Ngāue 25

Ko e Fili ‘e Paula ke Fakamāu‘i ia ‘e Sisa

1Na‘e hili e ‘aho e tolu mei he fakanofo kōvana ‘o Fesitoó, pea mavahe ia mei Sesalia ki Selusalema. 2Pea fakahā ange ai ‘e he kau taula‘eiki pulé mo e kau taki ‘o e kakai Siú ‘enau hopo mo Paulá. Pea nau kole ange ai pē 3ke ne kātaki mu‘a ‘o fekau ke ‘omi ‘a Paula ki Selusalema. He kuo nau fa‘ufa‘u ke tāmate‘i ‘a Paula he halá. 4Kae tala ange ‘e Fesitō ia, “‘E le‘ohi ai pē ‘a Paula ‘i Sesalia, he ‘oku vave pē ‘eku foki ki aí. 5Kapau na‘e fai hala, pea mou fekau hamou kau taki ke ō mo au ki Sēsalia ‘o fai hono tukuaki‘í ai.”

6Na‘e nofo atu pē ‘a Fesitō ‘i Selusalema ‘o ‘aho ‘e valu pe hongofulu, peá ne toki foki ki Sesalia. Pea ko e ‘aho hono hokó na‘á ne nofo ki hono sea he fakamāu‘angá ‘o tu‘utu‘uni ke taki mai ‘a Paula. 7Pea ko e a‘u mai pē ‘a Paula ki loto fale, kuo haha‘o mai kiate ia ‘a e kau Siu mei Selusalemá ‘o fai hono tukuaki‘i he ngaahi hia kovi. Ka na‘e ‘ikai te nau lava ‘o fakamo‘oni‘i ha me‘a ‘e taha. 8Pea fai ‘e Paula ‘ene tali, ‘o ne pehē ‘e ia, “Kuo te‘eki ai ke u maumau‘i e Lao ‘a e kakai Siú, pe te u fai ha me‘a ‘e kau kovi ki he Temipalé, pe ko e Tu‘i Lomá.”

9Ka ko e loto ‘o Fesitoó ke fakalai ki he kakai Siú, peá ne ‘eke ange ai kia Paula, “Te ke loto fiemālie ke ‘ave koe ki Selusalema ke u fai ai ho‘o hopo he ngaahi me‘á ni?”

10Pea tala ange ‘e Paula, “‘Ikai! ko e fakamāu‘anga eni ‘oku totonu ke fakamāu‘i ai aú, ‘a e fakamāu‘anga ‘o e Tu‘i Lomá. ‘Oku mahino lelei kiate koe ‘a e te‘eki ai te u fai ha me‘a ‘e kau kovi ki he kakai Siú. 11Ka ne u fai ‘e au ha me‘a ke hilifaki ai ‘iate au e tautea maté, ‘e ‘ikai te u feinga ke kalo mei ai. Ka ‘oku ‘ikai te u halaia au he ngaahi me‘a ko eni kuo tukuaki‘i ai aú, pea he‘ikai tuku ange au kiate kinautolu. ‘Oku ou tautapa atu ke fai ‘e Sisa ‘eku hopó!”

12Na‘e alēlea leva ‘a Fesitō mo hono kau fale‘í, peá ne pehē ange kia Paula, “Kuó ke tangi koe kia Sisa, pea ko Sisa leva ‘e ‘ave koe ki aí.”

Ko e Lea ‘a Paula kia ‘Akilipa mo Pelenaise

13Na‘e ‘osi ha ngaahi ‘aho mei ai kuo a‘u mai ki Sesalia ‘a e tu‘i ko ‘Akilipá, mo Pelenaise, ko ‘ena ‘a‘ahi kia Fesitō. 14Pea toe hili ha ngaahi ‘aho, pea fakahā ange ‘e Fesitō ki he tu‘í ‘a e ngaahi tukuaki‘i ‘o Paula kuo faí. Na‘á ne tala ange ‘e ia,

