Loma 15

Fakamu‘omu‘a ‘a e Kāingá

1Ko e fa‘ahinga ‘iate kitautolu ‘oku mālohi ‘enau tui ki he Otuá, mou kātaki‘i mu‘a ‘a e fa‘ahinga ‘oku vaivai ‘enau tuí. Tuku ‘etau holi ke fai pē ‘a e me‘a ‘oku sai kiate kitautolú. Ka tau feinga‘i mu‘a ‘etau me‘a kotoa ‘oku faí ke lelei ki he fa‘ahinga ‘oku vaivai ange ‘enau tuí. 2Tau tokanga ma‘u pē kiate kinautolu ke fai ha me‘a ‘e ala langa hake ai ‘enau mo‘uí, mo nau fiefia ai, hei‘ilo ‘e tupu fakautuutu ai ‘enau tui ki he ‘Otuá. 3Na‘a mo Kalaisi, na‘e ‘ikai te ne holi ke fai pē ‘a e me‘a na‘á ne loto ki aí. He ko e lau ki ai ‘a e Folofolá,

“Ko e lau kovi atu ‘a e kakaí kiate koé,

ko ‘enau lau kovi mai ai pē ia kiate au.”

4Pea ko e ‘uhinga foki hono hiki ‘o e ngaahi folofola kotoa ‘a e ‘Otuá, ke akonaki‘i mo poupou‘i ‘etau mo‘uí, hei‘ilo te tau lava ‘o fakatu‘amelie ai ki he kaha‘ú. 5‘Ofa ke tokoni‘i kimoutolu ‘e he ‘Otuá ke mou fa‘ifa‘itaki kia Kalaisi ‘o nofo fe‘ofo‘ofani. He ko e ‘Otuá pē taha ‘a e ma‘u‘anga ‘o e kātakí, mo e fiemālié. 6Ka pehē ho‘omou nofó, ‘e fai loto-taha ho‘omou hanga ki he ‘Otuá, ki he Tamai ‘a hotau ‘Eiki ko Sīsū Kalaisí.

Ko e Ongoongo-leleí ma‘a Māmani Kātoa

7Mou fāitaha, kae lāngilangi‘ia ‘a e ‘Otuá. Mou fāitaha, he na‘e fie taha ‘a Kalaisi mo kimoutolu. 8‘Io, ko e fie hifo ki lalo ‘a Kalaisi ‘o fai fatongia ma‘á e kakai Siú, ke mahino kuo fai ‘e he ‘Otuá ‘a e me‘a na‘á ne fakapapau‘i ange ki he‘enau ngaahi kuí te ne faí. 9Pea ‘ikai ngata aí, ka na‘e toe hoko mai ‘a Kalaisí hei‘ilo ‘e hanga ki he ‘Otuá ‘a e kakai mulí, koe‘uhi ko e lahi ‘ene manava‘ofa kiate kinautolú. He kuo hoko ‘o mo‘oni ‘a e lau ko eni ‘a e Folofolá,

“Te u viki‘i koe ki he ngaahi kakai mulí,

mo hiva fakamālō kiate koe.”

10Pea ko e kupu‘i Folofola eni ‘e taha ki he kakai mulí,

“Mou omi ‘o kaungāfiefia fakataha

mo e kakai ‘a e ‘Otuá.

11Ko e toe lau eni ‘e taha ‘a e Folofolá ki ai,

“Mou fakahīkihiki‘i ‘a e ‘Eikí,

‘a kimoutolu ‘a e kakai ‘o māmaní.

Mou omi, ‘a kimoutolu ‘a e ngaahi kakai mulí,

‘o lotu kiate ia.”

12Ko e lau eni ‘a ‘Aisea ki ai,

“‘E hopo hake ‘o tu‘i

ha taha he kāinga ‘o Tēvitá.

Pea ‘e fakaongoongo ki ai ‘a e ngaahi kakai mulí,

pea te nau fakatu‘amelie ‘iate ia

ki he kaha‘ú.”

13Tauange mo e ‘Otuá, ‘a ē ‘okú ne foaki ‘a e fakatu‘amelié, ke ne fakakakato atu ho‘omou fiefiá, mo ho‘omou nongá, koe‘uhi ko ho‘omou tui kiate iá. Pea ‘ofa ke taufetuku atu ‘a e ivi ‘o e Laumālie Mā‘oni‘oní kae tupu fakautuutu ai pē ho‘omou fakatu‘amelié.

Ko e Ngāue Fakamisinale ‘a Paula

14‘Oku ou tui, kāinga, ‘oku fe‘ofo‘ofani ‘aupito ho‘omou nofó, pea lahi ho‘omou ‘ilo ki he mo‘ui fetokoni‘akí. Pea ‘oku ou tui ‘oku mou lava lelei ‘o feako‘aki fakaekimoutolu. 15Ka kuó u fai atu ‘a e tohi ta‘e toe ufi ko ení ke fakamanatu atu ‘a e ngaahi me‘a ‘e ni‘ihi, koe‘uhi ko e fatongia na‘e fakakoloa ‘aki au ‘e he ‘Otuá. 16He na‘e fili au ‘e he ‘Otuá ke u fai fatongia ma‘a Kalaisi ki he kakai ‘oku ‘ikai ko e tupu‘i Siú, mo ngāue fakafaifekau ke fakamafola ‘a e ongoongoleleí. Ko e fai pehē ‘a e ‘Otuá, koe‘uhí kae hanga ‘e he Laumālie Mā‘oni‘oní ‘o fakahoko ‘a e kakai ‘oku ‘ikai ko e tupu‘i Siú ko ha me‘a‘ofa kuo fakatāpui ma‘ána mo hoa mo hono finangaló.

