2 Pita 3
3
‘E Toe Foki Mai ‘a e ‘Eikí
1Si‘oku ngaahi kaungāme‘a, kuo tu‘o ua eni ‘eku tohi atu mo ‘eku feinga ke ‘oua ‘e ngalo ‘iate kimoutolu 2‘a e ngaahi me‘a na‘e kikite ki ai ‘a e kau palōfita toputapu he kuo hilí. Pea ‘oua foki na‘a ngalo mo e ngaahi me‘a na‘e fakahā atu ‘e he kau ‘apōsitoló, ‘a ē kuo fekau ‘e hotau ‘Eiki mo Fakamo‘uí ke tau faí.
3Ka mou tomu‘a fakatokanga‘i e me‘a ko ení, ka a‘u ki he ngaahi ‘aho faka‘osi‘osi ‘o e tu‘u ko ení pea ‘e ‘i ai ha ni‘ihi te nau tokanga tāfataha pē ki he ngaahi holi ‘a honau kakanó. Te nau manuki‘i kimoutolu. 4Pea te nau pehē atu, “Kuo hā e fakapapau‘i atu ‘e homou ‘Eikí ‘e toe foki maí? He ko ena kuo mate atu homou fuofua kau takí mo e te‘eki ke momo‘i liliu ‘a māmani ia.”
5Ko e fa‘ahinga ia ‘oku ‘ikai ke nau fie fakamo‘oni‘i ‘a e tupu ‘a māmani ‘i ha fo‘i tō folofola ‘a e ‘Otuá. Na‘e tupu ‘a māmani mei he vai, pea toe ngaohi‘aki e vai. 6Pea toki faka‘auha ‘amui ange ‘aki ‘a e fu‘u vai fakalilifu ‘o e Lōmakí. 7Pea ko e tō folofola pē ko iá ‘oku kei tolongá ni ai ‘a langi mo māmani ke a‘u ki he ‘aho fakamāú. ‘E tutu ai ‘a langi mo māmani ko hono faka‘auha ‘a e kakai na‘e ‘ikai ke nau tui ki he ‘Otuá. 8‘E hoku ngaahi kaungāme‘a, mou manatu‘i, ko e ‘aho ‘e taha ‘oku tatau ia mo ha ta‘u ‘e taha afe ki he ‘Eikí. Pea ko e ta‘u ‘e taha afe ‘oku tatau mo ha ‘aho pē ‘e taha kiate ia. 9‘Oku hala e fakakaukau ‘a e kakai ko ē ‘oku nau tukuaki‘i ‘oku tō‘ohi ‘a e ‘Eikí ‘i hono fakahoko ‘ene ngaahi tala‘ofá. Ko hono mo‘oní, ko e ‘Otua fa‘a kātaki ia, he ko hono finangaló ke tafoki e kakai kotoa pē mei he‘enau angahalá pea ‘oua na‘a ‘auha ha fo‘i toko taha. 10Ko e ‘aho ‘e foki mai ai e ‘Eikí, ‘e faka‘ohovale kiate kitautolu, ‘o hangē ko ha hoko mai ha kaiha‘a ki hoto ‘apí. ‘E ‘ohovale pē kuo puli e vavaá ia mo e fu‘u ‘u‘ulu lahi. Pea ‘e vela ai hono me‘a kotoa ‘o ‘osi‘osi, pea pehē foki mo māmani mo e ngaahi ngāue ‘oku ‘i ai. 11‘E faka‘auha ai e me‘a kotoa pē, pea ‘oku taau ke mou fai e ngāue e ‘Otuá mo fakalāngilangi‘i ia ‘aki ho‘omou tō‘onga mo‘uí 12‘i ho‘omou mātu‘aki tatali ko eni ke hoko mai ‘a e ‘Aho ‘o e ‘Otuá. Mou fai tūkuingata ai pē ke fei mo hoko mai ia. Pea ka hoko mai leva, pea ‘e tutu ke ‘osi‘osingamālie ‘a e vavaá, pea ‘e ‘auha ai pē he afí mo e ngaahi me‘a kotoa ‘oku ‘i aí. 13Ka kuo tala‘ofa‘aki mai ‘e he ‘Otuá ha langi fo‘ou mo ha māmani fo‘ou, ‘a ia ‘e ma‘u tofi‘a ai e faitotonú. Fei mo tau a‘u ki ai.
14Pea ko ia, si‘oku ngaahi kaungāme‘a, mou nofo‘aki tali ki he ‘Aho ko iá, mo fakapapau‘i te mou fe‘iloaki ai mo e ‘Eikí kuo ma‘a mo haohaoa ho‘omou mo‘uí pea melino ho‘omou nofó. 15Vakai na‘a ngalo ‘iate kimoutolu ko e fa‘a kātaki ‘a e ‘Eikí koe‘uhí ko ‘ene finangalo ke fakahaofi e kakai kotoa pē. Ko ia pē foki na‘e fai tohi atu ai hotau kaume‘a ko Paulá ‘aki e poto kuo foaki mo‘ona ‘e he ‘Otuá. 16Pea ko e kaveinga pē ia ‘a Paula he‘ene ngaahi tohí, neongo nai ‘oku mahinongata‘a ‘ene ngaahi ‘uhinga ‘e ni‘ihi. ‘Oku ‘i ai foki e ni‘ihi fakapo‘uli mo ta‘epau kuo nau iku ai ‘o ‘auha ko ‘enau mimio holo ‘ene ngaahi laú. Pea ‘oku nau mio‘i foki mo e ngaahi potu Folofola ‘e ni‘ihi.
17Si‘oku ngaahi kaungāme‘a, ko eni kuó u ‘osi fakatokanga atu. Ko ia, vakai na‘a mou hē ‘i ha ngaahi fakahinohino hala ‘a ha kakai kovi pea hoko ai mo ho‘omou humu. 18Tauange ke tupulekina ai pē ho‘omou mo‘uí koe‘uhi ko e ‘ofa ‘aufuatō mo e foaki maama ‘a hotau ‘Eiki mo Fakamo‘ui ko Sīsū Kalaisí. Tau fakalāngilangi‘i pē ia he lolotongá ni mo e kaha‘ú na, ‘o tuputupu‘a. ‘Ēmeni.
Currently Selected:
2 Pita 3: TCNT
Highlight
Copy
Compare
Share
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
