Ngāue 20
20
1Ko ‘ene nonga pē ‘a e vālautu‘u ‘a e kakaí, pea fekau ‘e Paula ke kātoa mai e kakai na‘e tui kia Sīsuú, ‘o ne lea fakalotolahi kiate kinautolu. Pea hili ‘ene fakamāvae mo kinautolú, na‘á ne toki hoko atu ‘ene fononga ki Masitōniá.
2Na‘e fou atu ‘a Paula he feitu‘u kehekehe ‘o ne fakalotolahi‘i e kakai ai na‘e tui kia Sīsuú ‘aki ‘ene ngaahi malangá. Na‘á ne a‘u ki ‘Ākaia, 3‘o ne nofo ai ‘o ‘osi ha māhina ‘e tolu. Pea fe‘unga mo ‘ene teu ‘alu ki Sīliá, kuo alea fakapulipuli ha kau taki ‘o e kakai Siú ke fai ha kovi kiate ia. Pea talu ai pē ‘ene foki ‘o fou atu ‘i Masitōnia. 4Na‘e ‘alu mo ia ha tangata Pēlea ko Sōpeta, ko e foha ‘o Pulo, mo e ongo tangata Tesalonaika ko ‘Alisitako mo Sēkunio, mo Keio mei Teape, mo Tikiko mo Talofima mei ‘Ēsia, pea mo Tīmote. 5Na‘e mu‘omu‘a atu ‘a e fa‘ahinga ko iá ‘o tali kimautolu ‘i Taloasi. 6‘I he tuku ‘a e Kātoanga Mā Tapu Lēvaní, na‘a mau folau leva mei Filipai. Pea ‘osi ha ‘aho ‘e nima mei aí, na‘a mau fetaulaki mo kinautolu ‘i Taloasi, ‘o mau nofo ai he uike ‘e taha.
Ko e Fakamāvae ‘a Paula mo e Kāinga Taloasí
7Pea ko e ‘uluaki ‘aho ‘o e uiké, na‘a mau kātoa mai ai ke pakipaki mā. Pea malanga ai ‘a Paula ‘o toki tuku pē kuo vaeuapō, he na‘e teu ke ‘alu ia he ma‘a hake pē e ‘ahó. 8Na‘e lahi ‘a e ‘ū maama na‘e ulo he loki ‘i ‘olunga na‘a mau feohi aí. 9Pea fai atu pē e malanga ‘a Paulá, kuo tule mohe ‘a e talavou ko ‘Ūtiko na‘e hekeheka he funga matapā teké, ‘a ia ko e funga vaka hono tolu ia ‘o e falé. Pea ‘ohovale pē kuo mā‘umohe ia pea tō ki lalo, ‘o toki fata hake ia ‘e he kakaí kuo mate. 10Ka na‘e ‘alu hifo ‘a Paula ‘o ne punou hifo ‘o fā‘ofua ‘ia ‘Ūtiko, peá ne pehē ange ki he kakaí, “‘Oua ‘e hoha‘a. ‘Okú ne kei mo‘ui pē!” 11Na‘e foki hake leva ‘a Paula ki ‘olunga ‘o pakipaki e mā ‘o mau ma‘u. Peá ne fai ‘ene talatalaifale kiate kinautolu, ‘o a‘u pē ki he ma‘a hake ‘a e ‘ahó, peá ne toki‘alu. 12Pea ‘ave ‘e he kāinga lotú ‘a e talavoú ki hono ‘apí kuo mo‘ui, pea nau fiefia lahi.
Ko e Folau mei Taloasi ki Mīleto
13Na‘e fakakaukau ‘a Paula ke ne fou ‘i ‘uta ki ‘Āsosi, ka mau folau vaka atu kimautolu peá ne toki heka vaka ai mo kimautolu. 14Na‘a mau tau ki ‘Āsosi ‘o fe‘iloaki ai mo Paula, pea heka mai ia ‘o mau folau ki Mitilene. 15Na‘a mau folau ai ‘o tele atu ‘i Kaio he ‘aho hono hokó. Pea ‘osi mo e ‘aho ‘e taha mei ai, kuo mau tau ki Samo. Pea ko e ‘aho hono hokó, kuo mau tau ki Mīleto. 16Na‘e pehē ‘e Paula ke mau folau fakalaka ‘i ‘Efesō, na‘a fu‘u fuoloa ‘ene nofo ‘i ‘Ēsiá. He na‘á ne loto ke ma‘u atu ‘a e ‘Aho Penitekosí ki Selusalema.
Ko e Lea ‘a Paula ki he Kau Taki ‘i ‘Efesoó
17Na‘e pōpoaki atu ‘a Paula mei Mīleto ki he kau taki ‘o e siasi ‘i ‘Efesoó ke nau ō mai ke nau fe‘iloaki.
18Pea nau a‘u maí, peá ne pehē ange kiate kinautolu, “‘Oku mou ‘ilo‘i lelei ‘a e anga ‘o ‘etau nofo mo aú, talu mei he ‘aho na‘á ku ‘uluaki a‘u mai ai ki ‘Ēsiá ni.
