Fakahā 18
18
Ko e Kapa ‘o Pāpiloné
1Na‘e toe hā mai ha ‘āngelo ‘e taha ‘oku ‘alu hifo mei he langí. Ko e ‘āngelo mafai lahi, pea na‘e māmangia ‘a māmani kātoa ‘i hono lāngilangí. 2Peá ne kalanga le‘o-lahi,
“Kuo kapa!
Kuo kapa ‘a e kolo talā ko Pāpiloné
kuo nofo‘anga tēvolo,
ko e ‘ananga ‘o e ngaahi fa‘ahikehe,
mo e fanga manupuna mo e monumanu ‘uli kotoa pē.
3Kuo konā e ngaahi pule‘anga kotoa pē
‘i he uaine fakalielia ‘o Pāpiloné.
Kuo ‘osi fe‘auaki kotoa mo ia ‘a e ngaahi tu‘i ‘o māmani,
pea kuo tu‘umālie kotoa ‘a e kau fakatupu koloá
koe‘uhí ko ‘ene ngaahi holi koví.”
4Pea toe ongo mai ha le‘o ‘e taha
‘oku kalanga mai mei he langí,
“‘E hoku kakai,
mou hola mei Pāpilone.
‘Oua te mou kau ‘i he‘ene fai angahalá
na‘a mou kau ‘i hono tauteá.
5He kuo fokotu‘una ‘ene ngaahi angahalá
‘o tau ki langi.
‘Oku ‘ikai ngalo ‘i he ‘Otuá
‘ene ngaahi fakalielia kuo faí.
6Mou fai kiate ia
‘a e me‘a na‘á ne fai ki he kakai kehé.
‘Ai ke ne totongi ‘o liunga ua
‘a e me‘a na‘á ne faí.
‘Ai ke ne inu ‘o liunga ua
‘a e kava na‘á ne fakainu‘aki e kakai kehé.
7Na‘e kumi lāngilangi ‘a e fefiné na
he koloa mo e tu‘umālie.
Pe‘i fakapale‘i leva ia
‘aki ha faingata‘a mo ha mamahi.
Na‘e pehē pē ‘e Pāpilone ia ‘i hono lotó,
‘Ko e Kuini au!
He‘ikai te u uitou,
pe a‘usia ha mamahi.’
8Pea ko ia, te ne a‘usia ‘i ha ‘aho pē ‘e taha
‘a e ngaahi mamahi ‘o e mahaki, mo e honge, mo e mate.
‘E tutu hono ‘anga‘angá,
he ko e ‘Eiki ‘Otua Māfimafí ‘a hono fakamāú.”
9‘E tangilāulau ‘a e ngaahi tu‘i ‘o māmani na‘e fe‘auaki mo ia mo kau he‘ene mo‘ui fakalusá. Te nau sio ki he kohutu‘u ‘a e afi na‘e tutu ai iá, pea nau tangi halotulotu. 10Te nau manavahē he fakalilifu hono ngaahi mamahí, pea te nau fakamama‘o mei ai, mo fepehē‘aki,
“Toki me‘a faka‘ofa mo‘oni
ko e kolo haú
— ‘a e fu‘u kolo talaá!
Faka‘ofa ko Pāpilone!
Kuo hilifaki hono tauteá
‘i ha houa pē ‘e taha.
11‘E tēngihia mo fetāngihi ‘a e kau fakatupu koloa ‘o māmani, ko e ‘ikai ha taha ke toe fakatau ‘enau koloá, 12‘a e koula, mo e siliva, siueli, mata‘itofe, līneni auiiki, tupenu lanu-kulokula mo e lanu-moana, silika, mo e ‘akau namu-kakala mo e lei mo e ‘akau ‘iloa, polonise, ukamea, mo e maka-māpele, 13ko e sinamoni, sipaisi, ‘inisēnisi, mo e kakala manongi, ko e mula, mo e uiane, lolo, māhoa‘a mo e uite, ko e fanga pulu, mo e sipi, ko e fanga hoosi mo e sāliote, mo e kakai na‘e tu‘uaki fakatau, ‘io na‘a mo e laumālie ‘o e kakaí. 14Pea hanu ange ‘a e kau fakatupu koloá ki he fefiné,
“‘E Pāpilone,
Kuo ka‘anga kotoa
‘a e ngaahi me‘a na‘á ke mānumanu ki aí.
