2 Pita 1
1
Ko e Fakafe‘iloaki mo e Lotu
1Si‘i kāinga, ‘a kimoutolu kuo ta‘imālie tatau mo e kau ‘apōsitoló he tui ‘oku mahu’inga hangē ko etau tuí, ko e tui ‘oku faitotonu pea ‘ikai filifilimānako ‘a hotau ‘Otua mo Fakamo‘ui ko Sīsū Kalaisí.
Ko au Saimone Pita ‘oku ou tohi atú. Ko e tamaio‘eiki mo e ‘apōsitolo au ‘a Sīsū Kalaisi.
2Tauange ke lōlahi atu kiate kimoutolu ‘a e ‘ofá mo e fiemālié ‘i ho‘omou a‘usia ‘a e ‘ilo ki he ‘Otuá pea mo hotau ‘eiki ko Sīsū Kalaisí.
Ko e Mo‘ui Fa‘ifa‘itaki ki he ‘Eikí
3Na‘e foaki mai e me‘a kotoa pē ‘oku fai ai e mo‘ui ‘oku hoa mo e finangalo ‘o e ‘Otuá ‘i he‘etau a‘usia ‘a e ‘ilo ki he toko taha na‘á ne fakaafe‘i kitautolu ke tau ‘inasi ‘i hono lāngilangí mo hono leleí. 4He na‘e fai ‘e he ‘Otuá ‘a e ngaahi tala‘ofa lahi mo fungani, koe‘uhí kae lava ai ke tau kau he anga ‘o e ‘Otuá. Pea ko ‘etau toki lava ia hono teke‘i e holi ki he ngaahi mālie ‘o māmani ‘oku iku ki he ‘auhá. 5Ko ia, mou tūkuingata ke fakalakalaka ho‘omou tuí ‘aki ho‘omou tānaki atu ki ai e anga-leleí mo e potó, 6mo e pule‘i kitá, mo e fa‘a kātakí, mo e ‘ulungāanga faka-‘Otuá, 7mo e matakāingá, mo e ‘ofá. 8Kapau ‘e pehē ho‘omou tupulekiná, pea ‘e mahino kuo ‘aonga mo ola lelei ho‘omou mo‘uí. 9Pea kapau ‘oku ‘ikai ke tupulekina ho‘omou mo‘uí, pea tā ‘oku mou hangē ha kakai kuí, pe sio nounoú, pea kuo ngalo ‘iate kimoutolu ‘a e ‘osi fakamolemole‘i ho‘omou ngaahi angahalá.
10Ko ia ai, kāinga, mou fai tūkuingata ke hā mahino ko e kakai kimoutolu kuo ui mo fili ‘e he ‘Otuá. Ka moú ka fai pehē, pea ‘e ‘ikai ke mou humu. 11Pea ‘e toki talitali māfana kimoutolu ‘e hotau ‘Eiki ko Sīsū Kalaisí ke mou hū ki hono pule‘anga ta‘e ngatá.
12‘Oku mou kei tu‘u kalikali pē he ngaahi mo‘oni na‘e fakahā atú. Ka he‘ikai tuku ai ‘eku toutou fakamanatu atu e ngaahi mo‘oni ko iá. 13Ko hono mo‘oní, ‘oku ou pehē ‘oku tonu ke u toutou fakamanatu atu kiate kimoutolu kae ‘oua leva kuó u mate. 14Pea kuo ‘osi fakahā mai ‘e hotau ‘Eiki ko Sīsū Kalaisí ‘oku vave pē ‘eku maté. 15Ko hono ‘uhinga ia ‘oku ou fai tūkuingata ai ke mou kei manatu‘i pē e ngaahi me‘á ni ‘oka hoko mai hoku ‘ahó.
Ko e Kau Mamata Tonu he Lāngilangi ‘o Kalaisí
16Na‘e ‘ikai ko ha loi pe talanoa fa‘u ‘emau fakamatala na‘e fai atu ‘o kau ki he māfimafi mo e toe hā‘ele mai ‘a hotau ‘Eiki ko Sīsū Kalaisí. He na‘a mau mamata tonu pē ki hono fu‘u lāngilangí. 17Na‘e fakalāngilangi‘i mo‘oni ia ‘e he ‘Otuá ko e Tamai ‘aki ‘ene folofola ange, “Ko hoku foha ‘ofeiná eni. ‘Oku mātu‘aki fakafiemālie ‘ene mo‘uí kiate au.” 18Na‘a mau fanongo tonu he le‘o ko iá. He na‘a mau ‘i ai fakataha mo Sīsū he funga mo‘unga tapú. 19‘Oku toe ‘ā‘āsili ai ‘emau fakapapau‘i ko e mo‘oni e lau ‘a e kau palōfitá. Pea ‘oku tonu ke mou tokanga lelei ki ai. He ‘oku hangē ia ko ha maama ‘oku ulo ‘i ha feitu‘u fakapo‘uli kae ‘oua leva kuo mafoa mai e atá, pea hopo mo e Fetu‘u ‘Ahó ‘i homou lotó. 20Pea ko e me‘a tēpuú, ke mou manatu‘i ‘e ‘ikai lava ‘e ha taha ke faka‘uhinga ‘iate ia pē ha kikite ‘i he Folofolá. 21He na‘e ‘ikai ke fatu ‘e he kau palōfitá ‘iate kinautolu pē ‘enau faka‘uhingá. Ka na‘e tataki ‘enau fakakaukaú ‘e he Laumālie Mā‘oni‘oní ‘o nau lea‘aki e ngaahi folofola mei he ‘Otuá.
Currently Selected:
2 Pita 1: TCNT
Highlight
Copy
Compare
Share
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
