Ngāue 19
19
Ko Paula ‘i ‘Efesō
1Lolotonga ‘a e kei nofo ‘i Kolinitō ‘a ‘Apolosí, na‘e hala ‘uta atu ‘a Paula he fonua mo‘ungá ki ‘Efesō, ‘o fe‘iloaki ai mo e ni‘ihi na‘e tui kia Sīsuú. 2Peá ne ‘eke ange kiate kinautolu, “Na‘a mou tui kia Sīsū pea mou ma‘u ai e Laumālie Mā‘oni‘oní?” Pea nau tala ange, “‘Ikai. Kuo te‘eki ai pē ke mau fanongo ‘oku ‘i ai ha toko taha ko e Laumālie Mā‘oni‘oni.”
3“Ka ko e ha leva e fa‘ahinga papitaiso na‘a mou papitaiso aí?” Ko Paula atu ia.
Pea nau pehē ange, “‘A e papitaiso na‘e fai ‘e Sioné.”
4Pea tala ange ‘e Paula kiate kinautolu, “Na’e papitaiso ‘e Sione ‘a e kakaí koe‘uhí ke nau tafoki ki he ‘Otuá. Ka na‘á ne tala ange ‘e ia kiate kinautolu ‘oku ‘i ai ha taha kehe ‘oku ‘amanaki ke ha‘u, pea mou tui kiate ia. Ko Sīsū ‘a e toko taha na‘e lau ki ai ‘a Sioné.” 5Pea hili ange pē ‘a e fakahinohino ko eni ‘a Paulá, pea nau papitaiso leva ‘i he huafa ‘o e ‘Eiki ko Sīsuú. 6Na‘e hilifaki ‘e Paula hono nimá kiate kinautolu, pea na‘e foaki mai kiate kinautolu e Laumālie Mā‘oni‘oní, ‘o nau lea ‘i he ngaahi lea kehekehe mo malanga. 7Na‘e toko hongofulu mā ua nai ‘a e fa‘ahinga ko ení.
8Na‘e māhina ‘e tolu ‘a e toutou ‘alu ‘a Paula ki he fai‘anga lotu ‘o e kakai Siú ‘o fakakikihi mo kinautolu, hei‘ilo te nau tui ki he‘ene fakamatala ki he pule‘anga ‘o e ‘Otuá. 9Ka na‘e tuingata‘a e ni‘ihi, ‘o nau lea kovi ki he ‘Alungá kae fanongo mai ki ai e kakai kotoa pē. Pea mavahe leva ‘a Paula meiate kinautolu, ‘o nau hiki kātoa mo e fa‘ahinga na‘e tui kia Sīsuú ki he fale ako ‘o Tilanusí. Pea malanga hokohoko ‘aho ai pē ‘a Paula ‘o ‘osi e ta‘u kakato ‘e ua, 10‘o fanongo kātoa leva he Folofola ‘a e ‘Eikí ‘a e kakai na‘e nofo ‘i ‘Ēsiá, ko e kakai Siú mo e kakai Kalisi.
Ko e Ngaahi Foha ‘o Sivá
11Na‘e nima ‘aki ‘e he ‘Otuá ‘a Paula ‘i hono fai ha ngaahi mana fakaofo. 12Na‘e a‘u ai ki hono fakamo‘ui ha kakai puke na‘e fakapā kiate kinautolu ha ‘ū holoholo mo e konga tupenu kuo lave ki he sino ‘o Paulá, pea mavahe ai e fanga tēvolo mei he ni‘ihi. 13Na‘e kamata ō holo ha kau Siu ‘e ni‘ihi ‘o feinga ke kapusi tēvolo ‘aki e huafa ‘o e ‘Eiki ko Sīsuú, ko ‘enau pehē ange ki he fanga tēvoló, “Hū ki tu‘a. Ko ‘emau fekau eni ‘i he huafa ‘o Sīsū ko ē ‘oku malanga ‘aki ‘e Paulá.” 14Na‘e kau ai ‘a e ngaahi foha ‘e toko fitu ‘o e taula‘eiki pule ko Siva, ko ha tangata Siu. 15-16Pea faifaí pea pehē mai ‘e he tēvolo ‘e taha kiate kinautolu, “‘Oku ou ‘ilo ‘e au ‘a Sīsū, mo Paula. Ka ko hai kimoutolu?” Mo e ‘oho mai e tangata na‘e ma‘u ‘e he tēvoló ‘o tā kinautolu, ‘o nau toki feholaki tēlefua mo lavelavea mei fale. 17Na‘e fanongo ai e kakai na’e nofo ‘i ‘Efesoó, ko e kakai Siú mo e kakai Kalisi, pea nau fu’u ‘apasia ai‘o nau fakahīkihiki‘i e huafa ‘o e ‘Eiki ko Sīsuú.
