Fakahā 13
13
Ko e Ongo Manu Fekai
1Peá u toe sio atu ‘oku hake mai mei tahi ha fu‘u manu fekai ‘oku ‘ulu ‘e fitu pea me‘atui ‘e hongofulu, pea ko e ngaahi me‘atui ‘e fitú na‘e ‘i ai hano kalauni taki taha. Na‘e tohi ‘i hono ngaahi ‘ulu ‘e fitú ha ngaahi hingoa ‘oku laukovi ki he ‘Otuá. 2Pea ko e manu fekai na‘á ku sio ki aí, na‘e hangē ha lēpatí, pea ko hono va‘é na‘e hangē ha peá, kae hangē ha laioné ‘a hono ngutú. Na‘e ‘oange ‘e he fu‘u talākoni ki he manu fekaí ‘a hono mālohí, mo hono taloní, pea mo hono fu‘u mafaí. 3Ko hono fo‘i ‘ulu ‘e taha, na‘e hangē na‘e lavea ‘o mei mate ka kuo toe mo‘uí, pea fakatumutumu e kakai kotoa pē ‘i māmani ‘i he manu fekai ko ení. 4Na‘a nau punou ‘o lotu ki he fu‘u talākoní na‘á ne tuku ange hono mafaí ki he manu fekaí, mo nau lotu ai pē ki he manu fekaí, ‘o nau pehē, “‘Oku ‘ikai ala fakauoua‘i ‘a e fu‘u manu fekaí. ‘Oku ‘ikai pē ha taha te ne lava ‘o tu‘u atu ki ai.”
5Na‘e tuku ai pē ‘a e manu fekaí ke fie lahi, mo fie ‘otua, mo fie pule, ‘o fe‘unga mo ha māhina ‘e fāngofulu mā ua. 6Na‘e laukovi ‘a e manu fekaí ki he ‘Otuá, pea mo hono huafá. Pea a‘u pē ki he‘ene laukovi ki he feitu‘u ‘oku ‘afio ai ‘a e ‘Otuá mo e fa‘ahinga kotoa pē ‘oku nofo fakataha mo e ‘Otuá ‘i langi. 7Na‘e tuku ke ne tau‘i e kakai ‘a e ‘Otuá ‘o ikuna. Pea na‘e fakamafai‘i ke pule ki he kakai ‘o e ngaahi matakali, mo e pule‘anga, mo e lea, mo e lanu kotoa pē. 8Pea ‘e lotu ki ai ‘a e kakai kotoa pē ‘oku nofo ‘i mamani, ka ‘oku ‘ikai ke tohi honau hingoa ‘i he tohi ‘o e lami kuo tamate’i, talu mei he fakatupu ‘o mamaní.
9Ko ena ‘oku mou lau kimoutolu ko e kakai telinga ongo,
pe‘i fanongo mai.
10Ka kuo pau ke puke pōpula koe,
pea ‘e puke pōpula koe.
Ka kuo pau ke tāmate‘i ‘aki koe ha heletā,
pea ‘e tāmate‘i ‘aki koe ha heletā.
‘O mahino ai kuo pau ke fa‘a kātaki mo fai mateaki e kakai ‘a e ‘Otuá.
11Pea na‘e hā mai kiate au ha manu fekai ‘e taha ‘oku ‘alu hake mei lolo fonua. Na‘e me‘atui ‘e ua ‘o hangē ha lamí, ka ko hono fu‘u le‘ó na‘e fakamanavahē ‘aupito.#13:11 Ko hono faka-Kalisí: “Ko hono leó na‘e hangē ko e le‘o ‘o ha fu‘u talākoní.” 12Na‘e ngāue‘aki ‘e he manu fekai ko ení ‘a e mafai kakato ‘o e ‘uluaki manu fekaí, ‘a ia na‘e lavea ‘o mei mate ka kuo toe mo‘uí, ko hono fakamālohi‘i ‘a māmani mo hono kakaí ke nau lotu ki he ‘uluaki manu fekaí. 13Na‘á ne fai ha ngaahi me‘a fakaofo, pea a‘u pē ki he‘ene ‘ai ke ‘alu hifo ha afi mei he ‘ataá kae sio pē ‘a e kakaí.
14Ko e manu fekai hono uá, na‘á ne kākaa‘i e kakaí ‘aki ‘ene fai e ngaahi me‘a fakaofo ma‘á e ‘uluaki manu fekaí, mo ne fakalotoa e kakaí ke nau ngaohi ha ‘īmisi ‘o e manu fekai na‘e lavea he heletā kae ‘ikai maté. 15Na‘e fakangofua ke ne ‘ai ke mānava ‘a e ‘īmisí koe‘uhí ke lava ‘o lea. Pea ko kinautolu kotoa pē na‘e ‘ikai loto ke lotu ki he ‘īmisi ‘o e manu fekaí, na‘e tāmate‘i. 16Na‘e fakamālohi‘i e kakai kotoa pē ke nau ‘ai ha faka‘ilonga ‘i honau nima to‘omata‘ú, pe ko honau la‘é, ‘o tatau ai pē ‘a e kakai ma‘u mafaí mo e ta‘e ma‘u mafaí, mo e kakai koloa‘iá mo e masivá, mo e tau‘atāina pea mo e pōpula. 17Na‘e pau ke nau ‘ai kotoa ‘a e faka‘ilonga ‘o e manu fekaí, he ka ‘ikai te nau ‘ai ia pea ‘e tapu ke nau fakatau atu pe fakatau mai ha koloa. He ko e faka‘ilongá, na‘e ‘uhinga ki he hingoa ‘o e manu fekaí pea mo e fika ‘o hono hingoá.
18Kae ngata pē ‘i ha taha ‘atamai matala ‘e mahino ki ai ‘a e fika ‘o e manu fekaí. ‘Io, kapau ko e toko taha ‘atamai a‘u koe, te ke lava pē ‘o mākupusi. Ko hono fiká ko e 666, pea ‘oku ‘uhinga ia ki ha tangata.
Currently Selected:
Fakahā 13: TCNT
Highlight
Copy
Compare
Share
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
