko e me‘a ke hā mahino ange ai ‘a e faitotonu ‘a e ‘Otuá. Pea ‘oku tonu leva ke hā? ‘Oku tonu koā ke ‘oua ‘e tautea kitautolu ‘e he ‘Otuá? Ko e tali fakavalevale ia. 6He ‘e fakamāu‘i fēfee‘i ‘e he ‘Otuá ‘a māmani ‘o kapau ‘oku ‘ikai ko e ‘Otua faitotonu ia? 7Tokaange ha ni‘ihi ‘iate kimoutolu te mou pehē mai, “Ka ko e hā ‘oku kei lau ai pē kitautolu ‘e he ‘Otuá ko e kau angahala, ‘o kapau ‘oku hoko ‘etau fai koví ko e me‘a ke hā mahino ange ai ‘ene faitotonú?” 8Ka ko e toki fehu‘i faka‘ulia ia. He ‘oku ‘ikai ke toe faikehekehe ia mo ha‘o pehē mai, “Tau hanganaki fai kovi ai ā kae hoko mai ai ha lelei.” ‘Oku tala holo foki ‘e he ni‘ihi ko ‘eku me‘a ia ‘oku malanga‘í. Ka ‘e tō ki he kakai ko iá ‘a e tautea ‘oku tuha mo ‘enau loí.

‘Oku ‘Ikai Tonuhia ha Taha

9Pea hā leva? ‘Oku mau lelei ange koā ‘a kimautolu Siú he kakai kehé? ‘Ikai ‘aupito! He ko e toki ‘osi pē eni ‘eku pehē ‘oku mo‘ua tatau ‘a e Siú mo e kakai kehé ‘i he angahalá. 10Hangē ko e lau ‘a e Folofolá,

“‘Oku ‘ikai ha taha ‘e angatonu,

11‘Ikai! ‘Oku ‘ikai ha taha!

Ha taha ‘e fekumi ki he ‘Otuá.

12Kuo nau sītu‘a kotoa ki he ‘Otuá

‘o hē ai.

‘Oku ‘ikai ha taha ‘e failelei.

Na‘a mo ha fo‘i toko taha.

13‘Oku hangē honau u‘á ha fonualoto kuo tangakí.

Ko e koto kākā ‘enau fakalanga talanoá.

Ko e koto fakapō ‘enau leá.

Hangē ko e huhu kona ‘a ha ngatá.

14Ko e kau talatuki mo lau mala.

15Ko e kau lingi toto ta‘e toe momou.

16Ko e kau fakatupu maumau kinautolu

mo fakatupu fetāngihi

‘i ha potu pē te nau a‘u ki ai.

17‘Oku nau sola ki he fakatupu melinó.

18‘Oku ‘ikai ha‘anau me‘i ‘apasia ki he ‘Otuá.”

19Na‘e tuku foki ‘e he ‘Otuá ‘a e Laó ki he kakai Siú ke nau talangofua ki he ngaahi fekau kotoa pē ‘oku tu‘u aí. Pea ko e ‘osi faka‘āufuli ia ‘a e tuli tonuhiá, kae hanga kotoa ‘a māmani ki he ‘Otuá, ki he Fakamāú. 20He ‘oku ‘ikai ha taha ‘e faifai pea tonuhia ki he ‘afio mai ‘a e ‘Otuá ‘i he‘ene mamahi‘i ‘a e Laó. He ko e me‘a pē ‘oku lava he Laó, ko ‘ete ‘ilo‘i ai ko e angahala kita.

Ko e Fakalelei ‘a e ‘Otuá mo ha Taha

21Ka kuo fakahā mai ‘e he ‘Otuá ‘i hotau kuongá ‘a e me‘a ‘e toki lava ke tau vālelei ai mo iá. Pea ‘oku ‘ikai ko ‘etau mamahi‘i ‘a e Lao ‘a Mōsesé, neongo ‘oku lau ki ai ‘a e tohi Lao ‘a Mōsesé mo e ngaahi tohi ‘a e kau palōfitá. 22Ka ko e hā ia? Ko eni, ko e fakalelei ‘a e ‘Otuá mo kitautolu ‘i he‘etau tui kia Sīsū Kalaisí. Pea ko e ‘inasi ia ‘o ha taha pē ‘e tui kia Kalaisi, ‘o tatau ai pē pe ko hai. He ‘oku ‘ikai ke filifilimānako ‘a e ‘Otuá. 23Kuo fai angahala ‘a e kakai kotoa pē, pea kuo nau motu ai mo e ‘Otuá. 24Ka kuo fakalelei ‘a e ‘Otuá mo kitautolu kotoa pē, ko ‘ene me‘a‘ofa ‘ata‘atā pē. Kuó ne vete ange kitautolu mei he ivi mo e tautea ‘o e angahalá, koe‘uhí ko e me‘a kuo fai ma‘atautolu ‘e Sīsū Kalaisí. 25He na‘e tuku mai ‘e he ‘Otuá ‘a Sīsū Kalaisí ke hoko hono ta‘ata‘a na‘e lilingi he Kolosí ko e fakamolemole‘anga ‘o ha taha pē ‘e tui ki ai. Ko e ‘uhinga na‘e tuku mai ai ‘e he ‘Otuá ha fakamolemole‘anga peheé, ke mahino ki māmani ko e fakamaau faitotonu ia. He kuo talu mei mu‘a mo ‘ene kātaki mo ‘ene hanga kehe mei he angahala ‘a e fa‘ahinga ‘o e tangatá. 26Ka kuo fai ‘ene tokanga ki ai ‘i he ‘ahó ni. Pea kuo mātu‘aki mahino ai ko e ‘Otua ia ‘oku fakamāu totonu, pea ‘okú ne toe lava ‘o fakalelei mo ha taha pē ‘e tui ‘ia Sīsū Kalaisi.

27Pea ko e hā mo ha toe me‘a te tau fakamofutofuta ai? ‘Oku ‘ikai ha toe me‘a ia! Ko e hā hono ‘uhingá? He ko ‘ete fai pē, tokua, si‘oto fatongia he Laó? ‘Ikai! Ko hono ‘uhingá pē he na‘á te tui kia Sīsū Kalaisi. 28He ‘oku mau taukave‘i, ‘oku ‘ikai ko ‘etau mamahi‘i ‘a e Laó te tau vālelei ai mo e ‘Otuá, ka ko ‘etau tuí pē taha. 29He ko e ‘Otua pē ia koā ‘o e kakai Siú? ‘Ikai koā ko e ‘Otua ai pē ia ‘o e kakai kehé foki? Ko ia! 30He ‘oku taha pē ‘a e ‘Otuá. Pea te ne fakalelei mo e kakai Siú mo e kakai kehé fakatou‘osi ‘i ha‘anau tui. 31Ko ‘etau fakapekia ‘a e Laó ‘apē ‘a e fu‘u tō pehē ‘etau fakamamafá ki he tuí? ‘Ikai ‘aupito! Ko hono mo‘oní, ko ‘etau mamahi‘i ia ‘a e Laó.

Currently Selected:

Loma 3: TCNT

Highlight

Compare

Copy