Loma 2
2
Ko e Fakamaau ‘a e ‘Otuá
1‘Oku ‘i ai ‘a e ni‘ihi hena ‘oku mou fehi‘a he ngaahi ‘ulungāanga na‘á ku fakalau atu ‘i ‘olungá, kae ‘osi angé ‘oku mou kau ai pē mo kimoutolu. He ‘oku mou fakamāu‘i ‘a e kakai kehé. Ko ‘ete fakamāu‘i ‘a e tō‘onga ‘a ha taha, kae ‘osi angé ‘okú te fai pē ‘e kita ‘a e tō‘onga ko iá, ko ‘ete fakamāu‘i ai pē ia ‘e kita ‘a kita. 2‘Oku tuha foki mo e kakai ‘oku fai peheé ‘a hono fakamāu‘i kinautolu ‘e he ‘Otuá. 3‘Oku mou pehē koā he‘ikai ke tautea ‘e he ‘Otuá ‘a kimoutolu ‘oku mou fakamāu‘i ‘a e kakai kehé? 4‘Oku mou pehē koā ko e me‘a noa ‘a e fai faka‘atu‘i ‘a e ‘Otuá, mo ‘ene fakama‘uma‘ú, mo ‘ene kātakí? ‘Oku ‘ikai koā te mou fakatokanga‘i ‘oku ‘uhinga hono faka‘atu‘i kimoutolu ‘e he ‘Otuá ke mou tafoki kiate ia?
5‘Oku ou fakapapau atu kiate kimoutolu, ko ho‘omou kei ongongata‘a mo fakasiosio kehe mei he ‘Otuá, ‘e toe ‘āsili ai pē ‘a e vevela homou tauteá ‘i he ‘aho fakamāú. ‘E hā ki māmani he ‘aho ko iá e fakamaau ta‘e toeafe ‘a e ‘Otuá. 6‘E ‘omi ‘e he ‘Otuá he ‘aho ko iá ‘a e tuha ‘o hotau taki taha ‘ulungāanga. 7Te ne ‘omi ‘a e mo‘ui ta‘e ngatá ma‘á e kau faileleí, ‘io, ma‘á e fa‘ahinga ‘oku nau fekumi fakamātoato ki ha lāngilangi ‘oku faka-‘Otuá, mo ha mo‘ui ‘oku ‘ikai ke ‘auha. 8Ka ‘e houhau ‘a e ‘Otuá ki he fa‘ahinga kotoa pē ‘oku nau siokita mo fehi‘a ki he faileleí kae manako ki he faikoví. 9‘I he ‘aho ko iá ‘e mo‘ua ‘i ha mamahi lahi ‘a e kau faikovi kotoa pē, ‘o tatau ai pē pe ko e kakai Siu pe ko e kakai muli. 10Ka ‘e ‘oange ‘e he ‘Otuá ha lāngilangi mo ha ngeia mo ha fiemālie ma‘á e kau failelei kotoa pē, ‘o tatau ai pē pe ko e kakai Siu kinautolu pe ko e kakai muli. 11He ko e ‘Otuá, ‘oku ‘ikai ke filifilimānakó. 12Ko e kakai kuo te‘eki ai ke nau ‘ilo ‘a e Lao ‘a Mōsesé, te nau ‘auha kinautolu koe‘uhí ko ‘enau angahalá.
Pea ko e kakai kotoa pē kuo nau ‘ilo ‘a e Lao ‘a Mōsesé, ‘e fakamāu‘i kinautolu ‘aki ‘a e Lao ko iá. 13He ‘oku ‘ikai ko e me‘a ‘oku te vālelei ai mo e ‘Otuá ‘a ‘ete ‘ilo Laó, ka ko ‘ete fai ki aí.
14‘Oku ‘i ai foki ‘a e kakai kuo te‘eki ai ke nau ‘ilo ki he Lao ‘a Mōsesé, ka ‘oku ‘ai pē mo nau fai ‘a e ngaahi ‘ulungāanga ‘oku lau ki ai ‘a e Laó. 15-16‘Oku mahino ai ko e konisēnisí, ‘oku hangē ia ko ha lao kuo tohi ‘i hoto lotó. Pea te loto tautea ai ‘i he ‘Aho Fakamāú, pe loto ‘ata‘atā, ‘o fakatatau ki he ongoongo lelei ‘oku ou malanga‘í. Pea ‘e fakamāu‘i ai ‘e he ‘Otuá ‘ia Sīsū Kalaisi ‘a e ngaahi fakakaukau fakalilolilo ‘a e kakai kotoa pē.
