Ngāue 26
26
Ko e Tali ‘a Paula kia ‘Akilipá
1Na‘e pehē ange ‘e ‘Akilipa kia Paula, “Fai ā ha‘o fakamatala kiate koe.” Pea fai leva ‘e Paula ‘ene faka‘apa‘apa kia ‘Akilipa, peá ne toki pehē ange toki kiate ai, 2“‘E Ho‘o ‘Afio, ‘Akilipa, ‘oku ou lau ko hoku monū ‘eku ma‘u faingamālie he ‘ahó ni ke fai atu ha‘aku fakamatala ki he ngaahi me‘a kotoa kuo faka‘ilo ai au ‘e he kau Siu ko ení. 3‘Oku maheni lelei ‘a e ‘Afió na ki he ngaahi ouau tukufakaholo kehekehe mo e ngaahi ‘uhinga ‘oku mau fa‘a alea ai ‘a kimautolu e kakai Siú. Pea ‘oku ou kole atu ai kiate koe ke ke āfeitaulalo mu‘a ‘o me‘a fakalelei ki he fakamatala te u faí.
4-5Talu ‘eku kei si‘i mo e mea‘i lelei ‘e he kakai Siu kotoa pē ‘eku fa‘ahinga mo‘uí, ‘i he fonua na‘á ku tupu aí, pea pehē pē foki ki Selusalema. Pea ka ne nau loto ke lea heni, na‘a nau fakamo‘oni‘i atu ‘eku kau he fa‘ahi ‘a e kau Fālesí, ko e fa‘ahi lotu fai mateaki taha pē ia ‘a e kakai Siú. 6Pea ko eni, kuo fokotu‘u au ‘i hení koe‘uhí ko ‘eku tui ki he tala‘ofa na‘e fai ‘e he ‘Otuá ki homau kakaí ‘i ono‘ahó, 7‘a e tala‘ofa pē ko ē ‘oku faka‘amu ke a‘usia ‘e he matakali ‘e hongofulu mā ua ‘o homau kakaí ‘aki ‘enau fai e ngāue ‘a e ‘Otuá he ‘aho mo e pō. Ko ‘eku fakatu‘amelie ko iá, ‘e Ho‘o ‘Afio, ‘Akilipa, ko ia kuo faka‘ilo ai au ‘e he kau taki ‘o e kakai Siú. 8Ko e hā ha me‘a ke tāla‘a ai ha taha ‘iate kimoutolu ki he fokotu‘u ‘e he ‘Otuá ‘a e kakai maté ke mo‘uí?
9Na‘a mo au na‘á ku ‘uluaki lau pē ‘oku totonu ke u fai hoku tūkuingatá hono fakafepaki‘i e ngāue ‘a e tangata Nāsaleti ko Sīsuú. 10Na‘á ku fua fakafepaki‘i ia ‘i Selusalema, ‘aki ‘eku ma‘u mafai mei he kau taula‘eiki pulé ke fakahū pōpula ‘a e kakai tokolahi ‘a e ‘Otuá. Pea a‘u ai pē ki he‘eku kau he hikinima ke tāmate‘i kinautolú. 11Na‘e tā tu‘o lahi mo ‘eku fekau ke tautea kinautolu ‘i homau ngaahi fai‘anga fakatahá, mo ‘eku feinga ke nau lī‘aki ‘enau tuí, ‘o u a‘u ai pē ‘i he‘eku ‘ita ‘o kumi kinautolu ki he ngaahi fonua muli ‘o fakatanga‘i ai pē.
12Pea ko e ‘aho hono hokó, ‘e Ho‘o ‘afió, na‘e fai ‘eku fononga ki Tāmasikusi, ko hoku fakamafai‘i ‘e he kau taula‘eiki pulé. 13Pea ofiofi pē ke ho‘ataá, kuo hoko mai ha fu‘u maama ‘oku ngingila ange he la‘aá, ‘oku huhulu hifo mei he langí, ‘o hulungia au mo kinautolu kotoa pē na‘a mau fonongá. 14Na‘a mau tō kotoa pē ki lalo. Pea ongo mai ha le‘o ‘oku pehē mai he lea faka-‘Alameá, ‘‘E Saula, Saula! Ko e hā ‘okú ke fakatanga‘i ai aú? ‘Oku fakatu‘utāmaki kiate koe ho‘o o‘i mai kiate aú.’
15‘He ko hai koe?’ Ko au atu ia.
Pea tali mai ‘e he ‘Eikí, ‘Ko Sīsū au, pea ko au ia ‘okú ke fakatanga‘í. 16Tu‘u ki ‘olunga!
Ko ‘eku hā atu ko eni kiate koé, he kuó u fili koe ke ke hoko ko ‘eku tamaio‘eiki. Te ke fakamatala ki he kakaí ‘a e me‘a kuó ke ‘ilo ‘o kau kiate aú, pea mo ia te u toki fakahā atu amui ange.’
