Ngāue 27

1Na‘e a‘u ki he ‘aho na‘e tu‘utu‘uni ke mau folau ai ki ‘Italí, pea ‘ave ‘a Paula mo ha kau pōpula kehe ke tauhi ‘e Suliasi, ko e ‘eikitau he kongakau makehe na‘e ui ko e “Kongakau ‘a ‘Akositani.” 2Pea mau heka he vaka ‘Atalamaito na‘e teu folau atu ki ha ngaahi taulanga ‘i ‘Ēsia, ‘o mau tuku folau.

Na‘a mau folau fakataha mo ‘Alisitako, ko e tangata Masitōnia.

3Pea ko e ‘aho hono hokó, na‘a mau tū‘uta ki Saitoni.

Na‘e ‘ofa lahi ‘a e ‘eikitaú, ‘a Suliasi, kia Paula ‘i Saitoni. He na‘á ne ‘o faka‘atā ‘a Paula ke ‘a‘ahi ki hano ngaahi kaungāme‘á, koe‘uhí ke nau tokanga kiate ia.

4Pea ko ‘emau tukufolau mei Saitoní, kuo angi mālohi mai e matangí mei mu‘a, pea mau lele fakaūū atu ai pē he motu ko Saipalo.

5Na‘a mau pehē atu ai pē ‘i Silisia mo Pamifilia ‘o tau ki he taulanga ko Maila ‘i Līsia. 6Pea kumi ai ‘e he ‘eikitaú ‘a e vaka ‘Alekisānitia na‘e teu folau ki ‘Itali, peá ne fakaheka kimautolu ki ai.

7Na‘a mau folau māmālie atu ai pē ‘i ha ngaahi ‘aho, ‘o mau a‘u ki he matātahi ‘o e kolo ko Naitusi. Ka na‘e faingata‘a ‘emau a‘u ki aí, ‘o ‘ikai ke mau toe lava ‘o hoko atu he halanga vaka ko iá ko e kovi e tu‘u ‘a e matangí. Pea talu ai pē ‘emau fakalaka ‘i Salamone ‘o lele fakaūū atu ai pē he motu ko Kēlití.

8Na‘a mau fakateletele ai pē he motu ko iá, ‘o faifai atu pē, ‘o mau tau ki he taulanga ko Taulanga Lelei he ofi atu ki he kolo ko Laseá.

9Na‘e fu‘u fuoloa ‘emau taulanga aí. Pea kuo ‘ikai ke kei fe‘unga e matangí mo e folaú. He kuo ‘osi fuoloa ‘a e mahili atu ‘a e ‘Aho Fakaleleí. 10Na‘e lea ‘a Paula ki he kauvaká ‘o ne pehē ange, “Kau tangata, mou fanongo mai. Ka hoko atu ai pē ‘etau folaú, pea kuo pau ke maumau lahi hotau vaká mo e utá, pea ‘e mate ai ha tokolahi.” 11Ka na‘e falala pē ‘a e ‘eikitaú ia ki he ‘eikivaká, kae tuku e lau ‘a Paulá.

12Ko Taulanga Leleí, na‘e ‘ikai ko ha taulanga lelei ke fai ai ha fakauū he fa‘ahi ta‘u momokó. Pea loto ai ‘a e tokolahi taha he kau kauvaká ke mau ‘ahi‘ahi folau atu he matātahi ‘o Kēlití, hei‘ilo te mau lava ki Fīnisi. Ko e taulanga ‘i Fīnisí na‘e ava ki he tonga-hihifó mo e tokelau-hihifó, ‘o faingamālie ke mau fakaū ai ke ‘osi e fa‘ahi ta‘u afaá.

Ko e Afāngia ‘i Tahi

13Na‘e faifaí pea angi faka-tonga mai e matangí, pea pehē ai ‘e he kau tangatá ke fai ā ‘enau fakakaukau ko iá. Pea nau fusi taula ‘o tukufolau atu he matātahi Kēlití. 14Kae te‘eki ai ke fuoloa, kuo tō mai mei ‘uta ‘a e matangi mālohi na‘e ui ko e Tokelau-Hahake. 15Na‘e fu‘u mālohi e matangí, ‘o ‘ikai te mau toe lava ‘o folau. Pea mau tuku ai pē ke ‘auhia ai e vaká he matangí.

16Pea faifai atu ‘emau tēkiná, ‘o tuku mai e muifonua faka-tonga ‘o e ki‘i motu ko Kalauta. Pea mālō pē ‘emau lava ‘o fakahaofi homau vaka fokotu‘ú, 17he na‘e meimei mole. Kae faifai pē pea mau lava ‘o toho ki vaka, pea lalava maea leva ‘e he kau kauvaká ‘a e vaka lahí ke ‘oua ‘e movete ia, pea nau pelu lā kae tuku ke pāpaea pē e vaká, ko ‘enau manavasi‘i na‘a tūkia ‘i Sītela.

18Na‘e fakailifia ‘a e mālohi ‘o e afaá. Pea ko e ‘aho hono hokó, na’e laku ki tahi ‘e he kau kauvaká ha konga ‘o ‘emau utá. 19Pea ko e ‘aho hono tolú, na‘a nau laku mo e konga ‘o e nāunau vaká. 20Na‘e laulau ‘aho mo e hala ke ‘asi mai e la‘aá, pe ko e fetu‘ú, pea angi mālohi e matangí, ‘o hoko ai pē mo e ‘osi‘osingamālie ‘emau ‘amanaki ke haó.