18Pea na‘e kamata vete ‘e he tokolahi na‘e tui kia Sīsū ‘enau ngaahi kovi kehekehe kuo fai. 19Ko e ni‘ihi na‘e fai fakalou‘akau ki mu‘a, na‘a nau fetuku mai ‘enau ‘ū tohí ‘o tutu kae sio e pē kakaí. Ko e mahu‘inga ‘o e ‘ū tohi, na‘e ‘i he pa‘anga siliva ‘e nima mano. 20Na‘e pehē e mo‘ui mo e mafola vave ‘a e folofola ‘a e ‘Eikí, mo ‘ene tupu fakautuutú.
Ko e Moveuveu ‘i ‘Efesoó
21Na‘e hili pē iá, pea pehē ‘e Paula, ‘i hono tataki ia ‘e he Laumālie Mā‘oni‘oní, ke ne fou atu ‘i Masitōnia mo ‘ākeia ki Selusalema, ‘o toki fou atu ai pē ki Loma. 22Peá ne fekau hono ongo tokoni ko Tīmote mo ‘Elasitō ke na ō ki Masitōnia, kae nofo si‘i atu pē ia ‘i ‘Ēsia.
23Na‘e lolotonga iá, ‘oku ‘i ai ha moveuveu lahi ‘i ‘Efesō koe‘uhi ko e ‘Alungá. 24Na‘e nofo ai ha taha ngāue fakamea‘a siliva ko Temetelio, ko ‘ene ngāué ko e ngaohi e fanga ki‘i ‘īmisi siliva ‘o e temipale ‘o e ‘otua fefine ko ‘Ātemisi. Ko e pa‘anga lahi na‘á ne ma‘u aí, pea pehē pē ki he‘ene kau ngāué. 25Na‘e fekau ‘e Temetelio ‘ene kau ngāué, mo hono kaungāngāue fakamea‘a silivá, ke kātoa mai, peá ne lea ange kiate kinautolu, “Kāinga, ko e ma‘u‘anga pa‘anga lelei foki ‘etau ngāué ni. 26Pea kuo mou mamata mo fanongo he me‘a ‘oku fai ‘e he siana ko eni ko Paulá. ‘Okú ne tala holo ‘e ia ‘oku ‘ikai ko e ngaahi ‘otua mo‘oni ‘a e ngaahi ‘otua ‘oku tau ngaohi ‘e kitautolu ‘i māmaní. Pea kuo tui ki ai e tokolahi, ‘o ‘ikai ngata pē ‘i ‘Efesoó ni kae pehē ki ‘Ēsia kātoa. 27‘E iku pē ‘o ongoongokovi ‘etau ngāué ki he kakai kotoa pē, pea ‘e tuku leva ‘enau faka‘apa‘apa ki he Temipale ‘o e ‘otua fefine lahi ko ‘Ātemisí, ‘a ia ‘oku lotu ki ai ‘a e kakai kotoa ‘i ‘Ēsia mo māmani kātoa. ‘E faifai pea ngalo hotau mafi ‘otua fefiné.” 28Na‘e ‘ita ai ‘a e kakaí, ‘o nau kaikaila, “Ko e mafí pē ‘a ‘Ātemisi, ‘a e ‘otua fefine ‘o e kakai ‘Efesoó.” 29Pea te‘eki ai ke fuoloa kuo moveuveu kātoa ‘a e koló. Na‘e puke ‘e he ni‘ihi ‘a Keio mo ‘Alisitako, ko e ongo tangata na‘e omi mo Paula mei Masitōniá, ‘o toho atu ki he fai‘anga faiva ‘o e koló. 30Na‘e fie ‘alu ‘a Paula ‘o lea ki he kakaí, kae ta‘ofi ia ‘e he kakai na‘e tui kia Sīsuú. 