Ko e Kakai Siú mo e Lao ‘a Mōsesé
17Ko e ni‘ihi ‘iate kimoutolu, ‘oku nau lau ko e kau Siu kinautolu. ‘Oku nau falala ki he Laó mo pōlepole‘aki ‘enau ‘ilo ‘Otuá. 18‘Oku nau fa‘a lau Folofola. Pea nau mahu‘inga‘ia ai he faitotonú mo ‘ilo ‘a e ‘ulungāanga ‘oku hoa mo e finangalo ‘o e ‘Otuá. 19Ko kinautolu, tokua, ‘oku nau tataki ‘a e kakai ‘oku kei kui honau laumālié. Tokua ‘oku nau ‘ave ‘a e māmá ma‘á e kakai ‘oku kei nofo fakapo‘ulí. 20‘Oku nau ‘ave, tokua, ‘a e potó ma‘á e kakai ‘oku kei hēhē noa‘ia ‘enau fonongá, mo fakahinohino ‘a e kakai ‘oku kei vaivai ‘enau mo‘uí. Pea, tokua, ko ‘enau ‘ilo Laó ko ‘enau ‘osiki ia ‘a e potó mo e mo‘oní.
21Tā koā ko e fu‘u kau faiako kinautolu. Ka ko e hā ‘oku ‘ikai te nau fie ako aí? Ko ‘enau malanga‘i ‘a e kakaí ke “‘Oua ‘e kaiha‘á,” he kuo tuku ‘enau kaiha‘á? 22Ko ‘enau malanga‘i ‘a e kakaí ke “‘Oua ‘e tono malí,” he kuo tuku ‘enau tono malí? Ko ‘enau fehi‘a he lotu tamapuá, he kuo tuku ‘enau kaiha‘a holo he ngaahi fai‘anga lotu tamapuá? 23Ko ‘enau pōlepole he Laó, he kuo tuku ‘enau talangata‘a ki he Laó? Ko hono mo‘oní kuo ongoongo-kovi ‘a e ‘Otuá ‘iate kinautolu. 24Ko e lau ‘a e Folofolá ki honau fa‘ahingá, “Kuo laukovi mai e kakai mulí ki he ‘Otuá, ko e ngāue ‘amoutolu ‘a e kakai Siú.”
25‘Oku nau lau ‘enau kamú, ka ko e toki ‘aonga ‘enau kamú ‘o kapau kuo nau talangofua ki he Laó. Ko ‘enau talangata‘a ki he Laó, ko e fakaongosia noa pē honau kamú. 26Ko hono mo‘oní, ka ‘i ai ha taha na‘e ‘ikai kamu ka ‘okú ne talangofua ki he ngaahi fekau ‘oku tu‘u he Laó, ‘e lau ia ‘e he ‘Otuá ko e toko taha kuo ‘osi kamu. 27Vakai na‘a toki talatalaaki‘i kimoutolu ‘a e kakai Siú ‘e ha kau ta‘e kamu! He kuo mou fakasītu‘a‘i ‘a e Laó, ‘osi angé kuo mou kamu, pea na‘e hiki pē ‘a e tohi Laó ma‘amoutolu tonu. Ka na‘e talangofua ‘a e fa‘ahinga ko eé ki he Laó, kae ‘osi angé ko e kakai kinautolu na‘e ‘ikai ke kamu fakasino.
28-29Tā ‘oku ‘ikai ko ho‘o tupu‘i Siú mo ho‘o kamú te ke hoko ai ko e Siu mo‘oni, ka ko ho‘o talangofua ki he Laó. ‘Oku ‘ikai ko e kamu ‘o e kakanó, ka ko e kamu ‘o e lotó. Ko e kamu ‘oku hoa mo e finangalo ‘o e ‘Otuá, ‘oku ‘ikai ko e kamu ia ‘oku fai ‘e he tangata, ke fakaai ‘a e Lao ‘a Mōsesé, ka ko e kamu ‘oku fai ‘e he Laumālie ‘o e ‘Otuá. Ko e Siu mo‘oní, ‘okú ne feinga ke hoa ‘ene mo‘uí mo e finangalo ‘o e ‘Otuá, ‘o ‘ikai ko e loto ‘o e tangatá.
Currently Selected:
Loma 2: TCNT
Highlight
Share
Compare
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
