Ngāue 24

Ko e Hopo ‘a Paulá

1Na‘e ‘osi ha ‘aho ‘e nima mei ai, kuo a‘u mai ki Sesalia ‘a e taula‘eiki lahi ko ‘Ananaiá pea mo ha kau mātu‘a tauhi fonua mo ha motu‘a loea ko Tetulō. Peá nau fakahā ange ki he kōvaná, kia Filike, ‘a e me‘a ‘oku nau faka‘ilo ai ‘a Paulá. 2Na‘a nau fekau ‘a Paula ke ha‘u. Pea toki hanga ‘e Tētulō ‘o fakahoko ki he kōvaná ‘a e talatalaaki‘i ‘o Paulá. Na‘á ne tala ange ‘e ia,

“Tapu mo e Feitu‘ú na. Kuo fuoloa mai eni ‘emau nofo melino mo fiemālie koe‘uhí ko e fakapotopoto ho‘o takí. Pea kuo fakalakalaka homau fonuá ko ho‘o ngāué, ‘e Kōvana Filike. 3‘Oku hounga lahi ia kiate kimautolu kotoa. 4Kātaki, ‘oku mau lave‘i ‘okú ke femo‘uekina, kae tuku mu‘a ke mau fai atu ha ki‘i fakamatala.

5Ko e sianá ni, ko e siana fakakina mo‘oni. Ko ‘ene me‘a ‘oku faí ko e veuki e nofo ‘a e kakai Siú he tapa kotoa ‘o māmaní. Pea ko e toe taki ia ‘o e kau lotu ko e kau Nasaline. 6-8Na‘á ne feinga ke maumau‘i e tapu ‘o e Temipalé, pea mau puke ‘o fakahū. Kapau te ke faka‘eke‘eke ia, te ke mea‘i ai pē ‘oku mo‘oni e ngaahi me‘a ‘oku mau talatalaaki‘i atu aí.” 9Na‘e fakamo‘oni kātoa ‘a e kakai Siú ki he fakamatala ‘a Tētuloó.

Ko e Tali ‘a Paulá

10Na‘e kamo atu ‘a e kōvaná kia Paula ke fai ha‘ane tali. Pea tali ange ‘e Paulá,

“‘Oku ou lave‘i kuo ta‘u lahi ho‘o fakamāu‘i e ngaahi hopo ‘a e kakai ‘o e pule‘angá ni, ‘o u loto-lahi ai ke fai atu ha tali ‘i ho fakamāu‘angá ki hoku talatalaaki‘i kuo faí. 11Kuo te‘eki ai ke lava ha ‘aho ‘e hongofulu mā ua ‘eku ‘alu ki Selusalema ke fai ‘eku lotu. Ko e me‘a ia ‘e faingofua ke ke fakapapau‘i. 12Na‘e te‘eki ai tu‘o taha ke sio mai ‘a e kakai Siú ‘oku ou fakakikihi mo ha taha ‘i he Temipalé, pe veuki ha kakai ‘i ha fale lotu, pe ko ha toe feitu‘u he koló. 13Pea he‘ikai ai pē te nau lava ‘o ‘oatu ha ngaahi fakamo‘oni ki he ngaahi me‘a ‘oku nau talatalaaki‘i atu ai aú. 14Ko eni pē ‘oku mo‘oni ‘i he‘enau fakamatalá, ko ‘enau pehē ‘oku ou lotu ki he ‘Otua ‘o ‘emau ngaahi kuí ‘aki ha ‘Alunga ‘oku nau faka‘ikai‘i. Ka ‘oku ou kei tui pē au ki he me‘a kotoa kuo hiki he Lao ‘a Mōsesé mo e ngaahi tohi ‘a e kau palōfitá. 15Pea ‘oku ou tui tatau mo e kakai ko ení ‘e fokotu‘u ‘e he ‘Otuá ‘a e kakai kotoa pē mei he maté, ‘a e kakai fai leleí pea mo e kakai faikoví. 16‘Oku ou fai hoku tūkuingata ke ma‘a hoku totó he me‘a kotoa pē he ‘ao ‘o e ‘Otuá mo e kakaí.

