2 Pita 2
2
Ko e Kau Palōfita mo e Kau Faiako Loi
1Na‘e ‘i ai ha kau palōfita loi na‘a nau hūhū holo he kakaí he kuo hilí. Pea ‘e toe ‘i ai ha kau palōfita loi te nau hūhū holo ‘iate kimoutolu. Te nau fakamafola ‘e kinautolu ha ngaahi fakahinohino loi mo fakatu‘utāmaki. Ka ‘oku ‘ikai ko e kau faiako mo‘oni kinautolu ‘a e Faiako Lahí, ‘a ē na‘á ne totongi huhu‘i kinautolu ‘aki ha totongi lahi. Pea ‘e fakafokifā pē ha ‘aho kuo nau ‘auha kinautolu. 2‘E tui ha tokolahi ki he‘enau ngaahi tō‘onga palakuú. Pea te nau fakaloto‘i ai ha kakai ke nau lau‘ikovi‘i e Hala ‘o e Mo‘oní. 3Ko e kakai mānumanu eni te nau takihala‘i kimoutolu ‘aki ‘enau ngutu mālié. Ka na‘e ‘osi toka pē he finangalo ‘o e ‘Otuá mei mu‘a ke tautea kinautolu. Pea ‘oku ‘ikai foki ke tule mohe ‘a e ‘Otuá ia.
4Na‘e ‘ikai ke toe maemaekina ‘a e ‘Otuá hono tautea ‘a e kau ‘āngelo na‘e fai angahalá. Na‘á ne tu‘utu‘uni ke ha‘i sēini kinautolu pea laku ki heli ki he luo fakapo‘ulí ke nau nofo ai pē ki he ‘Aho Fakamāú. 5Na‘e ‘ikai ke toe maemaeekina ‘a e ‘Otuá hono tautea ‘a e kakai faikovi ‘i māmani he kuonga ‘o Noá. Na‘á ne faka‘auha kinautolu ‘aki e lōmakí, tukukehe pē ha toko valu, ‘o kau ai mo Noa, ko e tangata na‘á ne tu‘uaki e mo‘oní.
6Na‘e faka‘auha ‘e he ‘Otuá ‘a e ongo kolo ko Sōtoma mo Komola ‘aki ‘ene tutu ke ‘osi‘osingamālie. Pea ko e fakatokanga ia ki ha taha pē ‘e holi ke fai angahala. 7-8Ka na‘á ne fakahaofi ‘a Lote. He ko e tangata failelei ia na‘e faingata‘a‘ia ‘ene mo‘uí koe‘uhi ko e ngaahi kovi na‘á ne mamata mo fanongo ki ai he kakaí he ‘aho kotoa pē. 9Pea ‘oku mahino mai ai e poto ‘a e ‘Otuá hono fakahaofi e kakai faileleí mei honau ngaahi faingata‘a‘iá, mo hono tautea ‘a e kakai faikoví ‘o a‘u ki he ‘Aho Fakamāú.
10Ko e hilifaki tautea ‘a e ‘Eikí ‘oku mamafa taha pē kiate kinautolu ‘oku talangata‘a kiate ia mo nau tokanga ki he fakatōli‘a ‘a e ngaahi holi ‘a honau kakanó. Ko e kakai fakafuofuolahi mo hīkisia kinautolu. Pea ‘oku ‘ikai ke nau mā he laukovi ki he kau mā‘oni‘oni ‘i langí. 11‘Oku hulu atu ‘a e mafai mo e mafi ‘o e kau ‘āngeló ‘i he kau faiako loi ko ení, kae hili iá, na‘a mo e kau ‘āngeló ‘oku ‘ikai ke nau tukuaki‘i e kau faiako loí ki he ‘Eikí.
12‘Oku ‘ikai ke toe faikehekehe e kakai ko ení mo e monumanu. ‘Oku nau mo‘ui‘aki pē honau ngaahi ongo‘angá, pea ‘oku fanau‘i pē kinautolu ke tuli pea pō ‘o tāmate‘i. ‘Oku nau anga‘aki ‘a e lau‘ikovi‘i e ngaahi me‘a ‘oku ‘ikai ha‘anau ‘ilo ki ai. Ka kuo pau ke nau ‘auha kinautolu koe‘uhi ko ‘enau faikoví. 13Ko e kakai kovi kinautolu. Pea ko e koví pē ‘e fakapale‘i ‘aki kinautolú.
‘Oku fakalata kiate kinautolu ‘a e mo‘ui fakausousa he ‘aho mo e pō. Ko e kau anga-fakalusa kinautolu. Pea ‘oku fakamele‘i ‘enau fa‘a kai fakaafé ‘e he‘enau tō‘onga fakamā mo siokitá. 14‘Oku ‘ikai mo ha me‘a te nau tokanga ki ai ka ko e tono mali. Pea ‘oku ta‘e fakangatangata ‘enau fai angahalá. ‘Oku nau anga‘aki ‘a e kākaa‘i e kakai falala noa‘iá. Pea ‘oku fonu ngutungutu honau lotó he mānumanú. Ka te nau iku pē ki he mala‘iá.
15Kuo nau afe mei he hala totonú ‘o hē ai, ko ‘enau fa‘ifa‘itaki e palōfita ko Pēlami, ko e foha ‘o Posoli. Na‘á ne manako he pa‘anga kuo ma‘u he kākaá. 16Ka na‘e fakatonutonu ia ‘e ha ‘asi na‘e lea ange kiate ia ‘aki e le‘o‘i tangata ke ta‘ofi ‘ene fakavalevalé.
17Ko e kakai eni ‘oku nau hangē ha ngaahi vaitupu kuo pakupakú, pe ko ha konga ‘ao ‘oku puhi holo he matangí. Kuo ta‘ofi ma‘anautolu ‘a e potu fakapo‘uli taha ‘o helí. 18‘Oku nau futa‘aki ‘enau fakaseselé, pea nau tauhele‘i ‘aki ‘enau tō‘onga pango mo fakalieliá ‘a e si‘i fa‘ahinga ‘oku mālō pē ‘enau lava ‘o sītu‘a ki he tō‘onga mo‘ui ‘a e kakai fakapo‘ulí. 19‘Oku nau tu‘uaki kiate kinautolu e tau‘atāiná, kae lolotonga iá, ko e kau pōpula mo kinautolu ki ha ngaahi ‘ulungāanga fakatu‘utāmaki mo fakalielia. Ko e pulekehea ‘ete mo‘uí ki ha me‘a, ko ‘ete pōpula ia ki he me‘a ko iá.
20‘I he’enau fuofua ‘ilo ki hotau ‘Eiki ko Sīsū Kalaisí na‘a nau hola leva mei he ngaahi me‘a fakatu‘utāmaki mo fakalielia ‘o e maama ko eni. Kae me‘a pango, kuo nau toe ‘efihia he ngaahi me‘a tatau pē ko iá, pea ‘oku toe kovi ange ai ‘enau mo‘ui ko ení he‘enau mo‘ui ko eé. 21Na‘e ngutuhua ange ke ‘oua te nau ‘ilo ki he hala ‘oku totonú. He neongo ‘enau a‘usia e mo‘oní, ka na‘a nau sītu‘a ki he ngaahi fekau toputapu ne fakakoloa‘i ‘aki kinautolú. 22‘Oku tautonu kiate kinautolu e lea ko eni,
“Kuo foki e kulií
ki he‘ene luá.
Ko e puaka ne ma‘á,
kuo toe fakapelepela.”
Currently Selected:
2 Pita 2: TCNT
Highlight
Copy
Compare
Share
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
