ROM 14
14
Khristian noplenna
1 #
Kolo. 2.16
Ginna a hatlou mi khu aginlanate nielse louin ngai un. 2Mi khat in bangkim ne thei in akigingta a, mi hatlouin pen ante louhing maimai ane hi. 3Anete’n aneloute simmaw sih henlen, tualeh aneloute’n zong anete mawsah sih heh. Pasian in ama akipahpi tah ziehin. 4Midang suoh tunga thukhen ding nang koi na hiei? A din leh a pua ding pen apu thu ahi. Ahi, ama dinsah in aum ding hi, aziehpen Pasian in ama adingsah thei hi.
5Mi khat in ni dang sangin ni khat angai poimaw zaw hi. Midang khat in ni chinteng kibang chietin angai hi. Michin in amauh lungsim chiet ah kitheichien u’heh. 6Tuani tang miin, Mangpa zatatna in atang hi, tualeh ni tangloupa’n Mangpa zatatna in atang sih hi. Bangkim ne mi in Pasian kunga kipahthu agen ziehin Mangpa zatatna in ane a, tualeh anelou mi in zong Pasian kunga kipahthu gen in ane sih hi. 7Aziehpen koima eima a dinga hing ihisih a tualeh koima eima a dinga shi zong ihisih hi. 8Aziehpen i hin leh Mangpa a dingin i hinga, i shi in zong Mangpa a dingin i shi uh ahi. Tuaziehin i hin in zong ishi in zong Mangpa a ihi uhi. 9Mishite leh mi hingte Mangpa a ahitheina dingin Khrist khu ashi a, athou a, ahingkiata hi. 10#2 Kor. 5.10Hinanleh nang bangdinga na unau tunga mawsah a thukhen na hiei? Ahisihleh nang bangdinga na unau simmaw na hiei? Aziehpen eite i unpi ua Khrist thukhenna toupha mai a ding ding ihi uhi.
11 #
Isai. 45.23
“Mangpa’n Kei ahingzing ka hi ziehin,
khup chinteng ka masang ah akun ding ua,
Lei chinteng zong Pasian kungah,
akiphuong ding uhi,”
chi a kigiel bangin achi hi.
12Tuabang ahiziehin eiten Pasian masangah eima khantan chiet igen ding uhi. 13Tuaziehin eite khat leh khat kimawsahtuo nawn sih vai, hinanleh koiin zong aunau kipalna ding ahiei, ahisihleh kipuana ding bangma bawllou dingin kingaituo zaw heh. 14Sil bangma, ama a sienglou mawngmawng aum sih chi, Mangpa Jesu ah ka theichien a ka tahsang mama hi, hinanleh mi koipou in sil khat asiengloua angaituo leh tuakhu ama adingin asienglou ahi. 15Hinanleh bang ahiei sil khat na neh zieh a, na unau lungsim anat leh itna dana gamta nawnlou na hita hi. Na sil neh ziehin mi khat suse sin, Jesu Khrist ama dinga shi ahizieh in. 16Tuaziehin na hoina u’khu ahoilou banga gen in um sih heh. 17Aziehpen Pasian gam khu neh leh dawn thu ahi sih a, hinanleh dihtatnate, kilemnate leh Hagau Siengthou a lungnopna thu ahi zaw hi. 18Tambang Khrist nasem mipen Pasian pomtah ahia, tualeh mite patat zong alaw hi.
19Tuaziehin eite’n kilemna ding leh kisuhhat tuona ding silte idel ding uhi. 20Na neh nadawn in Pasian nasep suse sin. Sil zousie asiengthou a, hinanleh naneh nadawn zieh ua mi lungsim asuhnat leh anemi dingin ahoilou ahi. 21Na unau puana ding ahiei, ahisihleh lungnopmawna ding ahiei, ahisihleh suhzawngkhalna ding ahiei ahileh, sa nehloute, uoin dawnloute, tualeh sil bangma bawllou ahoi hi. 22Ginna na nei amah? Pasian leh nangma kaal ah kinei in. Ama hoisahna lam a siemlou kitangsahlou mi khu ahampha hi. 23Hinanleh ginlana nei kawmkawma aneh leh ginna a anehlou ziehin siemloutangin aum hi, aziehpen ginna lou a bawl pouma khelna ahi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.