Ngāue 21

Ko e Fononga ‘a Paula ki Selusalemá

1Na‘a mau fakamāvae mo e kāinga lotu ‘Efesoó, pea mau taloa ki Kō. Pea ko e ‘aho hono hokó, kuo mau tau ki Lota, pea mau toki hoko atu ai ki Pātala. 2Pea na‘e ‘i ai e vaka ‘i Pātala na‘e teu folau ki Finisia, pea mau heka ai ‘o folau. 3Pea kite mai ‘a Saipalo, pea mau fākahua ki he Tongá, ‘o mau pehē atu ai pē ki he taulanga ko Taia ‘i Sīlia ke fakahifo ai e uta ‘a e vaká. 4Na‘a mau kumi leva ha ni‘ihi na‘e tui kia Sīsū, ‘o mau nofo ‘iate kinautolu he uike ‘e taha. Pea tā ko ē na‘e ‘osi fakahā ange ‘e he Laumālie Mā‘oni‘oní kiate kinautolu ke fakatokanga kia Paula ke ‘oua te ne hoko atu ki Selusalema. 5Ka na‘e ‘osi e uike ko iá, pea hoko atu ai pē ‘emau fonongá. Pea ko e mātu‘a tangata kotoa pē, mo honau ngaahi malí, mo e fānaú, na‘a nau lue hifo mo kimautolu ki matātahi, ‘o mau tū‘ulutui kātoa ai pē ‘o fai ‘emau lotu. 6Pea ‘osi ‘emau lotú, pea mau fakamāvae ka mau heka ki vaka, ka nau foki kinautolu ki ‘api.

7Na‘a mau folau mei Taia ki Tolimeasi, ‘o fe‘iloaki ai mo e kakai na‘e tui kia Sīsuú, ‘o mau nofo mo kinautolu he ‘aho ‘e taha. 8Pea ko e ‘aho hono hokó, na‘a mau ō ki Sēsalia ‘o nofo ‘ia Filipe, ko e tangata malanga. Ko e toko taha ia he toko fitu na‘e tokoni ki he kau ‘apōsitoló. 9Pea na‘e ‘i ai hono ngaahi ‘ōfefine ‘e toko fā te‘eki mali, ko e kau palōfita fefine.

10Pea ‘osi ha ngaahi ‘aho si‘i ‘emau nofo ‘i Sesaliá kuo a‘u ange mei Siutea ha palōfita ko ‘Akapusi hono hingoá. 11Pea ‘alu ange ia ‘o vete ‘a e leta ‘o Paulá, ‘o ha‘i ‘aki hono nima ‘o‘oná mo hono va‘é. Pea lea ange leva ia kia Paula, “Ko e folofola eni ‘a e Laumālie Mā‘oni‘oní, ko e tangata ‘oku ‘o‘ona e leta ko ení ‘e ha‘i ‘e he kau taki ‘o e kakai Siu ‘i Selusalemá pea ‘e tuku atu ki he kakai mulí.”

12Pea ‘osi e lea ‘a ‘Akapusi kia Paulá, pea mau kole kia Paula, fakataha mo e kakai na‘e tui kia Sīsuú, ke ‘oua te ne ‘alu ki Selusalema. 13Kae tali mai ‘e Paula ia, “Ko e hā fua e tangi, mo ho‘omou fakamafasia‘i aú? He ‘oku ‘ikai ngata pē he‘eku loto-fiemālie ke fakahū pilīsone au ‘i Selusalema koe‘uhí ko e huafa ‘o e ‘Eiki ko Sīsuú, ka ‘oku ou toe loto-fiemālie ke mate ma‘ána ‘i Selusalema.”

14Na‘e ‘ikai te mau lava ‘o liliu e loto ‘o Paulá. Pea talu ai pē ‘emau tala ange, “Fai ā e finangalo ‘o e ‘Eikí.”

