ROM 16
16
Mimal mangpha hahna
1Kenkrea khuo a hattuom nasem i unaunu uh Phoibi na kung uah ka hing meltheisah hi. 2Mangpa min a misiengthoute banga nana pom ua, panpi angaina phot a na panpi ding un, aziehpen amanu’n zong mi tampi ana panpita a, kei zong ahing panpi hi. 3#Nasep. 18.2Khrist Jesu a ka seppite Prisilla leh Akuila hing na nousiet pieh un. 4Amauten ka hinna dingin Jesu Khrist min in a ngawng uh adawta uhi; amaute tung guoh hilouin Jentel hattuomte zousie tungah zong kipahthu ka gen hi. 5Tuabangmain a inn ua hattuom kikhawmte zong hing na nousiet pieh un. Akaia gam a Khrist a ga masapen ka ittah Epenetus zong hing na nousiet pieh un. 6Na lah ua semgim Mari hing na nousiet pieh un. 7Ka nampite lah a ka koltanpi, sawltahte lah a minthangtah, Khrist a zong kei sanga um masazaw, Andronika leh Juni hing na nousiet pieh un.
8Mangpa a ka ittah Amplia hing nousiet pieh un. 9Khrist a iseppi uh Urbanus leh Stakis hing nousiet pieh un. 10Khrist a gin umtah Apelles, hing nousiet pieh un. Aristobulus inn sungmite hing nousiet pieh un. 11Ka nampi Herodion hing nousiet piehun. Mangpa a um Narkissus inn sung mite hing nousiet piehun.
12Mangpa a nasem Triphena leh Triphosa hing nousiet pieh un. Mangpa a nasem gim mama ka ittah Persis hing na nousiet pieh un. 13#Mak. 15.21Mangpa a tel tuom Rufus leh anu Kei nu zong hiveve, hing nousiet pieh un. 14Asinkrita, Phligon, Hermas, Patrobus, Kritus, Hermes leh amaute toh umkhawm unaute hing nousiet pieh un. 15Philologus, Julia leh Neriah leh asanggamnu leh Olimpas tualeh akung ua misiengthou umte zousie hing nousiet pieh un. 16Kitawpna siengthou toh khat leh khat kinousiet tuo chiet un. Khrist hattuomten ahing nousiet uhi.
17Unaute aw, kithuhilna dan noute hing kihil lou banga kikhenna leh puana siemte melchi ding leh kiheisan dingin ka hing ngen hi. 18Aziehpen tuabang miten i Mangpa uh Jesu Khrist nna asem sih ua, amauh gilpi nna asem zaw uhi, tualeh kamsiem leh maitangphat siem thuin mimawlte asol uhi. 19Na thuman dan uh mi zousie lah ah akithangta a, tuaziehin na tung uah ka kipah hi; hinanleh ahoi lam a pil ding leh aselam amawl dingin noute ka hing dei hi. 20Lungmuonna Pasian in tomnoukaal in Setan na kephang nuoi uah ahing tuonchil sah paita ding hi. I Mangpa uh Jesu Khrist hepina na tung uah umta hen. Amen. 21#Nasep. 16.1Ka naseppi Timothi leh ka nampi Lusia, Jason leh Sosipater in ahing nousiet uhi.
22Keima Tertius tami laihah gielpa in Mangpa min in ka hing nousiet hi. 23#Nasep. 19.29; 1 Kor. 1.14; 2 Tim. 4.20Ka zintunnapa Gaius leh hattuom zousie zintunna pain noute ahing nousiet uhi. Khopi sumkempa Erastus leh unaupa Kuartus in ahing nousiet uhi. 24I Mangpa uh Jesu Khrist hepina na unpi ua tungah umta hen, Amen.
25Leitung pien chiil akipat abeisa hun sawtpi na dapphuol thusim phuondoha hing um dungzui a ka khantanhoi leh Jesu Khrist thu kitangkoupina zieha noute hing phutdet thei Pasian ahi. 26Hinanleh tuin kumtawn Pasian thupieh dungzui a Laisiengthou a guolneite thugen, ginna thumanna dinga nam zousie kunga suhlat leh theisah ahi. 27Pasian pil umsun kungah, Jesu Khrist ziehin thupina kumtawn in umdenta hen. Amen.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.