“‘Oku ‘i ai e tangata heni na‘e tuku pōpula ‘e Filike. 15Peá u ‘alu au ki Selusalema, pea kole mai e kau taula‘eiki pulé mo e kau taki ‘o e kakai Siú ke u tautea ia. 16Peá u tala ange kiate kinautolu ‘oku ‘ikai ke mau anga‘aki ‘e kimautolu e kakai Lomá ‘a e lī‘aki ha taha kuo te‘eki ai ke tuku ange hano faingamālie ke fehangahangai mo hono kau talatalaakí ‘o fai ha‘ane tali kiate kinautolu. 17Pea nau omi ki heni kiate au, na‘e ‘ikai te u toe fakalōloa, ka u fai e hopó he ‘aho pē ‘e tahá ‘o tu‘utu‘uni ke taki mai e tangatá. 18Na‘e tu‘u mai hono kau talatalaakí ke fai ‘enau fakamatalá. Ka na‘e ‘ikai te nau tukuaki‘i ia ‘i ha kovi ‘e taha na‘á ku ‘amanaki ki ai. 19Ko ‘enau me‘a pē na‘e faí ko ‘enau fakakikihi ‘o kau ki ha ngaahi me‘a fakalotu ‘oku nau tui ki ai, pea kau ki ha tangata ko Sīsū na‘e mate ka ‘oku pehē ‘e Paula ‘oku mo‘ui pē. 20Na‘e fihi ki hoku ‘atamaí pe ‘e anga fēfē ‘eku fakatotolo e ngaahi me‘á ni, peá u ‘eke ange kia Paula pe ‘e loto fiemālie ke ‘ave ia ki Selusalema ke hopo ai. 21Ka ne kole mai ke tauhi ai pē ia heni kae‘oua ke toki fai ha tu‘utu‘uni ‘a Sisa. Peá u tu‘utu‘uni ke le‘ohi ai pē heni kae‘oua ke faingamālie ke ‘ave ia kia Sisa.”

22“Te u fie fanongo mo au ki ha fakamatala ‘a e tangatá,” ko ‘Akilipa ange ia kia Fesitō.

Pea tali mai ‘e Fesitō, “Ko ‘apongipongi pē te ke fanongo ki ha‘ane fakamatala.” 23Pea ko e ‘aho hono hokó na‘e hā‘ele fakatu‘i mai ‘a ‘Akilipa mo Pelenaise mo e lāngilangi mo e ngeia lahi ‘o hū mai ki he loki fakatahá. Pea muimui hā‘ele mai ai mo e kau ‘eikitaú mo e kau taki tu‘ukimu‘a ‘o e koló. Pea tu‘utu‘uni ‘e Fesitō ke taki mai ā ‘a Paula, 24‘o ne pehē ‘e ia, “‘E Ho‘o ‘Afio mo e kau ‘a‘ahi mai hono kotoa. Ko e tangata ko eni ‘oku mou me‘a mai ki aí, kuo ‘osi kotoa ‘a e kau Siu nofo Selusalema mo nofo Sesaliá he vili mai kiate au ke u hilifaki ‘iate ia ‘a e tautea maté. 25‘Oku ‘ikai ke u tui au ‘oku halaia ‘i ha hia ‘e taha ‘e totonu ke tāmate‘i ai. Ka na‘á ne kole mai ke fai ‘e Sisa ‘ene hopó, peá u tu‘utu‘uni ke ‘ave ā ki Loma.

26Ka ‘oku ‘ikai ha‘aku fakamatala pau ke fai kia Sisa ‘o kau kiate ia. Peá u ‘omi ai kiate kimoutolu, kae tautefito ki Ho‘o ‘Afió, ‘e ‘Akilipa. Pea ka hili ha‘atau feme‘a‘aki ki ai, pea ‘e ‘i ai ha‘aku fakamatala ke fai. 27He ‘e ‘ikai ngali poto ‘eku fekau ke ‘ave ha pōpula kia Sisa ka ‘oku te‘eki ai ke u fakapapau‘i ‘ene hia kuo faka‘ilo ai iá.”

Currently Selected:

Ngāue 25: TCNT

Highlight

Copy