15Na‘a mau nofo atu ai, pea mau toki teu ‘emau fononga ki Selusalemá. 16Na‘a mau ō mo ha ni‘ihi mei Sēsalia na‘e tui kia Sīsū, pea na‘a nau taki kimautolu ki he ‘api ‘o e matāpule ko Manasoni ‘o mau nofo ai. Ko e matāpule ia mei Saipalo na‘e talu pē mei he kamata‘angá mo ‘ene tui kia Sīsū.

17Na‘a mau tau ki Selusalema, pea na‘e talitali fiefia kimautolu ‘e he kakai ai na‘e tui kia Sīsuú.

18Ko e ‘aho hono hokó, na‘e ‘alu ‘a Paula ‘o fe‘iloaki mo Sēmisi. Pea na‘e kātoa ai ‘a e kau taki ‘o e siasí. 19Na‘e fetapa ange ‘a Paula kiate kinautolu, peá ne fakamatala kātoa ‘a e ngaahi me‘a kuo fai ‘e he ‘Otuá ma‘á e kakai mulí ‘i he‘ene ngāué. 20Na‘a nau fakafeta‘i kotoa ai ki he ‘Otuá, pea nau pehē ange kia Paula, “Kāinga, vakai ange ki he lauimano ‘a e kakai Siu kuo tui kia Sīsuú, mo e lahi ‘enau mamahi‘i e Lao ‘a Mōsesé. 21Ka kuo fakahā ange ‘e ha ni‘ihi kiate kinautolu ‘okú ke fakahinohino e kakai Siu kotoa pē ‘oku nofo hili he ngaahi fonua mulí ke nau talangata‘a ki he Lao ‘a Mōsesé, pea ‘oua te nau kamu ‘enau fānau tangatá, pe te nau toe pipiki ki he‘enau ngaahi ouau tukufakaholó.

22Ko e hā ‘etau me‘a ‘e faí? He ‘oku pau pē kuo nau ‘osi fanongo ‘okú ke ‘i heni. 23Pea ko ia ai, ‘oku ‘i ai ‘emau kole kiate koe. Peá ke kātaki ‘o tali. Ko e kau tangata ko eni ‘e toko faá, kuo fai ‘enau tuku mo‘ui. 24Mou ō mu‘a ‘o kau he ngaahi ouau fakama‘a ‘e fai ‘aki ‘enau tuku mo‘uí. Peá ke totongi ‘enau ngaahi fakamolé ka nau tele honau ‘ulú, kae mahino ki he kakai kotoa pē ‘oku loi e ngaahi lau ‘oku fai kiate koé, pea ‘okú ke talangofua pē koe ki he Lao ‘a Mōsesé. 25Ka ko e me‘a ki he kakai muli kuo tui kia Sīsuú, na‘a mau tohi kiate kinautolu ‘o fakahā ange ‘emau fale‘i ke ‘oua te nau kai ha me‘akai kuo fai ‘aki ha feilaulau ki ha ‘otua tamapua, pe ko ha kanomate ‘oku kei toe ai ha toto, pe ko ha kanomate ‘o ha manu na‘e fakasisina, pea faka‘ehi‘ehi mei he ‘ulungāanga fakalieliá mo e fe‘auakí.”

26Pea ko e ‘aho hono hokó, na‘e ō ‘a Paula mo ha kau tangata ‘e toko fā, ‘o teuteu fakataha mo kinautolu. Peá ne ‘alu ki he Temipalé ‘o fakahā ai e ‘aho ‘e fai ai ‘a e ouau tukú, mo e ‘aho ‘e fai ai e feilaulau ma‘anautolu taki taha.