31Ko e kau taki ‘e ni‘ihi he koló, ko e ngaahi kaungāme‘a ‘o Paula. Pea na‘a nau pōpoaki mai ki ai ke ‘oua te ne ‘alu ki he fai‘anga fonó. 32Lolotonga iá, kuo vālautu‘u ‘a e kakaí he fai‘anga faivá, ko e kaila hake e ni‘ihi ‘oku pehē mo pehē, kae kaila ‘aki ‘e he ni‘ihi e me‘a kehe. Pea ko e tokolahi ia, na‘e ‘ikai pē te nau ‘ilo e ‘uhinga ‘o ‘enau fakatahá. 33Na‘e teke‘i ‘a ‘Alekisānita ‘e he kau taki ‘e ni‘ihi ‘o e kakai Siú ke ‘alu atu ki mu‘a ka nau tala ange ‘e kinautolu e lea ke ne faí.
Na‘e ta‘alo mai ‘a ‘Alekisānita ki he kakaí ke nau fakalongo hifo, peá ne feinga ke lea kiate kinautolu ke fakamahino e me‘a kuo hokó. 34Ka ko e sio atu pē e kakaí ko e Siu ‘a ‘Alekisānitá, pea nau kāila ‘aki ai pē e me‘a tatau, ‘o ‘osi ha houa ‘e ua, “Ko ‘Ātemisi pē ‘a e mafi ‘o e kakai ‘Efesoó.” 35Na‘e faifaí pea lava ‘e he pule koló ‘o lolomi e moveuveú, peá ne pehē ange kiate kinautolu, “Kāinga ‘Efesō, ‘oku ‘ikai ke puli ki ha taha ko e kolo ko ‘Efesoó ko e tefito ia ‘o e lotu ki he mafi ‘otua fefine ko ‘Ātemisí. Ko hai ‘oku ‘ikai te ne ‘ilo ‘etau tauhi heni ‘a hono ‘īmisi na‘e tō hifo ki māmani mei langí? 36Ko e me‘a ia ‘oku ‘ikai ke ala faka‘ikai‘i. Pea ‘i he‘ene peheé leva, mou fakalongo hifo. Pea ‘oua te mou fai ha me‘a te mou toki fakame‘apango‘ia ai. 37Kuo mou taki mai e kau tangatá ni ki heni. Ka kuo te‘eki ai ke nau fai ha pau‘u ki ha temipale, pe lea kovi ki hotau ‘otua fefiné. 38Kapau ko e loto ‘o Temetelio mo hono kaungāngāué ke faka‘ilo ha taha, ko e fale hopó ē mo e kau fakamāú. Ō kinautolu ‘o fai ‘enau lāungá ki ai. 39Pea kapau ‘oku mou loto ke fai ha me‘a ‘oku lahi ange, pea ‘ave ia ki ha fakataha ‘a e kau fakafofonga ‘o e koló. 40‘E faifai pea faka‘ilo kitautolu he ‘ahó ni ko e fakatupu moveuveu. He ko e fu‘u vālautu‘u ko ení, ‘oku hala‘atā hano ‘uhinga lelei.”
41Pea ‘osi ‘ene lea ko iá peá ne fekau e kakaí ke mātuku.
Currently Selected:
Ngāue 19: TCNT
Highlight
Share
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