Kuo ‘auha ho‘o koloá mo ho lāngilangí.
Pea he‘ikai te ke toe ma‘u mai!”
15Na‘e tu‘umālie ‘a e kau fakatupu koloá. Ka nau sio ki he‘ene faingata‘a‘iá pea nau manavahē. Na‘a nau fakamama‘o meiate ia ‘o tēngihia mo tangilāulau, 16‘o nau pehē,
“‘Oiauē! ‘Oiauē!
‘A e kolo hau ko Pāpiloné!
Na‘á ke kofu līneni
mo teunga kula-pōpō‘uli mo kula-‘aho‘aho.
Ko hono teuteú na‘e koula ‘atā,
mo e maka-koloa mo e tofe!
17Ka kuo ‘auha e koloa ‘a e fefiné
‘i ha houa pē ‘e taha!”
Pea ko e kau ‘eikivaka kotoa, mo e kau folau vaka, mo e kau kauvaka, mo e fa‘ahinga kotoa pē ‘oku ma‘u ‘enau mo‘uí he fefolau‘akí, na‘a nau fakamama‘o meiate ia. 18Pea nau sio ki he kohutu‘u ‘a e afi na‘e tutu ai iá, pea nau kaila,
“Na‘e ‘ikai hano ua ‘o e fu‘u koló ni!”
19Pea nau fākafoa mo laku efu honau ‘ulú, pea nau pehē,
“‘Oiauē! ‘Oiauē!
‘A e kolo hau ko Pāpiloné!
Na‘e tu‘umālie kotoa ‘a e kau folau tahí
he koloa ‘a e fefiné!
Ka kuo ‘auha ia
‘i ha houa pē ‘e taha.”
20Ke hākailangitau ‘a langi he‘ene ‘auhá.
Mou fiefia e kakai ‘a e ‘Otuá,
mo e kau ‘apōsitoló,
mo e kau palōfitá!
He kuo tautea ‘a e fefiné
ko ‘ene me‘a na‘e fai kiate kimoutolú!
21Na‘e to‘o hake leva ‘e ha ‘āngelo kaukaua ha fu‘u maka ‘o lī ki he moaná mo ne pehē,
“‘E pehē ‘a hono lī hifo
‘o e fu‘u kolo hau ko Pāpiloné
ke ‘oua ‘e toe ‘iloa.
22‘E ‘ikai toe ongona ai
‘a e le‘o ‘o ha ha‘ape
pe ko ha kau hiva,
‘a e le‘o ‘o ha fangufangu pe ko ha talupite.
He‘ikai ke toe tu‘u ha fale ngaohi‘anga koloa
‘i he kolo ko iá.
‘E ‘ikai toe ongona ai ‘o ta‘e ngata
e le‘o ‘o e maka-momosi koané.
23He‘ikai ke toe ulo ha maama ‘i Pāpilone.
‘E ‘ikai toe fanongoa ai ha fuakava mali.
Na‘e hau ‘i māmani ‘ene kau fakatupu koloá,
peá ne kākaa‘i e ngaahi pule‘angá
‘aki ‘ene fakalou‘akaú.
24Kuo taano e ngaahi hala ‘o Pāpiloné
he toto e kakai ‘a e ‘Otuá,
mo e toto ‘o ‘ene kau palōfitá,
‘io, mo e toto ‘o e kakai kotoa pē kuo fakapoongi ‘i māmani.
Currently Selected:
Fakahā 18: TCNT
Highlight
Copy
Compare
Share
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
