Loma 14
14
‘Oua ‘e Fakamaau‘i Ho Kainga
1Mou feohi mo e kakai kotoa pē ‘oku tui ki he ‘Eikí. ‘Oua ‘e fakakikihi‘i ‘a e fa‘ahinga ‘oku vaivai ‘enau tuí. Pea ‘oua foki te mou fakamaau‘i kinautolu ‘i ha ngaahi me‘a ‘oku faikehekehe ai ho‘omou tuí. 2Ko e fakakaukau foki ‘a e ni‘ihi, ‘oku ngofua ‘a e fa‘ahinga me‘a tokoni kotoa pē ke te kai. Kae kai me‘akai vaivai pē ‘a e ni‘ihi ‘oku vaivai ‘enau tuí. 3‘Oua ‘e fakamaau‘i ha taha ko ha me‘atokoni ‘okú ne fie fakangofua pe tapui ke ne kai. He kuo ‘osi lau foki ia ‘e he ‘Otuá ko e tokotaha ia ‘i hono kakaí. 4Ko e hā ‘okú ke holi ai ke fakamaau’i e sevāniti ‘a e tokotaha kehe? Ko ho‘o fai peheé he ko hai koe? Ngata pē ‘i he ‘Eikí tonu ‘okú ne mafai ke fakamaau’i ‘ene kau ngāué. Pea kuo pau ke ne fakamaau’i kinautolu.
5‘Oku mahu‘inga kehekehe ki he kau lotu ‘e ni‘ihi ‘a e ngaahi ‘ahó, kae tatau‘ia ‘a e ni‘ihi ia he ngaahi ‘aho kotoa pē. Taki taha ‘ai ke pau ‘a e me‘a ‘oku tu‘u aí. 6Ko e ‘uhinga ‘oku fakafaikehekehe‘i ai ‘a e ngaahi ‘ahó ‘e he fa‘ahinga ko eé, he ‘oku nau fie fakaongoongolelei‘i honau ‘Eikí. Pea ko e kai kakano‘i manu ‘a e fa‘ahinga ko eé, ‘oku nau fai ‘aki ia ‘enau fakamālō ki he ‘Otuá, ‘o hangē pē ko e tapui ‘e he fa‘ahinga ko eé ‘enau kai kakano‘i manú mo fakamālō ai ki he ‘Otuá.
7Tau fakalāngilangi‘i pē mu‘a ‘a e ‘Otuá, kae tuku pē kitautolu, ‘o tatau ai pē pe te tau mo‘ui pe mate ai. 8‘E tatau ai pē pe te tau mo‘ui pe mate, ‘e ‘ikai uesia ai ‘etau kau he kakai ‘a e ‘Eikí. 9He ko e ‘uhinga ‘o e pekia ‘a Kalaisi peá ne toe tu‘u ‘o mo‘uí, koe‘uhí ka ne hoko ko e ‘Eiki ‘o e kakai kuo ‘osi maté, mo e kakai ‘oku kei mo‘uí. 10Tuku ā ho‘omou fakamāu‘i ‘a e mo‘ui ‘a e si‘i fa‘ahinga ko eé. Tuku e fie mā‘olungá. He kuo toe si‘i pea a‘u mai ‘a e ‘aho ‘e fakamāu‘i kātoa ai kitautolu ‘e he ‘Otuá. 11He kuo pehē mai ‘e he Otuá he Folofolá,
“‘Oku ou fakapapau‘i atu
‘e au ko e ‘Otua mo‘uí,
‘e tū‘ulutui ‘a e kakai kotoa pē,
‘o fakahīkihiki‘i au.”
12Tā kuo pau ke tau taki taha fehangahangai mo e ‘Otuá ‘o fakamatala ange ki ai ‘a e anga ‘o ‘etau nofo māmani na‘e faí.
Oua ‘e ‘Ai ke Faingata‘a‘ia ha Taha
13Tau tuku mu‘a ‘etau toe siosio holó. Pea fei mo tuku foki mo ‘etau veuki ‘a e tui ‘a e kakai kehé. 14Kuo ‘osi mahino kiate au ‘a e fakangofua ‘e he ‘Otuá ‘a e fa‘ahinga me‘atokoni kotoa pē ke tau kaí. He na‘e fakamahino mai ia ‘e he ‘Eiki ko Sīsuú. Ka ko ia ‘okú ne pehē ‘oku ‘ikai fe‘unga ‘a e ngaahi me‘atokoni ‘e ni‘ihi ke ne kai, pea fai ‘aki pē ia.
15He ka faingata‘a‘ia ha taha koe‘uhi ko ho‘o kai ha fa‘ahinga me‘atokoni, ‘oku ‘ikai te ke mo‘ui ‘aki ‘e koe ‘a e ‘ofá. Vakai na‘a hoko ho u‘á ko ha me‘a ke mate ai ha taha na‘e pekia ma‘ána ‘a Kalaisi. 16Vakai na‘a hoko ‘a e fakangofua koe ‘e he ‘Otuá ke ke kai fa‘iteliha peé ko ha me‘a ke ongoongo-kovi ai ‘a Kalaisi. 17Ko e pule‘anga ‘o e ‘Otuá ‘oku ‘ikai ko e kai mo e inu, ka ko e mā’oni’oni mo e melino, mo e fiefia ‘i he Laumālie Ma’oni’oní. 18Ka ke ka fai ‘aki ‘a e ngaahi me‘a ko iá e ngāue ‘a e ‘Otuá, pea ‘e hoa ho‘o mo‘uí mo e finangalo ‘o e ‘Otuá. 19Tau feinga mu‘a ke langa hake ‘etau mo‘uí he fe‘ofo‘ofaní mo e fetokoni‘akí.
20Vakai na‘a faifai angé kuo maumau‘i e ngāue ‘a e ‘Otuá ko ho‘o ‘uakaí. ‘Oku fe‘unga ‘a e fa‘ahinga me‘atokoni kotoa pē ke te kai. Ka ‘oku ‘ikai totonu ke faingata‘a‘ia ha taha koe‘uhi ko ha me‘atokoni ‘okú ne kai. 21Ko e fakapotopoto tahá, ke ‘oua pē te te ma‘u ha fa‘ahinga me‘atokoni, pe inu ha fa‘ahinga kava, pe fai ha fa‘ahinga me‘a ‘e faingata‘a‘ia ai ha taha. 22‘Ai pē ke ngata ‘ia koe mo e ‘Otuá ‘a e anga ho‘o tui ki he ngaahi me‘a peheé. ‘Oku sai ‘aupito ho‘o fai ta‘e veiveiua ho‘o me‘a kotoa peé. Kae ‘ofa pē ko e mo‘oni ho‘o pehē ‘okú ke fai ta‘e veiveiuá. 23He ko ho‘o kai ha me‘a mo veiveiua ho lotó pe ‘oku fe‘unga ke ke kai pe ‘ikai, ko e fehālaaki ia ho‘o me‘a ‘oku faí mo ho‘o tuí. Pea ‘oku kovi foki ia. He ko ho‘o fai ha me‘a ‘oku fesītu‘a‘aki mo ho‘o tuí, ko e angahalá ia.
Currently Selected:
Loma 14: TCNT
Highlight
Share
Compare
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
