Fakahā 14
14
Ko e Toko 144,000 na‘e Kau mo e Lamí
1Na‘á ku toe sio atu tā ‘oku tu‘u ‘a e Lamí ‘i Mo‘unga Saione. Pea ‘oku tu‘u fakataha mo ia ha fu‘u kakai ‘e toko 144,000 kuo tohi ‘i honau la‘é ‘a hono hingoá mo e hingoa ‘o ‘ene Tamaí. 2Pea ongo mai ha le‘o mei hēvani na‘e hangē ko e ‘u‘ulu ‘o ha ngaahi vai lahí, pe ko ha mana, pe ko ha ha‘ape ‘oku taá. 3Pea ko e toko 144,000, na‘a nau tu‘u ‘o hanga ki he taloní, mo e ngaahi me‘a mo‘ui ‘e faá, mo e kau mātu‘á, ‘o hua ha hiva fo‘ou. Na‘e ‘ikai ke lava ‘e ha taha kehe ‘o ako ‘a e hiva fo‘oú, tukukehe pē ‘a kinautolu na‘e fakahaofi mei māmaní. 4Ko e kakai anga-ma’a ‘a ia ‘oku nau kaungāfononga mo e Lamí ki ha feitu‘u pē te ne fou ki ai. Ko hono fakahaofi kinautolú koe‘uhí kae ‘oatu ko e fua tapu ma‘á e ‘Otuá mo e Lamí. 5Ko e kakai ‘oku ‘ikai ngutu-loi, ko e kakai ta‘e mele.
Ko e Ngaahi Fekau ‘a e Kau ‘āngelo ‘e Toko Tolú
6Pea na‘e toe hā mai ha ‘āngelo ‘oku puna hake he ‘ataá mo e ongoongo lelei ta‘e ngata ke tala ki he kakai ‘o e ngaahi ha‘a, matakali, lea, mo e pule‘anga kotoa pē ‘i māmani. 7Pea kaila e ‘āngeló, “Fakahīkihiki‘i mo fakalāngilangi‘i ‘a e ‘Otuá! Kuo hokosia e ‘aho ke ne fakamāu‘i e kakai kotoa pē. Mou tū‘ulutui ki he toko taha na‘á ne fakatupu ‘a e langí mo māmani, ‘a e tahí mo e ngaahi matavai kotoa pē.”
8Pea hoko mai e ‘āngelo ‘e taha, ‘o ne pehē, “Kuo kapa, kuo kapa ‘a Pāpilone talā, ‘a e kolo na‘á ne fakainu e ngaahi pule‘anga kotoa he uaine ‘o ‘ene fakalieliá!”
9Pea toki hā mai ‘a e ‘āngelo hono tolú ‘o kaila,
“Ko e me‘a eni ‘e hoko kiate kimoutolu ‘o kapau te mou kei lotu ki he manu fekaí mo hono ‘īmisí, mo ‘ai hono faka‘ilongá ‘i homou nimá, pe ko homou la‘é. 10Te mou inu he uaine ‘oku fakainu‘aki ‘e he ‘Otuá ‘a kinautolu ‘oku fakatupu houhau kiate ia. ‘E hoko kiate kimoutolu hono houhau lahí, pea ‘e fakamamahi‘i‘aki kimoutolu ‘a e afi, mo e sūlifa kakaha, kae tu‘u pē ‘a e Lamí mo e kau ‘āngelo mā‘oni‘oní.
11Kapau te mou lotu ai pē ki he manu fekaí mo hono ‘īmisí, mo tali e faka‘ilonga hono hingoá, ‘e fakamamahi‘i kimoutolu he ‘aho mo e pō. ‘E kohu ‘a e afi ko homou fakamamahi‘í, pea ‘e ‘ikai ke mou ma‘u ha fiemālie ‘o ta‘e ngata.
12Ko kimoutolu e kakai ‘a e ‘Otuá, mou ako leva ‘a e fa‘a kātakí, mo talangofua ki he‘ene fekaú, mo tui kia Sīsū.
13Pea ongo mai ha le‘o mei he langí na‘e pehē, “Tohi eni. ‘E tāpuaki‘i ‘e he ‘Otuá ‘a kinautolu ‘oku pekia ‘i he Eikí, mei he ‘ahó ni ‘o fai atu.”
Pea tali mai ‘e he Laumālié, “‘Io, ka hili ‘enau fakaongosiá te nau fiemālie, he ‘e muimui atu ‘iate kinautolu ‘enau ngaahi ngāué.”
Ko e Utu-Ta‘u ‘o Māmani
14Na‘e hā mai mo ha konga ‘ao hinehina ‘oku heka ai ha taha na‘e hangē ko e Foha e Tangatá. Na‘e kalauni koula, pea to‘o ha hele tutu‘u uite māsila. 15Pea hū mai ha ‘āngelo mei he Temipalé ‘o kalanga, “To‘o ho‘o helé ‘o tutu‘u e ta‘ú! He ko e ‘aho utu ta‘ú eni, pea kuo motu‘u e ta‘ú ‘i māmani kātoa.” 16Pea ‘ai mai‘e he toko taha na‘e heka he konga ‘aó ‘ene hele tutu‘ú ‘o tutu‘u e uité ke tānaki.
17Pea toe hū mai ha ‘āngelo ‘e taha mei he Temipalé mo e hele tutu‘u uite māsila. 18Pea hili iá, na‘e hū mai e ‘āngelo ‘oku mafai ki he afí ‘o ne kaila ki he ‘āngelo na‘e ‘i ai e helé, “Kuo momoho e kālepi kotoa ‘i māmani! To‘o ho‘o hele māsilá ‘o tutu‘u.” 19Pea to‘o leva ‘e he ‘āngeló ‘ene helé ki māmani ‘o tutu‘u e ngaahi fuhinga kālepí ‘o laku ki ha luo ke tāmoloki ai, ko e faka‘ilonga ia e houhau ‘a e ‘Otuá. 20Na‘e tu‘u e luó he tu‘akoló. Pea ko ‘ene tāmoloki pē ‘a e kālepí, kuo tafe mai mei ai e toto. Na‘e hoko e totó ko ha fu‘u vaitafe na‘e kilomita ‘e tolu ngeau tupu hono lōloá pea mita ‘e taha mo e konga nai hono lolotó.
Currently Selected:
Fakahā 14: TCNT
Highlight
Copy
Compare
Share
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