17Pea toe pehē mai ‘e he ‘Eikí, ‘Te u malu‘i koe mei he kakai Siú pea mo e kakai muli te u fekau ke ke ‘alu ki aí. 18‘Oku ou loto ke ke faka‘ā honau matá ka nau tafoki mei he fakapo‘ulí ki he māmá, mei he ivi ‘o Sētané ki he ‘Otuá. Pea ‘e fakamolemole‘i ‘enau ngaahi angahalá koe‘uhí ko ‘enau tuí, mo fakakau kinautolu ki he kakai kuo fili ‘e he ‘Otuá.’
19Pea ko ia ai, ‘e Ho‘o ‘Afio, ‘e ‘Akilipa, na‘e ‘ikai te u faka‘ikai‘i e me‘a na‘e fakahā mai mei hēvaní. 20Na‘e talu pē mei ai mo ‘eku malanga‘i ki he kakaí ke tuku ‘enau fai angahalá kae tafoki ki he ‘Otuá, pea fai ha ngaahi tō‘onga ‘e mahino ai ‘a e mo‘oni ‘enau tafokí. Ko ‘eku malanga ko iá, na‘e ‘uluaki fai ‘i Tāmasikusi, pea toki fai leva ‘i Selusalema, mo Siutea kātoa, mo e kakai mulí.
21Na‘e tupunga ai hono puke au ‘e ha kau Siu ‘i he Temipalé ‘o nau feinga ke tāmate‘i au. 22Kae talu pē mei he kamata‘angá mo e tokoni mai ‘a e ‘Otuá kiate au, mo ‘eku malanga ki he kakai tu‘umālié mo e kakai masivá fakatou‘osi. Ko ‘eku malanga kiate kinautolú, na‘e ngata pē ‘i he ngaahi me‘a na‘e tala ‘e Mōsese mo e kau palōfitá kuo pau ke hokó. 23Na‘á ku fakamatala kiate kinautolu ‘a e pau ke mo‘ua ‘a e Mīsaiá ‘i ha ngaahi mamahi, pea ko ia te ne fuofua tu‘u mei he maté ka ne ‘ave ‘a e māmá ki he kakai Siú mo e kakai mulí.”
24Na‘e te‘eki ai ke ‘osi e fakamatala ‘a Paula kiate iá kuo kaila mai ‘a Fesitō, “Ko koe, Paula, ‘okú ke sesele! Kuo hē ho ‘atamaí ko e fu‘u lahi ho‘o lau tohí!”
25Pea tali ‘e Paula kiate ia, “‘E ‘Eiki Fesitō, ‘oku ‘ikai ke hē hoku ‘atamaí. ‘Oku ou lea atu au he mo‘oní. 26Ko e ngaahi me‘a na‘á ku fakamatala atú, na‘e ‘ikai ke fai fakafufū. ‘Oku ou tui ‘oku ‘afio‘i lelei ‘e He‘ene ‘Afió, ‘e ‘Akilipa, ‘a e ‘uhinga ‘eku laú. Pea ko hono ‘uhinga ia ‘oku ou lava ai ‘o lea mahino kiate iá.” 27Pea fehu‘i ange ‘e Paula kia ‘Akilipa, “‘E Ho‘o ‘Afio, ‘okú ke tui nai ki he lau ‘a e kau palōfitá? ‘Oku ou ‘ilo ‘okú ke tui ki ai.” 28Pea pehē ange ‘e ‘Akilipa, “‘Okú fu‘u vave pehē ho‘o fakaloto’i au keu hoko ko ha Kalisitiané?”
29Pea tali atu ‘e Paula, “Pe ‘e vave, pe ‘e tuai, ka ko ‘eku faka‘amu ki he ‘Afio ná mo kimoutolu kotoa ‘oku fanongo mai ki he fakamatala ‘oku ou fai atu he ‘aho ní, ke mou hangē pē ko aú, tukukehe foki ‘a e ngaahi ha‘i ko ení.”
30Pea mālanga ki ‘olunga ‘a e tu‘í, mo e kōvaná, mo Pelenaise, mo kinautolu kotoa na‘a nau nofó, 31pea ‘i he’enau hu ki tu’a, na‘a nau pehē, “Kuo te‘eki ai ke fai ‘e he sianá ni ha me‘a ke tāmate‘i ai, pe fakahū pōpula.”
32Pea talu ai pē ‘a e tala ange ‘e ‘Akilipa kia Fesitō, “Ka ne ‘ikai ke tangi ‘a Paula kia Sisa, kuó u tuku ange ia ‘e au.”
Currently Selected:
Ngāue 26: TCNT
Highlight
Share
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
