ROM 12
12
Khristian hinkhuo leh nasep
1Tuachi’n unaute aw, Pasian kunga na sapum uh, kithoina hing leh siengthou leh pomtah hi dinga kilan dingin Pasian khotuona ziehin ka hing ngen ahi; tuakhu na bawl ding ua kilawm mawng ahi. 2Tam leitung hindan toh kituoh in um sih unlen, hinanleh Pasian deilam hoi leh pomtah leh hoibukim bang ahiei chi na thei chienna dingun na lungsim uh atha a umin hing lamdang zawta un.
Hagau silpiehte zahdan dih
3Ka kunga hing kipie hepina ziehin, na lah ua mi koipou akingaisang ding hun kalval a, kingaisanglouin, hinanleh Pasian in michin ginna kihunkhop apieh bang zel a, kituptah a ngaituo zaw dingin ka gen ahi. 4#1 Kor. 12.12Sapumkhat ah hieng tampi inei ua, tualeh hieng zousie nasep akibang sih hi. 5Tuachi’n eite tampi hinanlei zong, Khrist ah sapum khat ihi ua, khat leh khat i kihiengtuo chiet uhi. 6#1 Kor. 12.4-11I kung ua hepina hing kipie dungzui in silthawn pieh tuom tuom inei chiet ua, thumavang gen ding ahileh iginna toh kituohin igen ding uhi, 7Ahisihleh, thunasep ding ahileh, sem vaiin thuhilmiin zong hil zel heh. 8Mi dangte hanthawn mi in zong hanthawn zel henlen, silpieh pemi in it hetlouin pie heh, vaihawmmi in thanuom tahin hawm hen, midangte hepina nei miin kipahtahin hepi uhen.
Khristian hinkhuo zah dan ding
9Itna khu lepchiena tellou hiheh, gilou pouma huo unlen, ahoilam pouma tu chinten un. 10Unau ki itna in khat leh khat, kilainat tuo chiet unlen, kizabawlna lam ah kideisah tuo chiet un. 11Kukalna lam ah thase sih unlen, Hagau lamah phatuom ngaitahin, Mangpa nna sem un. 12Kinepna ah kipah zing unlen, gimthuohna ah thuohhat unlen, thungetna lamah hakat un. 13Misiengthoute tahsap awng hu dingin na nei nalamte uh kitanpi unlen, zin bawldan siem un.
14 #
Mat. 5.44; Luk. 6.28 Nou hing bawlsete guolzawl un, guolzawl unlen gausap sih un. 15Kipahte kipahpi unlen, kapte kaapi un. 16#Thu. 3.7Khat leh khat lungsim kibangin um unlen, kisathei sih unlen, mi mawlte toh kipawl zaw unlen, nangma ngai in kipilsah sin.
17Koima gitlouna gitlounain thuh sih unlen, mi zousie mitmu ah sil kilawm bawl tum zaw un. 18Ahithei liei leh na thu ua ahithei laisie, mi zousie toh kituohin um un. 19#Danp. 32.35Ka itte aw, phuba kila sih un, hinanleh lungthahna khu Pasian awn zaw un, “Phuba lah Keima a ahia, keiman ka thuhna ding, Mangpa’n achi hi,” chi’n akigiel hi. 20#Thu. 25.21,22“Tuaziehin na melma agilkiel leh neh ding pie inlen, adang ata leh dawn ding piein. Tuabanga na bawl leh alutunga mei am buohkhum na hi ding hi.” 21Gitlou thuzawin um sih unlen, hoina in gilou zou zaw un.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.