Ko Hono Puke ‘o Paula he Temipalé (ngata heni)

27Na‘e meimei ‘osi e ‘aho ‘e fitu ‘oku fai ai ‘a e ouau ko iá, kuo fakatokanga‘i ‘a Paula ‘e ha kau Siu mei ‘Ēsia ‘i he Temipalé. Pea nau uki mai ‘e kinautolu ha kakai tokolahi, ‘o kamata ‘ohofi ia, 28mo e kaila, “Kāinga! Mou tokoni mai! Ko e tangata eni ‘oku ‘alu takai holo ‘o fakaongoongokovi‘i hotau pule‘angá, mo e lao ‘a Mōsesé, mo e Temipalé. Pea ko eni kuo a‘u ai pē ki he‘ene ‘uli‘i e potu tapú ni ‘aki ‘ene fakahū mai ha kau muli ki ai.” 29Ko ‘enau lau peheé, koe‘uhí he na‘a nau sio kia Paula ‘i loto kolo ‘oku ō holo mo Talofima ko e tangata ‘Efesō, ‘o nau pehē kuo fakahū ia ‘e Paula ki he loto Temipalé.

30Na‘e nga‘uta kotoa ai e koló, ‘o felēleaki noa‘ia holo e kakaí. Na‘a nau puke ‘a Paula ‘o fau ki tu‘a mei he Temipalé, pea nau tāpuni e matapā ‘o e Temipalé. 31Pea ko e teu e kakaí ke tāmate‘i ‘a Paulá, mo e ‘ilo ‘e he ‘eikitau Lomá ‘a e moveuveu kātoa ‘a Selusalemá. 32Na‘e vahe‘i ‘e he ‘eikitaú ha kau sōtia ke lele mo ia ki he feitu‘u na‘e ‘i ai e kakaí. Pea sio atu e kakaí ki ai mo e kau sōtiá, pea nau ta‘ofi ‘enau tā ‘a Paulá. 33Na‘e a‘u atu ‘a e ‘eikitaú kia Paula ‘o puke, peá ne fekau ke ha‘i ‘aki ha ongo sēini. Peá ne ‘eke holo, “Ko hai e tangatá ni? Ko e hā e me‘a kuó ne faí?” 34Na‘e kaila mai e tokolahi ‘oku pehē mo pehē, kae kaila‘aki mai ‘e he tokolahi ia ‘a e me‘a kehe. Na‘e fiu faka‘eke‘eke ‘e he ‘eikitaú ‘a e me‘a kuo hokó, koe‘uhí ko e lahi fau e longoa‘á, peá ne tu‘utu‘uni ke taki atu ‘a Paula ‘e he‘ene kau tangatá ki he loto kolo taú. 35Na‘a nau a‘u hake ki he kaka‘anga ki he kolo taú, kuo ‘ai e ‘oho tāmate ‘a e kakaí, pea iku ai ‘o ha‘amo ‘e he kau sōtiá ‘a Paula. 36Kae fe‘ohofi mai ai pē ‘a e kakaí mo kaila, “Fei mo tāmate‘i!”

Ko e Lea ‘a Paula ki he Kakaí

37Na‘e teu e kau sōtiá ke fakahū ‘a Paula ki he loto kolo taú, kae pehē ange ‘e Paula ki he ‘Eikitaú, “Ka u ki‘i fakalea atu mu‘a kiate koe.”

Pea pehē ange ‘e he ‘eikitaú, “‘Okú ke poto koā he lea faka-Kalisí? 38‘Ai na‘a ko e ‘Isipite koe na‘á ne fai e liukava ‘o taki atu e kau tau toitoi ‘e toko fāafe ki he loto toafá!”

39Pea tali atu ‘e Paula, “‘Ikai! Ko e motu‘a Siu au mei Tāsusi, ko e kolo ‘iloa ‘i Silisia. Tuku mai mu‘a ke u lea ki he kakaí.”

40Pea tala ange ‘e he ‘eikitaú, “‘Io.” Pea tu‘u ‘a Paula he kaka‘anga ki he kolo taú, ‘o ta‘alo atu ki he kakaí ke nau fakalongo hifo. Pea nau fakalongo hifo, pea lea ange ‘a Paula kiate kinautolu ‘i he lea faka-‘Alameá.

Currently Selected:

Ngāue 21: TCNT

Highlight

Copy