Ngāue 22

1“Si‘oku kāinga mo e kau taki ‘o hotau pule‘angá! Mou fanongo mai mu‘a ka u fakamatala atu e me‘a na‘e hokó.” 2Pea ko ‘enau fanongo mai pē ‘oku lea faka-‘Alamea ‘a Paulá, na‘e toe ‘ā‘āsili ai ‘enau fakalongolongó. Pea toki hoko atu ‘a e lea ‘a Paulá, ‘o ne pehē ‘e ia,

3“Ko e motu‘a Siu pē au. Na‘á ku tupu ‘i Tāsusi, Sīlia, peá u ako ‘ia Kāmilieli ‘i Selusalemá ni. Na‘e ako‘i au ke u talangofua ki he mingimingi‘i lao kotoa pē kuo tukufakaholo mai mei he‘etau ngaahi kuí. Peá u mamahi‘i ‘Otua tatau matematē mo kimoutolu he ‘ahó ni. 4Na‘á ku fakatanga‘i e kakai kotoa pē na‘a nau tali ‘a e ‘Alunga ko ení, pea a‘u ai pē ki he‘eku tāmate‘i e ni‘ihi. Na‘á ku puke ‘a e kakai tangata mo e kakai fefine tokolahi ‘o fakahū pilīsone.

Ko e Fakamatala ‘e Paula ki he‘ene Tafokí

(Ngāue 9:1-19; 26:12-18)

5‘E fakamo‘oni‘i atu ‘eku fakamatala ko ení ‘e he Taula‘eiki Lahí mo e kau fakafofonga kātoa he Fakataha‘anga Lahi hotau fonuá. He na‘a nau ‘omi e ngaahi tohi ke u ‘alu mo ia ki he kau taki ‘o e kakai Siu ‘i Tāmasikusí ke nau faka‘atā au ke u puke ha kakai ai ‘o taki mai ki Selusalemá ni ke tautea. 6Pea lolotonga ‘eku fakaofiofi atu ki Tāmasikusí he meimei ho‘atā mālié, na‘e faka‘ohovale pē kuo tapa takai ‘iate au ha fu‘u maama lahi mei he langí. 7Na‘á ku tō ki lalo, peá u fanongo he le‘o ‘oku pehē mai, ‘‘E Saula! Saula! Ko e hā ‘okú ke fakatanga‘i ai aú?’

8Peá u pehē ange, “He ko hai koe, ‘Eiki?” Peá ne tali mai ‘e ia, ‘Ko Sīsū au mei Nāsaleti. Pea ko au ‘okú ke fakatanga‘í.” 9Ko e kau tangata na‘a mau kaungā fonongá, na‘a nau sio ki he māmá, ka na‘e ‘ikai te nau fanongo ki he le‘ó.

10Peá u fehu‘i atu, ‘Ko e hā te u faí, ‘Eiki?’

Pea pehē mai ‘e he ‘Eikí, ‘Tu‘u ki ‘olunga ‘o ‘alu ki Tāmasikusi, pea ‘e toki fakamahino atu ai pē e me‘a kotoa ‘oku finangalo ‘a e ‘Otuá ke ke faí.’ 11Na‘e kui hoku matá koe‘uhi ko e fu‘u māmá, pea taki atu ai pē au ‘e hoku kaungāfonongá ki Tāmasikusi.

12Na‘e nofo he kolo ko iá ha tangata ko ‘Ananaia, ko e tangata lotu mo’oni. Na‘á ne mo‘ui talangofua kakato ki he Lao ‘a Mōsesé, pea na‘e faka‘apa‘apa‘i ‘e he kakai Siu kotoa pē na‘e nofo ‘i Tāmasikusí. 13Na‘e ‘alu ange ‘a e tangata ko iá kiate au ‘o ne pehē ange, ‘Si‘oku tokoua ko Saula, ‘ā ā ho fofongá!’ Pea ‘ā ai pē hoku matá peá u sio leva kiate ia. 14Pea pehē mai kiate au, ‘Kuo fili koe ‘e he ‘Otua na‘e lotu ki ai ‘etau ngaahi kuí ke ke ‘ilo e me‘a ‘okú ne finangalo ke faí. Kuó ne fili koe ke ke sio tonu ki he Toko Taha Talangofuá mo fanongo tonu ki hono le‘ó. 15Kuo pau ke ke fakahā ki he kakai kotoa pē ‘a e me‘a na‘á ke sio, mo fanongo ki aí. 16‘Oua ‘e toe tatali. Tu‘u ki ‘olunga ke papitaiso koe, peá ke lotu ki he ‘Eikí ke fufulu ke ma‘a ho‘o ngaahi angahalá’

