ROM 15
15
Khristian noplenna zahdan
1Tuachi’n ei ahatten eima lungnopna ding suilou in, ahatloute hatlouna ithuohpi zaw ding uhi. 2Michin in i innvengte hoina dinga ilamtou ua, isuhlungkim ding uh ahi. 3#Late. 69.9Aziehpen Khrist nangawn in Ama lungnopna ding angaituo sih a, “Hinanleh nou hing selphoute selphouna khu keima tungah atuta hi,” chia na kigiel bangin ahi zaw hi. 4Masanglai a na kigiel pouma khu Laisiengthoua thuohhatna leh lungmuonna zieh a kinepna inei theina dinga eite kihilna dinga gel ahi. 5Tuachi’n thuohhatna leh hamuonna Pasian in Jesu Khrist mabangin khat leh khat lungsim kibang neiin hing umsahta hen. 6Tuachi’n lungsim kibang leh gen kibanga, i Mangpa Jesu Khrist Pa, Pasian na pahtawi thei na ding un. 7Tuaziehin Pasian thupina dinga Khrist in noute ahing pomtah mabangin, khat leh khat kipomtuo chiet un. 8Pu leh pate kunga thuchiemte sukip dingin Pasian thutah ziehin, Khrist pen teptante a dingin suohin ahing pangta chi noute kang hil ahi. 9#2 Sam. 22.50; Late. 18.49Ahepina zieh a Jentelten Pasian apahtawi theina dingun,
“Tami ziehin Jentelte lah ah,
Nang kang phat dinga,
Na min phat in la kasa ding hi,”
chi a na kigiel bangin.
10 #
Danp. 32.43
Tualeh “Nou Jentelte aw,
A mite toh lungdam un;”
achi kia hi.
11 #
Late. 117.1
Tualeh Nou Jentete zousiein,
“Mangpa phat un,
Mizousie in zong Ama phat un,”
achi kia nalai hi.
12 #
Isai. 11.10
Isai in,
“Jesse zungpi ahing zamdoh dinga,
Jentelte tunga vaihawm dingin,
ahing dingdoh dinga,
Ama ah Jentelten kinepna anei ding uhi,”
ana chi kia hi.
13Hagau Siengthou silbawltheina zieha kinepna kiningching na nga theina dingun, kinepna Pasian in ginna a kipahna leh hamuonna chintengin hing sudimta hen.
Paul laihah tup leh ngim
14Unaute, noute pen hoina in na dim ua, pilna kim neiin, khat leh khat na kihasot thei uh chi keima ngel in zong ka thei hi. 15Ahivang in unaute, Pasian in ahing pieh hepina ziehin noute hing theidohsah kiana dan in akaal lahah thu poimaw them khat hangsantah in ka giel ahi. 16Jentelte sillatte pomtah ahitheina ding leh Hagau Siengthou in asuhsiengthou theina dingin, Jesu Khrist khantanhoi nasep ka sem hi. 17Tuaziehin Pasian lam silte ah, Jesu Khrist ah, kisahtheina ding ka nei hi. 18Pasian thumang dinga Khrist in thugen leh nasep a, Keima zanga asilbawlte loungal bangma gen ngam ding ka nei sih hi. 19Chiemtenate leh sillamdangte in, Pasian Hagau silbawltheinain; tuachi’n Jerusalem leh akimvel gam a kipat Illirikam gam tan dongin Khrist khantanhoi kimtahin ka gen zouta hi. 20Khrist min kilawkhah nailouna munte a khantanhoi gen ka tup ahi, tuachilou in pen midang suongphum tunga inn lam ka hi kha ding hi. 21#Isai. 52.15“Hinanleh akhantan hoi
Kigen ngailounaten amu ding ua,
aza ngainailouten atheisiem ding uhi;
chi a kigiel bangin gen ka tum zaw hi.”
22 #
Rom. 1.13
Tamte ziehin na kung ua hing haw ding tamveipi dalin ka umta hi. 23Hinanleh tuin pen tam gamkai ah sepna ding mun ka nei nawn lou toh, noute kunga hing haw ding ka lunggulna kum tampi ahi taah toh, 24Spain gam a ka haw chienga noute kunga hing kiban malam a, ikimutuo ding uh kinem in ka um hi. Aziehpen, noute toh kithuo zou chienga, ka khuolzinna a nouten nang panpi ding u’zong ka kinem hi. 25#1 Kor. 16.1-4Hinanleh tuin pen Jerusalem a misiengthoute nasem dingin ka pei phot ding hi. 26Aziehpen Masidonia gam leh Akaia gam a miten Jerusalem khuo a misiengthoute lah a migentheite adingin sum tuohkhawm pha asata uhi. 27#1 Kor. 9.11Amauten lungkimtah in atuohkhawm ut chiet uhi, tuabang bawl ding aleiba uh zong ahi mawng hi. Aziehpen Jentelten Judate hagau lam guolzawlna akitanpi u’leh, amaun zong a tahsa lam guolzawlnate uh Judate akitanpi uh abat uh ahi. 28Tuaziehin ken tam silpiehte ka piehkhiet a, asangna uh chi ka theichien zou chiengin, noute kunga hing kibang malam in, Spain gamah ka haw ding hi. 29Noute kunga kang haw chiengin Khrist khantanhoi guolzawlna kim toh kang haw ding chi ka thei hi.
30Ka unaute aw, Kei a dinga Pasian kunga lunglut tah a thungen khawm dingin i Mangpa Jesu Khrist tungtawn leh Hagau itna tungtawnin ka hing ngen ahi. 31Judia gam a gingloute lah a kipat ka suotat theina ding leh Jerusalem khuo a ka nasep, misiengthoute a dinga pomtah ahitheina dingin. 32Tua ban ah, Pasian deina banga, noute kunga lungnopna toh kang haw a, i kisuhhal khawm thei chietna ding un, thu na ngen un. 33Lungmuonna Pasian in noute na unpi un hing umpita hen. Amen.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.