21Na‘e fuoloa ‘emau ta‘e ma‘u ha me‘a tokoní. Pea tu‘u ai ‘a Paula ‘o lea ki he kau tangatá, “Na‘e totonu ke mou tui mai kiate au. Ka ne tau fakauū ai pē ā ‘i Kēliti, na‘e ‘ikai ke hoko ‘a e maumau mo e mole ko ení. 22Kae fiemālie mu‘a homou lotó, he te mou hao pē. Ko e vaká pē ‘e molé.

23He na‘e hā mai kiate au ‘anepō ha ‘āngelo ‘a e ‘Otua ‘oku ou lotu ki aí. 24Peá ne pehē mai kiate au, “‘E Paula, ‘oua ‘e loto-si‘i. He kuo pau ke ke a‘u kia Sisa. He ‘e fakahaofi ‘e he ‘Otuá ho‘omou kau folau kotoa pē koe‘uhí ko koe.” 25Pea pehē ange ‘e Paula ki he kau kauvaká, “‘Oua te mou loto-si‘i. ‘E fai pē ‘e he ‘Otuá ‘a e me‘a kuó ne tala‘ofa‘aki maí. 26Ka kuo pau ke tau tomu‘a hilifakia ‘i ha motu.”

27Na‘e fe‘unga mo e ‘aho ‘e taha fā mo e pō ‘e taha fā ‘emau afāngia holo he Tahi Meteleniané. Pea ofi ki he vaeua poó kuo fakatokanga‘i ‘e he kau kauvaká ‘oku mau ofi ki ‘uta. 28Pea nau tukutuku, ko e fute ‘e teau ua noa ‘a e lolotó. Pea fuoloa si‘i mei ai pea nau toe tukutuku, kuo fute pē ‘e hivangofulu. 29Pea manavasi‘i e kau kauvaká na‘a mau hilifakia, ‘o nau tuku atu ha taula ‘e fā mei taumuli mo ‘enau lotu ke fei mo ‘aho mai.

30Pea kuo holi e kau kauvaká ke hola, ‘o nau tukutuku hifo e vaka fokotu‘ú ki tahi, ko ‘enau ‘ai ke pehē tokua ko ‘enau lī taula mei taumu‘a. 31Kae pehē ange ‘e Paula ki he ‘eikitaú, kia Suliasi, mo ‘ene kau sōtiá, “Kapau ‘e ikai nofo pē ‘i vaka ‘a e kau kauvaká, pea ‘e ‘ikai ‘aupito te mou hao kimoutolu.” 32Pea hanga ‘e he kau sōtiá ‘o tu‘usi e ngaahi maea na‘e ha‘i ‘aki e vaka fokotu‘ú, ‘o nau tuku ke homo e vaka fokotu‘ú ki tahi.

33Pea ko ‘ene ofi ke ‘aho haké, pea lea ange ‘a Paula ki he kau folaú ke nau ma‘u mu‘a ha me‘a tokoni. Na‘á ne tala ange ‘e ia kiate kinautolu, “Ko e ‘aho eni ‘e taha fā mo e te‘eki ai ke mou ma‘u ha momo‘i me‘a tokoni. 34Mou kai mu‘a ke ‘i ai hamou ivi ke mou hao. He ‘oku ou tala atu, na‘a mo hamou lou‘ulu ‘e taha ‘e ‘ikai mole.”

35Pea hili e lea ko ia ‘a Paulá, peá ne to‘o mai ha konga mā ‘o fakamālō ai ki he ‘Otuá. Peá ne toki pakipaki ‘o kai e konga ka nau sio mai. 36Na‘e fakalotolahi‘i ai kinautolu ‘o nau taki taha ma‘u ha ki‘i me‘i me‘a tokoni.

37Na‘e toko ua ngeau fitu ngofulu mā ono ‘emau kau folaú.

38Pea ‘osi ‘enau kaí, pea nau laku leva ki tahi ‘enau fu‘u uta uité ke ma‘ama‘a ange ai e vaká.

Ko e Fakahake ‘o e Vaká

39Pea pongipongi haké kuo ‘asi mai e matāfonuá, ka na‘e ‘ikai ke mahino ki he kauvaká pe ko e matāfonua ‘o fē. Ka na‘a nau fakatokanga‘i atu ha ki‘i kōmaki mo hono fanga. Pea nau pehē ke fakahake e vaká ki he fanga ko iá. 40Na‘a nau tu‘usi e ‘ū taulá ‘o lī‘aki pea nau vete ‘a e ‘ū maea na‘e ha‘i ‘aki e fohe ‘ulí. Pea ‘osi iá pea nau fusi lā ‘i taumu‘a kae tuku ke faka‘oho atu e vaká ki ‘uta. 41Ka na‘e tūkia e vaká ia, ‘o toka e taumu‘á he ‘one‘oné kae foa ‘a e taumulí he fasi mai e ngaahi fu‘u peaú.

42Pea pehē ‘e he kau sōtiá ke tāmate‘i e kau pōpulá. He ka ‘ikai, tokua te nau hopo ki tahi ‘o hola. 43Ka ko e loto ‘o e ‘eikitaú, ‘a Suliasi, ke fakahaofi ‘a Paula, ‘o ‘oua ‘e tuku ke fai e fakakaukau ‘a e kau sōtiá. Peá ne fekau ai ke hopo ki tahi e fa‘ahinga kotoa na‘e poto he kakaú ‘o kakau ki ‘uta, 44kae taki taha fakasio ‘e hono toé ha konga papa pe alangavaka ke me‘a kakau ‘aki. Pea faifai pea hao ki ‘uta hono kotoa ‘emau kau folaú.

Currently Selected:

Ngāue 27: TCNT

Highlight

Copy