Ngāue 23

1Na‘e sio fakamama‘u ‘a Paula ki he hou‘eiki fakatahá, peá ne pehē ange kiate kinautolu, “Kāinga ‘Isileli. Talu pē mei mu‘a ‘o a‘u ki he ‘ahó ni mo ‘eku fai fatongia ma‘á e ‘Otuá mo e loto tau‘atāina.” 2Pea tu‘utu‘uni ‘e he taula‘eiki lahí, ‘e ‘Ananaia, ke hanga ‘e ha ni‘ihi na‘e ofi atu kia Paula ‘o paa‘i hono ngutú. 3Pea tafoki hake ‘a Paula ki he taula‘eiki lahí ‘o ne pehē ange, “Mālualoi! Ko koé, ‘e taa‘i ‘e he ‘Otuá. He ko ho‘o nofo mai ko ená ke fakamāu‘i ‘aki au e Lao ‘a Mōsesé, kae lolotonga ia ‘okú ke maumau‘i e Laó ‘aki ho‘o tu‘utu‘uni ke taa‘i aú.”

4Pea pehē ange ki ai e fa‘ahinga na‘e tutu‘u hono tafa‘akí, “Ko e ‘ai koā ke ke lea ta‘e faka‘apa‘apa ki he taula‘eiki lahi ‘a e ‘Otuá?”

5Pea tali ‘e Paula, “Na‘e ‘ikai te u ‘ilo, kāinga, ko e taula‘eiki lahí ia. He ko e lau ē ‘a e Folofolá, ‘‘E ‘ikai te mou fakaongoongokovi‘i ‘a e taki ‘o homou kakaí.’”

6Pea fakatokanga‘i atu ‘e Paula ko e kau Sātusi ‘a e ni‘ihi ‘i he hou‘eiki fakataha pea ko e kau Fālesi ‘a e ni‘ihi, peá ne kaila atu kiate kinautolu, “Kāinga, ko e Fālesi au, pea ko e foha ‘o e motu‘a Fālesi. Ko hono fakamāu‘i aú koe‘uhí pē ko ‘eku ‘amanaki ‘e toe tu‘u ‘a e pekiá ‘o mo‘uí.”

7Ko e lea‘aki pē ‘e Paula ‘a e me‘a ko iá kuo hihiki hake ‘a e fu’u fakakikihi ‘a e kau Fālesí mo e kau Sātusí, ‘o hoko ai pē mo e mavaeua e fakatahá. 8He ‘oku tui e kau Sātusí ‘oku ‘ikai ke ‘i ai ha ‘āngelo, pe ko ha laumālie, pe ko ha toe tu‘u mei he maté. Ka ‘oku tui e kau Fālesí ki he ‘ū me‘a kātoa ko iá. 9Na‘e tupu ai ha fu‘u vālautu‘u, pea ko e ni‘ihi he kau faiako lao ‘a Mōsese, na‘a nau fa‘ahi mo e kau Fālesí. Na‘a nau ‘ita kinautolu pea nau puna ki ‘olunga ‘o kaila, “‘Oku ‘ikai te mau tui kimautolu ‘oku ‘i ai ha kovi ‘a e tangata ko ená. Vakai na‘a ko ha ‘āngelo pe ko ha laumālie na‘e lea kiate iá.”

10Na‘e fākalalahi e fakakikihí, pea manavahē ‘a e ‘eikitaú na‘a nau fehae ‘a Paula. Peá ne fekau ‘ene kau sōtiá ke nau hū atu ki he loto ha‘oha‘ongá ‘o hamusi mai ‘a Paula meiate kinautolu ‘o fakafoki ki he kolotaú.

11Pea ko e pō ko iá na‘e tu‘u tafa‘aki ‘a e ‘Eikí ‘ia Paula ‘o ne lea ange ki ai, “To‘a pē koe! He ko eni kuó ke ‘osi fakamo‘oni kiate au ‘i Selusalemá ni, pea te ke fakamo‘oni ai pē kiate au ‘i Loma.”

Ko e Alealea ke Tāmate‘i ‘a Paula

12-13Pea pongipongi hake he ‘aho ‘e tahá, kuo fakapapau ha mātu‘a Siu ‘e toko fāngofulu tupu ke ‘oua te nau toe kai pe inu kae ‘oua kuo nau tāmate‘i ‘a Paula. 14Pea ō leva ‘a e ni‘ihi ‘iate kinautolu ki he kau taula‘eiki pulé mo e kau taki fakafonuá ‘o tala ange, “Kuo mau fai ‘emau tukupā ki he ‘Otuá he‘ikai te mau toe kai pe inu kae ‘oua kuo mau tāmate‘i ‘a Paula. 15Mou ō kotoa ki he ‘eikitaú, ‘a kimoutolu e hou‘eiki fakataha lahí, ‘o faka‘eke‘eke ange ‘a e faka‘ilo ‘o Paulá, ke hangē tofu pē ‘oku ‘ikai ke mou ‘ilo‘í. Kole ange kiate ia ke toe taki mai ‘a Paula kiate kimoutolu ki homou fakamāu‘angá, ka mau teuteu kimautolu ke tāmate‘i ia he lolotonga hono taki atú.”