Ko Hono Ui ‘o Paula ke Malanga ki he Kakai Mulí

17-18Pea hili iá, peá u foki leva ki Selusalema, ‘o u ‘alu ki he Temipalé ‘o fai ‘eku lotu. Pea lolotonga ‘eku lotú na‘e hā mai ‘a e ‘Eikí kiate au ‘o ne folofola mai, ‘Mavahe mei Selusalema ke vave. He‘ikai tali ‘e he kakai Selusalemá ho‘o fakamatala ‘o kau kiate aú.’ 19Pea ko ‘eku tali eni ki aí, ‘‘Eiki, ‘oku nau ‘ilo lelei ‘eku puke ‘o tā e kakai tokolahi na‘e tui kiate koé. 20Ko e tāmate‘i ‘o Sitīveni koe‘uhí ko koe, ka u tu‘u ai pē au ‘o faka‘ai‘ai kinautolu. Pea a‘u ai pē ki he‘eku le‘ohi e vala ‘o e fa‘ahinga na‘a nau tāmate‘i iá.’ 21Kae pehē mai pē ‘e he ‘Eikí kiate au, ‘‘Alu! He te u fekau koe ke ke fai fatongia ki he kakai muli he ngaahi fonua mama‘ó.’”

22Pea ‘osi ai ‘a e fie fanongo ‘a e kakaí ki he fakamatala ‘a Paulá ka nau kaikaila le‘o-lahi, “Lī ki tu‘a! pea tāmate‘i, ‘oku ‘ikai taau ke mo‘ui.” 23Pea nau kaikaila ai pē, mo tākalo ‘aki honau ngaahi pulupulú, mo laku efu ki he ‘ataá.

Ko Paula mo e ‘Eikitau Lomá

24Na‘e fekau ‘e he ‘eikitau Lomá ke taki ‘a Paula ki he kolo taú ‘o haha ‘aki ha maea ke ‘ilo e ‘uhinga ‘o e kaikaila ‘a e kakaí.

25Lolotonga hono ha‘i ‘e he kau sōtiá ‘a Paula, kuo pehē ange ‘e Paula ki honau takí, “‘Oku ngofua koā he laó ke tautea haha ha tangata Loma kae te‘eki ai ke fai ha hopo?”

26Na‘e ‘alu leva e sōtiá ki he ‘eikitaú ‘o tala ange, “Tokanga ki ho‘o me‘a ‘oku faí. He ko e tangata ko ená, ko e tangata Loma.”

27Pea ha‘u e ‘eikitaú kia Paula, ‘o fehu‘i ange, “Ko e mo‘oni koā ko e tangata Loma koe?”

Pea pehē ange ‘e Paula, “‘Io.”

28Pea pehē ange leva ‘e he ‘eikitaú, “Ko e pa‘anga lahi na‘á ku totongi ke u hoko ai ko e tangata Loma.”

“Ka ko au ia na‘e fā‘ele‘i ko e Loma,” ko Paula atu ia.

29Tuaiekemo ‘a e momou ai e fa‘ahinga na‘e ‘ai ke nau faka‘eke‘eke ‘a Paulá. Pea ilifia lahi ‘a e ‘eikitau Lomá he‘ene ‘ilo tā ko ē kuó ne ha‘i sēini e tangata Loma.

Ko e Fakamāu‘i ‘o Paula he Fakataha‘anga Lahí

30Pea ko e ‘aho hono hokó, na’e feinga ‘a e ‘eikitau Lomá ke ‘ilo ‘a e ‘uhinga totonu hono faka‘ilo ‘o Paula ‘e he kau taki ‘o e kakai Siú. Na‘á ne fekau ke vete ‘a e sēini na‘e ha‘i ‘aki ‘a Paulá, peá ne tu‘utu‘uni ke fakataha ‘a e kau Taula‘eiki Pulé mo e Fakataha Lahi Kātoa ‘a e fonuá. Peá ne toki fekau ke taki mai ‘a Paula ‘o fokotu‘u ‘i honau ha‘oha‘ongá.

Currently Selected:

Ngāue 22: TCNT

Highlight

Copy