17Na‘e lau ta‘u ‘eku mama‘o mei Selusalemá, peá u toki foki mai ki ai ‘o ‘omi e me‘a‘ofa pa‘anga ma‘á e kakai masiva hoku fonuá, pea mo fai ‘eku feilaulau he Temipalé. 18Pea lolotonga pē ‘eku fai e fatongia ko iá kuo nau fetaulaki mo au he Temipalé. Ne u ‘osi fakakakato ‘e au e ngaahi ouau fakama‘á ka u hū ki he Temipalé, pea na‘e ‘ikai ke ‘i ai ha fu‘u kakai fēfē ai mo au, pe ko ha moveuveu ‘e hoko. 19Ka na‘e ‘i ai ha kakai Siu mei ‘Ēsia ai. ‘Oku totonu ke nau ‘i heni ‘o kapau ‘oku ‘i ai ha me‘a ‘oku nau loto ke talatalaaki‘i atu ai au, 20pe te ke faka‘eke‘eke ‘a e fa‘ahinga ‘oku ‘i hení. He te nau fakamo‘oni‘i atu na‘a nau fakamāu‘i au pea na‘e ‘ikai te u mo‘ua ai au ‘i ha hia. 21Ko e me‘a pē te nau ala talatalaaki‘i ai aú, ko ‘eku kaila kiate kinautolu, ‘Ko hono fakamāu‘i au he ‘aho ní ko ‘eku ‘amanaki ‘e toe tu‘u e kakai maté ‘o mo‘uí.’”

22Na‘e lahi e ‘ilo ‘a Filike ki he ‘Alungá. Ka na‘á ne tala ange kiate kinautolu, “Te u toki fai ‘eku tu‘utu‘uní ‘i ha a‘u mai ‘a e ‘eikitau ko Lisiasí.” 23Peá ne fekau ‘a e ‘eikitaú ke le‘ohi ai pē ‘a Paula, kae ‘oua ‘e tuku pilīsone ia, pe ta‘ofi ha fie ‘a‘ahi ki ai hono ngaahi kaungāme‘á.

Ko e Lea ‘a Paula kia Filike mo Telūsila

24Na‘e ‘osi ha ngaahi ‘aho mei ai, pea ō ‘a Filike mo hono uaifí, ‘a Telūsila, ko e fefine Siu, ki he feitu‘u na‘e le‘ohi ai ‘a Paulá. Na‘á na fekau ke taki mai ‘a Paula, pea fakamatala ‘a Paula ki he tui kia Kalaisi Sīsuú ka na fanongo kinaua. 25Pea lolotonga ‘a e fakamatala ‘a Paula ki he faitotonú, mo e pule‘i hoto kakanó, mo e fakamaau ‘e fai he kaha‘ú, kuo lelea ‘a e loto ‘o Filiké ‘o ne pehē ange kia Paula, “Ta fai ‘aki ia he ‘ahó ni. ‘Alu ā. Ka toki ai haku faingamālie, te u toe fekau atu ke ke ha‘u.” 26Pea toutou fekau ai pē ‘e Filike ke ‘alu ange ‘a Paula ke na talanoa, ko ‘ene ‘amanakí ‘e totongi fakafufū ia ‘e Paula.

27Na‘e ‘osi ha ta‘u ‘e ua mei ai, pea fetongi ‘e Pōsio Fesitō ‘a Filike he kōvaná. Ka na‘e tuku pōpula ai pē ‘e Filike ‘a Paula ko ‘ene fakalai ki he kau taki ‘o e kakai Siú.

Currently Selected:

Ngāue 24: TCNT

Highlight

Copy