17Pea ‘oku tu‘unga ‘ia Kalaisi Sīsū ‘a e malava ke u touaki ‘eku ngāue kuo fai mai ma‘á e ‘Otuá. 18Ka te u touaki atu pē ‘a e me‘angāue ‘aki au ‘e Kalaisí. He na‘á ne me‘angāue ‘aki hoku ngutú mo hoku kakavá ki hono fakaului ha kakai ‘oku ‘ikai ko e tupu‘i Siú. 19Te u touaki atu pē ‘a e ngaahi mana mo e ngaahi me‘a fakaofo na‘e fai ‘e Kalaisi ‘iate au ‘aki ‘a e ivi ‘o e Laumālie Mā‘oni‘oní. He na‘á ku malanga‘i kakato ‘a e ongoongo-lelei ‘o Kalaisí mei Selusalema ‘o a‘u ki ‘Ililikumi. 20Pea kuo talu mei mu‘a mo ‘eku malanga pē he ngaahi feitu‘u kuo te‘eki ke fanongo ai ‘a e kakaí ‘ia Kalaisi. He ‘oku ou hangē ha tufunga ‘oku ‘ikai ke fie langa fale ‘i he funga ‘o ha tō pou ‘a ha tufunga kehé. 21Ko e lau eni ‘a e Folofolá ki aí,

“Ko kinautolu kuo te‘eki ai ke malanga‘i ange ia ki aí,

te nau ‘ā.

Pea ko kinautolu kuo te‘eki ai ke nau fanongo ‘i

ha lau kiate iá,

‘E maama honau ‘atamaí.”

Ko e Fie ‘A‘ahi ‘a Paula ki Loma

22Kuo fuoloa pē ‘eku fie ‘a‘ahi atu kiate kimoutolu, ka ko e fu‘u lahi pē ‘eku femo‘uekina he ngāué. 23-24Ka ko eni kuo lava hoku fatongia ‘i he feitu‘ú ni, pea kuo ta‘u lahi ‘eku fie ‘a‘ahi atú. Ko ia ai, kuó u fakakaukau ke u fou atu hena ki Sipeini. ‘Oku ou ‘amanaki te u ki‘i mālōlō si’i pē ‘iate kimoutolu pea mou toki tuku ange au ke hoko atu ‘eku folaú.

25-26‘Oku ou lolotonga fononga eni ki Selusalema mo e pa‘anga ‘ofa na‘e tānaki ‘e he ngaahi siasi Masitōnia mo ‘Ākeiá ma‘á e kau lotu ‘oku masiva ‘i Selusalemá. 27Ko e loto pē ‘o e ngaahi siasi Masitōnia mo ‘ākeiá ke fai ‘a e ‘ofa ko iá. Ka ko hono mo‘oní, ‘oku hangē pē ko ha‘anau tā mo‘uá. He na‘e loto fiemālie foki ‘a e kakai Siú ke ma‘u ‘inasi ‘a e kakai mulí mei he’enau ngaahi tāpuaki fakalaumālié. Pea ko e kakai mulí eni kuo nau loto ke ‘inasi ‘a e kakai Siú mei he‘enau ngaahi tāpuaki fakamatelié. Pea ‘oku taau pē ke pehē. 28Ka hili ange pē ‘eku ‘ave ‘a e pa‘angá, te u ‘alu atu ki hena, ‘o toki pehē atu ai ki Sipeini. 29‘Oku ou tui te u ‘a‘ahi atu ai mo e tāpuaki kakato ‘a Kalaisí.

30Kāinga, ‘oku ou kole fakamātoato atu ‘i hotau ‘Eiki ko Sīsū Kalaisí pea mo e ‘ofa ‘oku ‘omi ‘e he Laumālie Mā‘oni‘oní, ke tau kaungālotu fakataha. Pea mou toe lotu foki ma‘áku. 31Lotu mu‘a ki he ‘Otuá ke ne malu‘i au mei he kakai ‘i Siutea ‘oku ‘ikai ke nau tui kia Kalaisí, pea ke ne ‘ai ke tali fiemālie ‘e he kakai ‘a e ‘Eikí ‘i Selusalemá ‘eku tānaki me‘a‘ofa kuo faí. 32Pea mou kole ai pē ki he ‘Otuá ke u tū‘uta lelei atu kiate kimoutolu, mo mālōlō lelei mo fiefia ‘i hena. 33‘Ofa ke kau ‘a e ‘Otuá ‘iate kimoutolu hono kātoa. He ko e ‘Otuá pē foki ‘e maau ai ‘etau nofó. ‘Ēmeni

Currently Selected:

Loma 15: TCNT

Highlight

Compare

Copy