Fakahā 16
16
Ko e Ngaahi Ipu Houhau ‘e Fitu
1Na‘e ongo mai ha le‘o ‘oku kaila mei he temipalé ki he kau ‘āngelo ‘e toko fitú, “Mou ō ‘o hua‘i ki māmani ‘a e ipu ‘e fitu e houhau ‘a e ‘Otuá.” 2Pea hua‘i ‘e he ‘uluaki ‘āngeló ‘ene ipú ki māmani. Pea laku mai ai ha ngaahi hangatāmaki palakū mo fakamamahi he sino ‘o e kakai kotoa pē ne ‘ai ‘iate kinautolu e faka‘ilonga ‘o e manu fekaí pea kuo nau lotu ki hono ‘īmisí.
3Pea hua‘i ‘e he ‘āngelo hono uá ‘ene ipú ki he loto tahí. Pea liliu ‘o toto ‘a e tahí, ‘o hangē ha toto ‘o ha taha kuo maté, pea mate ai mo e me‘a mo‘ui kotoa ‘i he tahí.
4Pea hua‘i ‘e he ‘āngelo hono tolú ‘ene ipú ki he ngaahi vaitafé mo e ngaahi matavaí. Pea liliu kotoa ai mo ia ‘o toto. 5Peá u fanongo atu ‘oku pehē mai ‘e he ‘āngelo ‘oku pule he vaí,
“Ko e ‘Otua mā‘oni‘oni koe,
talu mei mu‘a ‘i mu‘a,
pea ‘e pehē ai pē ‘a e ‘Afió na.
Na‘e taau pea totonu
‘a ho‘o fakamāú,
6He na‘a nau lilingi e toto ho kakaí
pea mo ho‘o kau palōfitá.
Pea talu ai pē ho‘o fakainu toto kinautolu,
He ko honau fo‘ui pē!”
7Na‘e ongo mai leva
ha kalanga mei he ‘ōlitá,
“‘Io, ‘Eiki ‘Otua Māfimafi,
‘oku ma‘a mo totonu
ho‘o fakamāú.”
8Na‘e hua‘i ‘e he ‘āngelo hono faá ‘ene ipú ki he la‘aá, pea vela ai e kakaí ‘o hangē kuo nau vela ‘i ha afí. 9Na‘e vela ‘a e kakai kotoa pē ‘i he‘ene fu‘u kakahá, pea nau lea kovi kotoa pē ki he huafa ‘o e ‘Otuá, koe‘uhí ko ‘ene pule ki he ngaahi faingata‘a fakamamahi ko ení kae ‘ikai ke ne ta‘ofi. Na‘e ‘ikai ha taha ‘e tafoki ki he ‘Otuá ‘o fakalāngilangi‘i ia.
10Na‘e hua‘i ‘e he ‘āngelo hono nimá ‘ene ipú ‘i he taloni ‘o e manu fekaí. Pea kaupō‘uli ai pē hono pule‘angá, pea u‘u ‘e he kakaí honau ‘eleló ‘i he hulu ‘enau faingata‘a‘iá. 11Pea nau lea-kovi ki he ‘Otua ‘oku pule ‘i he langí koe‘uhí ko honau ngaahi mamahí mo honau ngaahi hangatāmakí, ka na‘e ‘ikai ke nau tafoki ‘o tuku ‘enau faikoví.
12Na‘e hua‘i ‘e he ‘āngelo hono onó ‘ene ipú ‘i he fu‘u vaitafe ‘iloa ko ‘Eufaletesí, pea maha pakupaku ia, ‘o hoko ko e hā‘ele‘anga mai ‘o e ha‘a tu‘i mei Hahaké. 13Pea hū mai leva mei he ngutu ‘o e fu‘u ngatá ha laumālie-kovi na‘e hangē ha potó, pea hū mai mo ha laumālie-kovi pehē ‘e taha mei he ngutu ‘o e manu fekaí, mo e taha mei he ngutu ‘o e palōfita loí. 14Na‘e ma‘u mafai ke fai mana ‘a e ngaahi laumālie-kovi ko ení, pea nau a‘u ki he ha‘a tu‘i kotoa pē ‘i māmani ‘o uki mai ke tau‘i e ‘Otua Māfimafí. Ka ‘e hoko e ‘aho ko iá ko e ‘aho e ikuna lahi ‘a e ‘Otuá.
15Vakai na‘a ngalo e folofola ‘a Kalaisí, “‘E fakafokifā ‘eku ha‘ú, ‘o hangē ha kaiha‘á! Ka ‘e tāpuaki‘i kimoutolu ‘e he ‘Otuá ‘o kapau te u ha‘u ‘oku mou ‘ā mo mateuteu. He te mou hao ai he ‘alu tēlefua holo mo e fakamā ki he sio ‘a e kakaí.”
16Na‘e fetaulaki e ngaahi konga kaú he feitu‘u ‘oku ui faka-Hepelū ko Hamaketoni.
17Pea hua‘i ‘e he ‘āngelo hono fitú ‘ene ipú ki he ‘ataá, pea kalanga ha le’o mai mei he taloni he temipalé, “Kuo lava!” 18Pea pā e maná pea tapa e ‘uhilá, pea hoko mo e fu‘u mofuike fakalilifu taha talu e tupu ‘a māmani. 19Na‘e mafahifahi ai e kolo hau ko Pāpiloné ‘o konga tolu, pea holo e ngaahi kolo he ngaahi fonua kehé. Na‘e pehē hono fakainu ‘e he ‘Otuá ‘a Pāpilone he ipu uaine ‘o ‘ene houhaú. 20Na‘e feholaki e ngaahi ‘otu motú, pea tuku toi e ngaahi ‘otu mo‘ungá. 21Pea ngangana hifo mei langi ha ‘uha-maka ‘i he kakaí. Na‘e fe‘unga nai e mamafa ‘o e fo‘i maka ‘aisi taki taha mo e kilo ‘e nima ngofulu. Pea lea kovi ai ‘a e kakaí ki he Otuá koe‘uhí ko e fu‘u fakalilifu ‘a e ‘uha-maká.
Currently Selected:
Fakahā 16: TCNT
Highlight
Copy
Compare
Share
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
