ROM 13
13
Leitung vaihawmte thu man ding
1Michin atunga vaihawm thuneite thuthu in um heh. Aziehpen Pasian thu louin koima vaihawm a um sih hi; vaihawm a pangte khu Pasian guot ahi. 2Tuaziehin koizong vaihawmmi niel pouma Pasian lemguot niel ahi uh, tuabanga niel miten ama u’tungah thukhenna amu ding uhi. 3Vaihawm mitepen silhoi bawl mite adingin agiinhuoi sih ua, hinanleh mi giloute a dingin mi giinhuoi ahi uhi. Ahileh vaihawmte giing loua um na ut ei? Silhoi bawl lachin apahtat na law ding hi. 4Aziehpen ama khu na hoina dinga Pasian nasem mi ahi, hinanleh sil hoilou na bawl leh giingin; aman namsau amawhtawi sih hi, ama pen Pasian nasem sil gilou bawlte tunga lungthahna phuba lapa ahi. 5Tuaziehin lungthahna giinna zieh bep hilouin, na sie leh pha theina ziehin zong vaihawm mi thuthu a na um ding mawng ahi. 6#Mat. 22.21; Mak. 12.17; Luk. 20.25Tami zieh in sie zong na pieh uh ahi; vaihawmte pen tambang bawl dinga Pasian nasemte ahi uhi. 7Tuaziehin mi zousie kungah atan ding ua kilawm pie un: Sie piehna dingpa kungah sie pie unlen, leiman piehna dingpa kungah leiman pie unlen; giin dingpa giing unlen, zatat dingpa zong zatat un.
Sanggam ki itna
8Ki it tuona loungal koima bangma basih un, Ama amihinpi it miin dan azuikim hi. 9#Pawt. 20.14; Danp. 5.18; Pawt. 20.13; Danp. 5.17; Pawt. 20.15; Danp. 5.19; Pawt. 20.17; Danp. 5.21; Siempu. 19.18Aziehpen tam “Thupiehte, angkawm sin, tuol that sin, guta sin, theipitu dihlou in pangsin, eng sin,” chileh thupieh dang mawngmawng aum leh “Nangma na ki it bangin na innvengte na it ding ahi,” chiin akhaikhawm sieng hi. 10Itna in innvengte sietna ding abawl sih hi, tuaziehin, itna khu dan zuikimna ahi.
Khrist hing peikiana ding naidan leh hinkho siengthou
11Tualeh tu hun banghun ahiei chi na thei zieh un, tami bawl un, aziehpen igintat chiil lai sangin ihundamna anai zawta a, imut khanlaw ahun mamata chi hun umdan na thei uhi. 12Zan abei dihdihta a, khuo vah ding ahita hi, tuaziehin miel a silbawlte paiin vah thuom in ikithuom ding uhi. 13Sun a um bangin kilawm tahin i um ding uh, huham leh zukham buoi a umlouin, hua leh numei pasal kaala thangtat a umlouin, tualeh kihau leh kithangsiet a um louin,
14Mangpa Jesu Khrist in kithuom unlen, na tahsa utna uh supiching dingin bangma kibawl sih un.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.