Loma 16
16
Ko e Ngaahi Pōpoaki ‘Ofá
1Ko e fefine ngāue tōtōivi ‘a Fīpē, ‘a e fefine ko ē ‘oku fai fatongia he siasi Senikeleá. 2Tuku ange mu‘a hano faingamālie. He ko e fefine falala ‘Otua ia, ko e fefine ‘oku kau he kakai ‘a e ‘Otuá. Tokoni‘i ia ‘i ha fa‘ahinga me‘a pē te ne masiva ai. He ko e kakai tokolahi kuó ne tokoni‘í, ‘o kau ai foki mo au.
3Tala hoku ‘ofa kia Pīsila mo ‘Ākuila. Ko e ongo me‘a ia na‘e ‘ikai ngata pē he‘ena fai fatongia fakataha mo aú, 4ka na‘e toe meimei mole ‘ena mo‘uí koe‘uhí ko au. ‘Oku hounga ‘ena ngāué kiate au pea mo e ngaahi siasi ‘o e kakai mulí. 5Tala hoku ‘ofa ki he ki‘i siasi ‘oku lotu ‘i hona ‘apí. ‘Ofa atu ki si‘oku kaume‘a ko ‘Epainetó. Ko e fuofua ului ia ‘i ‘Ēsiá kia Kalaisi.
6‘Ofa atu kia Mele. Ko e ngāue lahi kuó ne fai ma‘amoutolú.
7‘Ofa atu ki hoku ongo kāinga he toto ko ‘Anitalonaika mo Sūnia. Na‘á mau nofo pilīsone fakataha mo kinaua, pea kuo ongoongo-lelei ‘ena ngāué ki he kau ‘apōsitoló. Ko e ongo tangata foki kinaua na‘e tomu‘a Kalisitiane ‘iate au.
8‘Ofa atu ki si‘oku kaume‘a ko ‘Amipeleasí. Ko e tangata falala mo‘oni ia ki he ‘Eikí.
9‘Ofa atu ki hotau kaungāngāue mo‘oni ‘ia Kalaisi ko ‘Uapané. ‘Ofa atu ki si‘oku kaungāme‘a ko Sītakí.
10‘Ofa atu kia ‘āpeli. Ko e tama ngāue mateaki ia ma‘a Kalaisi. ‘Ofa atu kia ‘Alisitopulo mo honau ‘apí.
11‘Ofa atu ki hoku kāinga-toto ko Helotioní. ‘Ofa atu kia Nāsiso mo hono kāinga kotoa kuo Kalisitiané.
12‘Ofa atu kia Talaifina mo Talaivosa. Ko e ongo me‘a fai mālohi kinaua he ngāue ‘a e ‘Eikí. ‘Ofa atu ki si‘oku kaume‘a ko Pēsisí. Ko e fefine fai mālohi mo ia he ngāue ‘a e ‘Eikí.
13‘Ofa atu kia Lūfusi. Ko e toko taha ia ‘oku makehe atu ‘ene fai fatongia ma‘á e ‘Eikí. Pea ‘ofa atu ki he‘ene fa‘eé. He kuo talu mei fuoloa mo ‘ene tauhi faka-fa‘ē au.
14‘Ofa atu kia ‘Asinikalaito mo Felekoni mo Heamesi mo Patalopa mo Heamasi mo hotau ngaahi kaume‘a kotoa ‘oku nau nofó.
15‘Ofa atu kia Filoloko mo Sūlia mo Nīlio mo hono tuofefiné. Pea pehē pē kia ‘Olimipā mo e kāinga lotu kotoa ‘oku nau nofó.
16Ko ho‘omou fa‘a fe‘iloakí, pea mou fekita mu‘a ke ngali ko e kakai lotu kimoutolu. ‘Oku pōpōaki ‘ofa atu ‘a e ngaahi siasi kotoa ‘o Kalaisí.
17Kāinga, ‘oku ou kole fakamātoato atu ke mou tokanga na‘a fakatupu moveuveu mo fakafa‘afa‘ahi ha ni‘ihi hena ‘aki ‘enau ta‘e tali ‘a e ngaahi fale‘i na‘e fai atú. ‘Oua ‘e feohi mo ha fa‘ahinga pehē. 18He ko e fa‘ahinga ia ‘oku nau fai pē honau lotó kae tuku ‘a e finangalo ‘o e ‘Eikí. Ko e fa‘ahinga ia ‘oku anga fakahekeheke mo fie ngutu mālie. Pea kuo pau ke afe ai si‘a fa‘ahinga ‘oku kei vaivai. 19Kuo ongo atu ki he kakai kotoa pē ho‘omou fai ‘a e finangalo ‘o e ‘Otuá. Ka he‘ikai tuku ai ‘eku na‘ina‘i atu ke mou ‘ilo‘i lelei ‘a e ngaahi me‘a ‘oku tāú, mo sītu‘a ‘aupito ki he ngaahi me‘a ‘oku koví. 20Pea ‘e hanga leva ‘e he ‘Otuá ‘o e melino ‘o laiki ‘a Sētane ‘i homou lalo va‘é. He ko e ‘Otuá pē ‘e maau ai ‘etau nofó. ‘Ofa ke kau ai pē ‘iate kimoutolu ‘a e ‘Eiki ko Sīsū Kalaisí.
21‘Oku ‘ofa atu ‘a Tīmote, ‘a hoku kaungāngāué. Pea pehē pē ki hoku ongo kāinga ko Lūsio mo Sēsoni, pea mo Sosipeta.
22Ko au Teasio ‘oku ou ‘ofa atu. Ko homou kaungāfononga au. Pea ko au na‘á ku hiki ‘a e tohí ni.
23-24‘Oku fa‘a fakaafe‘i au ‘e Keio mo e siasí kātoa ki hono ‘apí. Pea ‘oku ‘ofa atu mo ia kiate kimoutolu. ‘Oku ‘ofa atu mo e motu‘a tauhi tohi ‘a e koló ni, ‘a Lāsito, pea mo si‘oku kaume‘a ko Kuató.
Ko e Lotu Faka‘osi ‘a Paula
25Tau fakafeta‘i ki he ‘Otuá! He ‘okú ne lava ‘o ‘ai ke mou ma‘u ivi lahi ‘i he ongoongo-lelei kuó u fakahā atú, ‘a e ongoongo ‘o kau kia Sīsū Kalaisí. Na‘e talu mei tuai mo e fufū ‘e he ‘Otuá ‘a e ongoongo-lelei ko iá. 26Pea toki a‘u mai ki he ngaahi ‘aho ko eni ‘otautolú, peá ne toki fakahaa‘i mai. Na‘e fekau ‘e he ‘Otua ta‘e ngatá ‘a ‘ene kau palōfitá ke nau fakamatala ki he ongoongo-lelei ko iá ‘i he ngaahi tohi na‘a nau hikí, hei‘ilo ‘e faifai pea tafoki ai ‘a e fonua kotoa pē ‘o tui ki he ‘Otuá. 27Ko e ‘Otuá, ‘oku taha pē. Pea ‘oku ‘ikai ha me‘a ‘e puli ki ai. Tau fakafeta‘i ma‘u ai pē kiate ia, koe‘uhí ko Sīsū Kalaisi! ‘Ēmeni.
Currently Selected:
Loma 16: TCNT
Highlight
Share
Compare
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