16Ka na‘e ‘ilo ‘enau fa‘ufa‘ú ‘e ha talavou, ko e ‘ilamutu ‘o Paula, peá ne ‘alu ki he kolotaú ‘o fakahā ange kia Paula. 17Pea fakalea ange ‘a Paula ki ha taki ‘o e kau taú, ‘o ne pehē ange, “Mo ō mo e talavou ko eni ki he ‘eikitaú. He ‘oku ‘i ai ‘ene me‘a ‘oku fie fakahā ki ai.” 18Peá ne taki atu e talavoú ki he ‘eikitaú ‘o tala ange, “Kuo kole mai ‘e he pōpula ko Paulá ke u taki mai e talavou ko ení kiate koe. He ‘oku ‘i ai ‘ene me‘a ‘oku fie fakahā atu.”

19Na‘e taki atu e talavoú ‘e he ‘eikitaú ke na fakaekinaua pē. Pea tala ange ‘e he ‘eikitaú, “Ko e hā e me‘a ‘okú ke fie fakahā mai kiate aú?”

20Pea tala ange ‘e he talavoú, “‘Oku ‘i ai e kau taki ‘o e kakai Siú kuo nau alea ke kole atu ke ke ‘ohifo ‘a Paula ki he fale fakataha‘angá ‘apongipongi ka nau toe fai hano faka‘eke‘eke. Ka ko e loi ia. 21Kātaki mu‘a, ‘oua na‘á ke tui kiate kinautolu. He ‘oku ‘i ai e mātu‘a ‘e toko fāngofulu tupu ‘oku nau teu ke ‘ohofi ‘a Paula. Kuo fai ‘enau fakapapau he‘ikai te nau toe kai pe inu kae ‘oua kuo nau tāmate‘i ia, pea ‘oku nau lolotonga fakaongoongo mai ha‘o tu‘utu‘uni ‘e fai.”

22Pea tala ange ‘e he ‘eikitaú ki he talavoú, “‘Oua na‘á ke tala ki ha taha ho‘o fakahā mai eni kiate aú.” Peá ne toki fekau e talavoú ke ‘alu.

Ko Hono Tuku atu ‘o Paula ki he Kōvana ko Filike

23Na‘e fekau ‘e he ‘eikitaú ha‘ane ongo tangata taki tau ‘e toko ua ke na ō mai. Peá ne tala ange kiate kinaua, “Vahe‘i ha kau tau ‘e toko uangeau, mo ha kau tau heka hoosi ‘e toko fitungofulu, mo ha kau to‘o tao ‘e toko uangeau, pea teuteu ke mou ō ki Sesalia he hivá ‘apoó. 24Teuteu mo ha hoosi ke heka ai ‘a Paula. Pea fakaa‘u lelei atu ia ki he Kōvana ko Filiké.” 25Na‘e fai leva ‘e he ‘eikitaú ‘a e tohi, peá ne pehē ‘e ia he‘ene tohí,

26“‘E ‘Eiki Kōvana Filike.

Mālō e laumālie ‘a e Feitu‘ú na. Ko au Kalautiasi Līsia ‘oku ou tohi atú.

27Ko e tangata ko ená, na‘e teu ke puke ‘e ha kau Siu ‘o tāmate‘i. Pea ko ‘ene mahino pē kiate au ko e tangata Loma iá peá u vahe‘i leva ha kau tau ‘o mau fakahaofi.

28Na‘á ku loto ke faka‘eke‘eke ia ke u ‘ilo e me‘a ‘oku nau tukuaki‘i aí. Peá u ‘ohifo ia ki honau fakataha‘angá. 29Pea tā ko ‘enau ‘ū lao fakalotu pē kuo faka‘ilo aí. Kuo te‘eki ai ke fai ‘e he tangatá ni ha me‘a ke tāmate‘i ai, pe tuku pōpula.

30Pea ko ‘ene mahino pē kiate au ‘oku fai e fa‘ufa‘u ke fakapoongi iá, peá u tu‘utu‘uni leva ke taki atu kae fai hono talatalaaki‘í ki he Feitu‘ú na.

‘Ofa atu.”

31Na‘e taki atu ‘e he kau taú ‘a Paula, ‘o fakatatau ki he tu‘utu‘uni ‘a e ‘eikitaú, ‘o nau a‘u hake kei po‘uli ki he kolo ko ‘Anitepeta. 32Pea pongipongi haké, na’e foki mai e kau tau ‘alu laló ki he kolotaú kae tuku ki he kau tau heka hōsí ke fononga atu mo Paula. 33Pea ko ‘enau a‘u pē ki Sesaliá pea nau ‘ave ‘a e tohí ki he kōvaná mo tuku atu kiate ia ‘a Paula. 34Pea lau ‘e he kōvaná e tohí, peá ne ‘eke ange kia Paula ‘a e vahefonua na‘e tupu aí. Pea mahino ki ai ko Silisiá, 35peá ne tala ange, “Te u toki fanongo ki ho‘o fakamatalá ‘i ha a‘u mai e fa‘ahinga kuo nau talatalaaki‘i koé.” Peá ne tu‘utu‘uni ke le‘ohi ‘a Paula he loto‘ā ‘o Hēlotá.

Currently Selected:

Ngāue 23: TCNT

Highlight

Copy