Fakahā 17
17
Ko e Pa‘umutu mo e Manu Fekaí
1Na‘e pehē mai kiate au ‘e he toko taha he kau ‘āngelo ‘e toko fitu ne ‘iate kinautolu e ipu ‘e fitú, “Ha‘u, ka u fakahā atu ‘a e tautea ‘e fai ki he fu‘u pa‘umutu ‘iloá, ‘a e fu‘u kolo ‘oku tu‘u he ngaahi vaitafe lalahi. 2Na‘e fe‘auaki mo ia ‘a e ngaahi tu‘i ‘o māmaní, pea kuo konā ‘a e kakai ‘o māmani he inu he uaine ‘o ‘ene fakalieliá.”
3Pea ko e Laumālié na‘e fā‘ofale ‘iate au, pea ‘ave au ‘e he ‘āngeló ki ha feitu‘u toafá. Peá u sio ai ki ha fefine ‘oku heka ‘i ha fu‘u manu fekai kulokula, pea ko hono sinó kakato kuo tohi ai ha ngaahi hingoa manuki ki he ‘Otuá. Ko e manu fekaí na‘e ‘ulu ‘e fitu pea me‘a tui ‘e hongofulu. 4Ko e kofu ‘o e fefiné na‘e lanu-fisi‘ifekika mo kulokula, pea ko hono teuteú ko e koula ‘atā, mo e maka mahu‘inga, mo e mata‘itofe. Na‘e ‘i ai ‘ene ipu koula kuo fonu he ngaahi me‘a fakalielia mo fulikivanu kuó ne faí. 5Na‘e tohi ‘i hono la‘é ‘a e hingoa, ‘a ia ko hono ‘uhinga fakapulipulí eni,
“Ko Pāpilone Talaá,
ko e fa‘ē ia ‘a e kau pa‘umutu
mo e fakalielia kotoa ‘i māmani!”
6Peá u sio kuo konā e fefiné he toto ‘o e kakai ‘a e ‘Otuá mo e toto ‘o e fa‘ahinga na‘e fakapoongi koe‘uhí ko ‘enau mateaki‘i ‘a Sīsuú.
Na‘á ku fakatumutumu ‘aupito he‘eku sio ki he fefiné. 7Pea pehē mai ‘e he ‘āngeló, “Ko e hā ‘okú ke fakatumutumu aí? Te u fakamatala atu kiate koe ‘a e ‘uhinga fakapulipuli ‘o e fefiné, mo e manu fekai ‘oku heka aí, mo hono ‘ulu ‘e fitú mo e me‘a tui ‘e hongofulú. 8Ko e manu fekai ko ená, na‘e mo‘ui, ka ‘oku ‘ikai ke kei mo‘ui. ‘E toe ‘alu hake pē mei he fu‘u luó, pea ‘e ‘alu atu ke faka‘auha ia. Pea ‘e sio ki he manu fekaí ‘a e kakai ‘oku nofo ‘i māmani ka na‘e ‘ikai ke tohi honau hingoá ‘i he tohi ‘o e mo‘uí ‘i he te‘eki ke fakatupu ‘a māmaní, pea te nau fakatumutumu ai. He ko e manu fekai ko iá, na‘e ‘i ai ka kuo ‘ikai ke toe ‘i ai. Neongo pē ‘e toe ‘alu hake mei he fu‘u luó, ka ‘e faka‘auha ia. Pea ‘e sio ki he manu fekaí ‘a e kakai ‘o māmani na‘e ‘ikai ke tohi honau hingoá i he tohi o e mo‘ui ‘i he te‘eki ke tupu a māmani, pea te nau fakatumutumu ai. He na‘e ‘i ai ‘a e manu fekai ko iá, pea kuo ‘ikai ke toe ‘i ai, ka ‘e toe hoko mai.
9Ko ia ‘oku ‘atamai matalá ‘e mahino ki ai ‘a e me‘á ni. Ko e fo‘i‘ulu ‘e fitú, ko e ngaahi fo‘i mā‘olunga ‘e fitu ‘oku hekeheka ai e fefiné. Pea ko e tu‘i ai pē foki ia ‘e fitu. 10Ko e toko nima ‘iate kinautolu kuo ‘auha. Ko e toko taha ‘oku lolotonga pule, pea ko e toko taha ‘oku te‘eki ai ke hoko mai. Pea ka hoko mai, he‘ikai ke fu‘u fuoloa ‘ene pulé.
11Na‘á ke toe sio foki ki he manu fekai na‘e ‘i aí ka kuo ‘ikai ke toe ‘i aí. Ko e taha ia ‘o e ngaahi tu‘i ‘e fitú, ‘a ia ‘e toe hoko mai ko e tu‘i hono valú. Ka ‘e toe faka‘auha pē mo ia.
12Ko e me‘a tui ‘e hongofulu na‘á ke sio ki aí, ko ha ngaahi tu‘i mo ia ‘e hongofulu. Ka kuo te‘eki ai ke fakanofo kinautolu, pea ‘e fuoloa si‘i pē ‘enau kaungāpule mo e manu fekaí. 13‘Oku nau felotolotoi ke tuku ange ‘a ‘enau pulé mo honau mafaí ki he manu fekaí. 14‘E tau e ngaahi tu‘í mo e Lamí. Ka ko e Lamí te ne ikuná, he ko e ‘Eiki ia ‘o e ngaahi ‘eiki mo e Tu‘i ‘o e ngaahi tu‘i. Pea ko e kakai ‘oku kau mo iá ko e kakai kuo fili, ko e kakai makehe, pea ko e kakai fai mateaki.”
15Pea toe pehē mai ‘a e ‘āngeló kiate au, “Ko e ngaahi vai na‘á ke sio ‘oku ta‘utu mai ai ‘a e pa‘umutú, ko e kakai ia ‘o e ngaahi pule‘anga, matakali, lanu, mo e leá. 16‘E kamata ke tāufehi‘a ‘a e me‘atui ‘e hongofulú mo e manu fekaí ki he fefine pa‘umutú. Te nau hamu hono teuteú ‘o lī‘aki telefua ia. Te nau keina hono kakanó kae laku e toenga hono ‘anga‘angá ki he afi. 17Ko e ‘Otuá pē na‘á ne fakalotoa ‘a e ngaahi tu‘í ke tuku ange honau mafaí ki he manu fekaí kae ‘oua leva kuo hoko e folofola ‘a e ‘Otuá.
18Ko e fefine na‘á ke sio ki aí, ko e kolo talā ia ‘oku pule aoniu ki he ngaahi tu‘i kotoa pē ‘i māmani.
Currently Selected:
Fakahā 17: TCNT
Highlight
Copy
Compare
Share
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