19Na‘e alea fakafufū ha kau Siu ‘e ni‘ihi ke fakafepaki‘i au, peá u faingata‘a‘ia ‘aupito ai. Ka na‘á ku kei fai pē ‘a e ngāue ‘a e ‘Eikí mo anga fakatōkilalo ai pē. 20Ko ‘eku fa‘a malanga ki he kakaí mo faiako ‘i homou ngaahi ‘apí, na‘e ‘ikai te u longo ‘i ha me‘a ‘e taha ‘e ‘aonga kiate kimoutolu. 21Na‘á ku lea ki he kakai Siú mo e kakai mulí fakatou‘osi ke nau tafoki ki he ‘Otuá pea tui ki hotau ‘Eiki ko Sīsuú. 22Pea ko eni kuo fekau ‘e he Laumālié ke u ‘alu ki Selusalema. Pea kuo pau ke u talangofua ki ai, neongo ‘oku ‘ikai te u lave‘i e me‘a ‘e hoko ai kiate aú. 23Ko e me‘a pē ‘oku ou ‘iló, ‘oku fakahā mai ‘e he Laumālie Mā‘oni‘oní ‘i he kolo kotoa ‘oku ou ‘a‘ahi ki aí ‘a e tu‘unuku mai kiate au ‘a e pilīsone mo e ngaahi faingata‘á. 24Tatau ai pē pe ko e hā ha me‘a ‘e hoko kiate au, kehe pē ke u fai ke a‘u hoku fatongia na‘e ‘omi ‘e he ‘Eiki ko Sīsuú, ko e talaki ‘a e Ongoongo Lelei ‘o e ‘ofa lahi ‘a e ‘Otuá. 25Na‘á ku fononga holo ‘o malanga‘i kiate kimoutolu ‘a e Pule‘anga ‘o e ‘Otuá. Ka kuo mahino eni kiate au ‘e ‘ikai te tau toe fe‘iloaki. 26Pea mou ‘ilo lelei eni, ‘e ‘ikai ‘eke mai kiate au homou totó. 27He kuó u ‘osi fakahā kakato atu ‘a e taumu‘a ‘a e ‘Otuá. 28Mou le‘ohi ai pē ho‘omou nofó, mo e tākanga kuo tuku atu ‘e he ‘Otuá ke mou tauhí. ‘Ai ke mou hangē ha kau tauhi sipi ‘o e siasi ‘o e ‘Otuá. He ko e tākanga sipi ia na‘á ne fakatau ‘aki e ta‘ata‘a ‘o hono ‘Alo tonú.
29‘Oku ou ‘ilo pau ‘e hili pē ‘eku ‘alú pea ‘e hū mai ha ni‘ihi ‘o ‘ohofi kimoutolu, ‘o hangē tofu pē ko ha fanga kulī fekaí. 30Pea ‘e ‘i ai mo ha ni‘ihi ‘iate kimoutolu tonu te nau lohiaki‘i e kakai ‘oku tui kia Sīsuú ke nau afe ‘o muimui ‘iate kinautolu. 31Ko ia ai, mou tokanga! Pea vakai na‘a ngalo ‘a e ta‘u ‘e tolu na‘á ku fakatokanga atu ai mo ‘eku tangi ‘a lo‘i mata he ‘aho mo e pō.
32Tau ange mo e ‘Otuá ke ne tauhi kimoutolu. Tukuloto‘i ‘a e Ongoongo Lelei ‘o kau ki he‘ene ‘ofa lahí. He ‘e langa hake ‘aki ia ‘a ho‘omou mo‘uí, mo faka‘inasi ‘aki kimoutolu he koloa kotoa ‘oku finangalo ‘a e ‘Otuá ke ma‘u ‘e hono kakaí. 33Na‘e ‘ikai te u mānumanu ki ho‘omou koloa silivá, pe koulá, pe valá. 34‘Oku mou ‘ilo lelei ‘eku ngāue‘i pē ‘e au hoku tauhí, mo e tauhi ‘o hoku kaungāngāué. 35Na‘á ku feinga ke fakamahino atu ‘i he‘eku me‘a kotoa na‘e faí ‘a e pau ke te ngāue ke lahi ke tokoni‘i e kakai ‘oku vaivai angé. Manatu‘i e lea ‘a hotau ‘Eiki ko Sīsuú, ‘‘Oku tāpuekina lahi ange ‘a e foaki atú ‘i he ma‘u maí.’”
36Na‘e ‘osi e lea ‘a Paula ki he kāinga lotú, pea nau tū‘ulutui hifo leva mo ia ‘o fai ‘enau lotu, 37pea nau toki fetāngihi mo ‘uma mo fā‘ofua ‘ia Paula. 38Na‘e ‘ā‘āsili ‘enau loto mafasiá ko ‘ene tala ange kiate kinautolu, “He‘ikai te tau toe fe‘iloaki.”
Pea nau ō ‘o fakahekeheka ia ki vaka.
Currently Selected:
Ngāue 20: TCNT
Highlight
Share
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
